EUDELek euskal udalen esku jarri du “UDALA. Udal-finantzaketa ” aldizkariaren ale berria, toki-erakundeek zerga itunduetan duten partaidetzari buruzkoa; zehazki, 2023ko ekitaldiko likidazioari buruzko datuak.
Argitalpen honen bidez, joan den otsailean izandako Herri Dirubideen Euskal Kontseiluari buruzko informazioa eskaintzen da, bai eta Araba, Bizkaia eta Gipuzkoako Finantzen Lurralde Kontseiluen ondorengo bileretan Udal Finantzaketarako Foru Funtsen datuak ere.
Informazio garrantzitsua:
- Denetara, EAEn zerga itunduen bidez bildutako dirua aurrekontuan finkatutakoa baino % 0,77 handiagoa izan da. Araban bildutako dirua aurreikusitakoa baino % 0,10 handiagoa izan da, Bizkaian % 1,24 handiagoa eta Gipuzkoan % 0,36 handiagoa.
- Herri Dirubideen Euskal Kontseiluaren bileran Egokitzapen Funts Orokorraren 2023ko likidazioa 135,6 milioi eurokoa izatea erabaki zen eta kopuru hori Arabaren (58,8 milioi euro) eta Gipuzkoaren (76,8 milioi euro) artean banatuko da.
- Foru-funtsen likidazioa 1.910 milioi eurokoa da hiru lurraldeetarako, hau da, ekitaldiko konturako ekarpenak baino % 1,65 gehiago.
- Udalak kreditu- eta energia-erakundeen aldi baterako kargetan parte hartzea ere erabaki zen. Foru aldundiek, 2023ko ekitaldian, lurralde bakoitzari dagokion zenbatekoa kupoaren deskontu gisa jaso dute.
UDALA aldizkaria urtean bitan argitaratzen da (martxoa-apirila eta azaroa) eta EAEko udalerri guztiei inprimatutako formatuan banatzen zaie. Argitalpen hori formatu digitalean ere eskuragarri dago EUDELen webgunean: https://www.eudel.eus/eu/argitalpenak