Gaur goizean, EUDELen Batzorde Eragile berriaren lehenengo bilera egin da, irailaren 19an —orain dela hilabete eskas—, Elgoibarren egindako Batzar Orokorrean batzorde horretako kide berriak izendatu ondoren.
Elkarteburu berri eta Gasteizko alkate Gorka Urtaranek informazioa eman die gainerako alkateei; hain zuzen ere, Elkartearen barne-antolaketari buruzko informazioa eman die, bai eta Euskadiko udalei zerbitzua emateko dituen funtzio nagusiei buruzkoa ere.
Bileran landutako gairik garrantzitsuenetako bat Euskadiko Toki Erakundeei buruzko Legea (ETEL) garatzeko EUDELek egin duen solaskidetza-lana izan da, baina beste gai batzuk ere landu dira; biharko, urriaren 11rako —ostirala—, deitutako Herri Dirubideen Euskal Kontseilua prestatzea. Horretara, hiru udal ordezkari berriak joango dira, Eusko Jaurlaritza eta Foru Aldundiekin batera.
Gobernu-talde berriaren lehen topaketa honi esker, posible izan da eztabaidatzea zein izango diren udalek agintaldiaren lehenengo urtean izango dituzten lehentasunak, Euskadiko udalerrietako erronkei erantzuteko beharrezkoagoak diren lan-arloak arautzeko eta planifikatzeko. Etorkizunean egingo diren ekintza guztiak eta jada finkatutako programak hiru jarduketa-esparru nagusitan biltzea erabaki du Batzorde Eragileak: Lurraldearen eta Klimaren aldeko Ekintza, Hiritartasuna eta Gobernantza.
Garapen Jasangarriko Helburuak tokiko mailan hedatzea EUDELen ardatz estrategiko bat izango da agintaldi honetan zehar. Horrez gainera, udalerri txikiei laguntza emateko sareko lana egiten jarraituko da, bereziki gobernantza onari, berrikuntza eta eraldaketa digitalari, gizarte-zerbitzuei, funtzio publikoari, segurtasunari, euskarari eta berdintasunari dagokienez.
Lehenengo ekintza Berdintasun Arloak egingo du; izan ere, “Virginia Woolf Basqueskola” emakumezko hautetsientzako ahalduntze- eta lidergo-espazioa bultzatu nahi du berriro ere. Estrategia berria Euskadiko emakumezko alkate eta zinegotziekin eztabaidatuko da, urriaren 21ean, 22an eta 23an hiru lurraldeetan egingo diren harrera-saioetan.
2019-2023ko Batzorde Eragilea
Batzorde Eragilea EUDELen gobernu-organo gorena da, eta 15 alkatez osatuta dago. Alkate horiek hiru lurraldeetako eta neurri desberdinetako udalerriak eta tokiko sentsibilitateak ordezkatzen dituzte.
EUDELen 2019-2023 aldirako gobernu-organo berriak Elgoibarren hautatu ziren, 2019-09-19an egindako Batzar Orokorrean (ikusi Batzarreari buruzko informazioa).
EUDELen egungo elkarteburua Vitoria-Gasteizko alkate Gorka Urtaran Agirre da.
Elkarteburuordeak: Azpeitiko alkate Nagore Alkorta Elorza eta Irungo alkate Jose Antonio Santano Clavero.
Batzordekideak:
| Gordexolako alkatea | |
| Txomin Sagarzazu Ancisar | Hondarribiko akatea |
| Ager Izagirre Loroño | Mungiako alkatea |
| Aitziber Oliban Gutierrez | Erandioko alkatea |
| Txelo Auzmendi Jimenez | Asparrengo alkatea |
| Ane Beitia Arriola | Elgoibarko alkatea |
| Mikel Torres Lorenzo | Portugaleteko alkatea |
| Saioa Elejabarrieta Amorrortu | Lemoako alkatea |
| Iñigo Gaztelu Bilbao | Larrabetzuko alkatea |
| Josune Irabien Marigorta | Amurrioko alkatea |
| Miren Koldobike Olabide Huelga | Legazpiko alkatea |
| Xabier Lertxundi Asteasuinzarra | Hernaniko alkatea |