Herri-Dirubideen Euskal Kontseiluak otsailaren 12an Gasteizen egindako bileran, Eusko Jaurlaritzak, hiru foru-aldundiek eta euskal udalek, besteak beste, itundutako zergen gaineko diru-bilketaren 2023ko likidazioari eta 2023ko Egokitzapenerako Funts Orokorraren likidazioari buruzko erabakiak hartu dituzte.
Kontseiluaren prentsa-oharra ikusi:
https://www.irekia.euskadi.eus/mobile/eu/news/91560-herri-dirubideen-euskal-kontseilua
Udalerrien ordezkariak
Euskal udalerrien aldetik, Herri-Dirubideen Euskal Kontseiluan, hiru lurralde historikoetako hiru emakume alkatek parte hartzen dute:
- Esther Apraiz Fernandez la Peña, Derioko alkatea (EUDELeko elkarteburua).
- Nagore Alkorta Elorza, Azpeitiko alkatea (EUDELeko elkarteburuordea)
- Natividad López de Munain Alzola, Elburgoko alkatea (EUDELeko Batzorde Eragileko batzordekidea)
Finantzen lurralde-kontseiluak eta agintaldiko erronkak
Bileraren osteko agerraldian, Esther Apraiz udalerrien ordezkariak erakunde guztien arteko akordioa eta lankidetza nabarmendu ditu, herrialdeko baliabideak banatzeko.
Alkate eta EUDELeko elkarteburuak datorren asteko Araba, Bizkaia eta Gipuzkoako Finantza Kontseiluen berehalako deialdiak nabarmendu ditu. Azaldu duenez, “Udalek eta Aldundiek Udal Finantzaketarako Foru Funtsak adosten ditugun topaguneak dira, bai eta herrialdeko baliabideak Euskadiko udalerri bakoitzean nola banatuko diren ere. Bertan, udal finantzaketaren “argazkirik” errealena ezagutuko dugu.
Esther Apraizek gogorarazi du oso garrantzitsua dela beharrezko informazioa izatea, udalek beren proiektu estrategikoak bultza ditzaten tokiko agintaldiaren hasiera honetan. Era berean, Apraizek nabarmendu du euskal udalek funtsezko zeregina izango dutela etapa berri honetan, politika eta zerbitzu publikoak hobetzen eta berritzen jarraitzeko, eta pertsonak erdigunean kokatuz.
Lehendakariak gaineratu duenez, “zumeak daude guztion artean agertoki baikorrago bat egiteko, gure erantzukizunak eta eskumenak betetzeko eta gure herriak eta udalerri bakoitzak datozen urteetan aurre egin beharko dituen erronka garrantzitsuei erantzuteko. ”
Azkenik, EUDELeko elkarteburuak nabarmendu du Euskadiko Udalen Elkarteak lanean jarraituko duela udalak sendotzeko, “gure eskumenak eraginkortasunez eta efizientziaz betetzeko tokiko autonomia eta finantza-nahikotasuna defendatuz “.