Hizkuntza ohituren inguruan hitz egingo dute adituek maiatzaren 11n eta 12an, Lasarte-Oriako Manuel Lekuona kultur etxean izango diren topaketetan.
- Hizkuntza ohituren eta gizarte aktibazioaren egitasmoa Euskal Herriko herri guztietan elkarrekin lantzeko aurkeztuko da.
Hizkuntza ohiturak aldatzeko aukerak aztertzeko, zenbait udalen esperientzia aztertuko da. Euskaldunen jokabidea aktibatzea izan dute helburu leku hauetan, eta udal horietako batzuek beren esperientzia kontatuko dute. Beraz, protagonisten ahotik aztertuko dira esperientziak, eta etorkizunean eraginkorrak izan daitezkeen bideak aintzat hartuko dira.
- Erakunde antolatzaileez gain, EUDEL, UEMA, Bizkaiko Foru Aldundia, Nafarroako Euskarabidea, erakunde-laguntzaileak izan dira Udaltop 2017 antolatzeko prozesuan.
Lasarte-Oriako Manuel Lekuona kultur etxea izango da berriro ere Udaltop jardunaldien topagunea. Eusko Jaurlaritzak eta Gipuzkoako Foru Aldundiak antolatzen dituzte hizkuntza politikaren inguruko topaketa hauek, Lasarte-Oriako Udalarekin lankidetzan. Euskadi osoko udaletako euskara zerbitzuen arteko elkarlana sustatzeko bideak irekitzea dute helburu, eta maiatzaren 11n eta 12an antolatuko dira. Aurtengo gaia hizkuntza ohiturak eta euskararen erabilera izango da; izenburua ondokoa delarik: ‘Aterako gara euskal herritarrok hizkuntzaren armairutik? Nola uztartu gizartearen aktibazioa eta hizkuntza ohituren aldaketa’.
Bederatzigarren edizioa izango da aurtengoa eta, urtero bezala, 150 aditu baino gehiago Lasarte-Oriara erakartzea espero dute antolatzaileek.
Udaltopen bederatzigarren edizio honetan izena emateko epea zabaldu da, ekimenaren web gunearen bitartez, eta erregistratzeko azken eguna apirilaren 28a da. Jardunaldi hauen barruan, hizkuntza ohiturak aldatzeko esperientzien berri eta ikerketen berri emango da hitzaldi ezberdinen bidez. Horrez gain, aurreko edizioan hartutako bideari jarraituz, mahai-inguruak egingo dira ere. Azkenik, proposamen zehatz bati erantzute aldera, talde-lana sustatuko da eta ondorio batzuetara iristeko ahalegina egingo da.
Jarrai gaitzazu
Gogoratu Udaltopen albisteak jasotzeko, webguneaz gain, beste hiru aukera dituzuela:
- Buletinera harpidetza.
- Twitter kontua jarraitzea.
- Facebook orrialdea jarraitzea.