Eusko Jaurlaritzako Etxebizitza eta Hiri Agenda Sailak eta EUDELek Euskal Autonomia Erkidegoko alkateak eta zinegotziak bildu dituzte gaur Lakuan, Eusko Legebiltzarrak abenduaren 11n onartutako Etxebizitza, Lurzoru eta Hirigintza Arloko Premiazko Neurrien Legearen hedapenari buruzko prestakuntza-saio batean. 100 bat udal-ordezkarik hartu dute parte. Helburua: arauak biltzen dituen tresna berriak modu praktiko eta koordinatuan helaraztea, udalaren hirigintza-plangintza bizkortzeko eta bereziki etxebizitzen —bereziki babestuak— ekoizpena maximizatzeko, bizitegi-tentsionamenduaren testuinguruan.
EUDELeko elkarteburu eta Derioko alkate Esther Apraizek eta Etxebizitza eta Hiri Agendako sailburu Denis Itxasok inauguratu dute jardunaldia.
Bere hitzaldian, EUDELeko elkarteburuak azpimarratu du etxebizitza lehentasun komuna dela alkate guztientzat. Esther Apraizek erantzunkidetasuna eta erakundeen arteko lankidetza eskatu du, baita udalerrien arteko elkarlana ere, “tokiko erantzuna” emateko aukera guztiak aprobetxatzeko. Ildo horretan, arau berriak “ez ditu egun batetik bestera etxebizitza-behar guztiak konponduko, baina gure hiri eta herrietako egoera hobetzen lagundu dezake”, adierazi du. Hori dela eta, udalen lidergoan jarri du arreta, “tokiko ordezkariak gure bizilagunei benetako emaitzak eskaintzeko lehen erantzun-lerroa garela” azpimarratuz. Bestalde, elkarteburuak “udalerri aitzindarien” esperientzia nabarmendu du —hala nola, eremu tentsionatuen adierazpenak edo etxebizitza hutsen mobilizazioa—, erreferentzia gisa balio baitute.
Azkenik, EUDELeko elkarteburuak nabarmendu du udalek etxebizitza publikoa handitzeko konpromisoa hartu dutela, eta tresna berriak aprobetxatzeko beharra dagoela, hala nola prozedurak bizkortzea eta sinplifikatzea, tamaina eta behar ezberdinak dituzten udalerrietako bizitegi-tentsionamenduari erantzuteko.