Bilbon, 2025eko maiatzaren 16an. Esther Apraiz Derioko alkate eta EUDELeko elkarteburuak Sektore Publikoko Emakumeen Elkartearen VII. Biltzarrean parte hartu du gaur goizean. Aurten Bilbon egin da, “Emakume liderrak AAren aroan” lelopean. Dagoeneko 800 emakume langile publikok baino gehiagok osatzen dute administrazioetan emakumeen talentua bultzatzen duen sare hori.
Mezu nagusi gisa, EUDELeko elkarteburuak aurrea hartzeko dei zehatza egin die sektore publikoko emakumeei: “Emakumeok liderrak izan behar dugu AAren erabilera; izan ere, prozesu horretan parte hartzen ez duena kanpoan geratzen da. Adimen artifizial ez da neutrala, beraz, ez badugu genero ikuspegitik diseinatzen, gaur egun dauden desberdintasunak betirako izango dira”. Hori dela eta, langile publikoei gaitasun digitalen inguruko prestakuntza eskaintzearen alde egin du, bai eta “Zuzendaritza Publiko profesionalaren” aldeko apustua egitearen alde eta eskubideak babestu eta teknologiaren erabilera bidezko eta inklusiboa bermatuko duten marko etiko eta normatiboak eraikitzearen alde ere.
Bere hitzaldian, Esther Apraizek Euskadiko toki-erakundeetan, udal-administrazioa eta -kudeaketa modernizatzen lagunduz, aldaketan liderrak izan diren zuzendaritza-profiletako eta profil teknikoetako emakumeen zeregin historikoa aldarrikatu du. “Lideratzen dugun aldaketa ez da soilik teknikoa, baita etikoa, soziala eta feminista ere”, esan du Apraizek, eta “elkar babesteko gure sarea indartzearen garrantzia” azpimarratu du, “elkarlanean arituz, ezagutza, etika eta zerbitzu publikoarekiko konpromisotik liderrak izanez. Hurrengo eraldaketaren protagonista izatera animatzen zaituztet, gizartearekin hobeto konektatutako administrazio eraginkor eta efiziente baterantz aurrera egiten jarraitzeko”.
Ekitaldia
EUDEL Biltzarrean parte hartzera gonbidatu dute EAEko toki-erakundeen ordezkari gisa eta berdintasunarekin eta emakumeek sektore publikoaren etengabeko hobekuntzan eta modernizazioan duten rola bultzatzearekin duen konpromisoagatik.
Zehazki, EUDELeko elkarteburuak erakundeen panelean hitz egin du, Gobernantza, Administrazio Digital eta Autogobernu sailburu María Ubarretxenarekin, Bizkaiko Administrazio Publikoko eta Harreman Instituzionaletako foru diputatu Ager Izagirrerekin eta Elkarte antolatzaileko presidente Concepción Camposekin batera.
Ekitaldiak, streaming bidez ere jarraitzeko moduan antolatua, adimen artifizialak lidergoan eta berdintasunean duen eragina du aztergai, hainbat ikuspegitatik: alborapen algoritmikoak, etika, emakumezko erreferenteak, legedia, sormena eta eskubide digitalak. Egitarauak gaikako panelak, sari-banaketa bat, TED hitzaldiak eta jarduera interaktiboak hartu ditu barnean.
Informazio gehiago: https://congresomsp.com/
