- EUDELen elkarteburu eta Getxoko alkateak, Imanol Landak, FEKOORek gaur goizean Bilbon antolatutako ekitaldian hartu du parte, Abenduak 3–Desgaitasuna duten Pertsonen Nazioarteko Eguna dela-eta.
- Urte bat gehiago, EUDELek bat egin du erakundeek eta gizarteak FEKOORi agertutako babesarekin; era horretan, desgaitasuna duten pertsona guztien inklusioaren eta bizi-kalitatea hobetzearen alde FEKOORek egindako lan arduratsu eta eraginkorra balioetsi nahi du EUDELek.
FEKOORek sentsibilizazio-ekitaldi bat antolatu du Desgaitasuna duten Pertsonen Nazioarteko Egunerako, eta, horren bitartez, pertsona guztiek modu independentean bizitzeko duten eskubidea aldarrikatu du berriro. Ekitaldian EUDELen elkarteburu Imanol Landa izan da, baita Bilboko alkate Juan Mari Aburto ere, beste hainbat agintarirekin batera, adibidez, Gizarte Politiketako sailburuordea Lide Amelibia eta Bizkaiko Gizarte Ekintzako diputatu Isabel Sánchez Robles.
Bilboko Arriaga Antzokiko plazan jarritako karpan izan dira aldarrikapen-egun honetako ekitaldiak; bertan, Desgaitasun fisikoa eta/edo organikoa duten pertsonen Bizkaiko federazioak berriz ere azpimarratu du FEKOORek zuzendu duen Bizitza Independenterako Ereduak xede duen gizarte-eraldaketako proiektu hau hedatu eta gizarteratzeko garrantzia.
Aurten, modu independentean bizitzeko eskubidearen alde bideratu du FEKOORek abenduaren 3ko kanpaina, “Aldaketarako eragilea naiz. Bizitza independentearen alde” lelopean. Kanpainaren xedea da FEKOORek gizarteari proposatzen dion Bizitza Independenterako Eredua hedatu eta gizarteratzea. Metodologia berritzailea da, diskriminazioa saihesteko, mendekotasunari aurrea hartzeko eta gaitasunak, inklusioa eta parte-hartzea indartzeko.
Bizitza Independenterako Ereduari esker, pertsona guztiek, euren gaitasunak gorabehera, gizartean parte har dezakete, inolako bazterketarik gabe. EUDELek eta Euskadiko udalek babesa agertzen dute komunitatean erabateko inklusioa lortzearen alde, aukera-berdintasuna, irisgarritasun unibertsala eta diseinua eskainita pertsona guztientzat.
Informazio gehiago: www.fekoor.com @Fekoor #FEKOOR #DesgaitasunaNazioartekoEguna #NiEragileBI
