Sailetako Albisteak

01.03.2021 Ingurumena

Eusko Jaurlaritzak, maiatzean, programa berri bat aktibatuko du, 100 milioi eurorekin, udalak Jasangarritasun energetikoaren Legera egokitzeko

Ekonomiaren Garapen, Jasangarritasun eta Ingurumen Sailak Eudelekin elkarlanean aritzeko beste mekanismo bat jarri du martxan suspertze ekonomikoa eta trantsizio energetikoa toki-erakundeen eskutik ere bultzatzeko
Maiatzean, informazio-saio batzuk antolatuko dira udalekin, udalerrietan eragin zuzena duten ekimen guztiak zehaztuz

Eusko Jaurlaritzako Ekonomiaren Garapen, Jasangarritasun eta Ingurumen Saileko ordezkariek EUDEL Euskadiko Udalen Elkarteko arduradun nagusiekin informazio-bilera egin dute. Bertan, bi erakundeek konpromisoa hartu dute haien arteko harremanak areagotzeko eta Eusko Jaurlaritzak berrikuntzaren, trantsizio energetikoaren eta ingurumenaren arloan dituen politikak euskal udalerri guztietara zuzenean iritsiko direla bermatzeko.

Eusko Jaurlaritzaren Lakuako egoitzan egindako bileran Arantxa Tapia sailburua eta Eudeleko lehendakari eta Vitoria-Gasteizko alkate Gorka Urtaran izan dira buru.

Tapiak bere sailak udalerrietan aurreikusitako eta eragin handia izango duten ekintza-programa guztiak azaldu ditu; programa horiek oso garrantzitsuak izango dira legealdi honetan Euskal Autonomia Erkidegoaren garapen jasangarrian aurrera egiteko.

Sailburuak azaldu duenez, eraldaketa sozioekonomiko eta energetiko nagusiek jarduketa estrategikoak eta garrantzitsuak beharko dituzte, Next Generation funtsei oso lotuta daudenak eta aste honetan ezagutzera ematen ari direnak bezalakoak; baina, aldi berean, Eusko Jaurlaritzak modu erabakigarrian babestuko dituen beste ekintza asko, xumeagoak eta zehatzagoak, ere beharko dira.

Bestalde, Gorka Urtaran presidenteak eskerrak eman dizkio sailburuari lehen eskuko informazioagatik, eta Udalekin koordinatuta aritzeagatik, “pozik gaude Eusko Jaurlaritzaren lan-ildoak ezin hobeto egokitzen zaizkigulako gure lehentasunekin. Gaur, Eudelen, erakundeen arteko lankidetzaren gidaliburua jaso dugu, gizarte-ongizate handiagoa duten, ekonomia berde berrian lehiakorrak diren eta ingurumenaren aldetik jasangarriak diren euskal herri eta hiriak egiteko. Eudelek lankidetza-kanala errazteko eta udalerririk txikienera irits dadin lan egingo du”.

Gauzatu Energia

Ekimen apurtzaile eta berritzaileena Gauzatu Energia programa berria da. Bertan Eusko Jaurlaritzak 100 milioi euro jarriko ditu udalen esku, Euskal Autonomia Erkidegoko Jasangarritasun Energetikoari buruzko 4/2019 Legea betetzen aurrera egin dezaten energia-planak beren gain hartzen eta gauzatzen laguntzeko.

2019az geroztik indarrean dagoen Lege horren bidez, erakunde publiko guztiei eskatzen zaie euren “energia garbiaren” adierazleak 2030era arteko denbora-eszenatoki batean hobetu ditzaten.

Legea betetzeko udalek inbertsio-ahalegin handia egin beharko dute. Horregatik sortu da 100 MM-ko hornidura eta bi lankidetza-formula dituen Gauzatu Energia programa.

Alde batetik, datorren udaberrian Energiaren Euskal Erakundeak jaulkiko duen programa bat, 10 milioi euroko dirulaguntzekin, Udalek eta toki-erakundeek beren “osasun energetikoaren” inguruan duten egoerari buruzko auditoriak egiteko.

Bestalde, Finantzen Euskal Institutuak kudeatutako “0” intereseko finantziazio-bide bat, energia garbiaren efizientzia- eta kontsumo-maila hobetzera bideratutako udalen auditoriatan aurreikusten diren ekintzen inbertsioei aurre egiteko.

Berrikuntza eta suspertzea tokian-tokian

Ekonomiaren Garapen, Jasangarritasun eta Ingurumen Sailak ahalegin berezia egingo du toki-erakundeek enpresa-berrikuntzako politiketan aktiboki parte hartzeko; hala, Enpresentzako Laguntza Plana 2021 eskaini du Toki eta Eskualde Garapeneko Agentziek, aldi berean, laguntza horiek euskal geografia osoan barreiatuta dauden enpresa txiki eta ertain txikienei helarazteko.

Gune kaltetuak eta lurralde-oreka

Halaber, Nagore Alkorta (Azpeitia) eta Antonio Santano (Irun) Eudeleko lehendakariordeek ere parte hartu duten bileraren zati bat INDARTU programari eskaini diote, Ezkerraldeko, Oarsoaldeko eta langabezia Euskal Autonomia Erkidegoaren batezbestekoaren gainetik duten lekuetako gune kaltetuetan ekonomia suspertzeko laguntzak (itzuli beharrik gabeko dirulaguntzak) bideratzeko asmoz.

Programa horri landa-inguruneko eta itsasertzeko udalerritan ekonomia suspertzeko beste ekimen batzuk gehituko zaizkio, esaterako Erein, Leader eta Itsaspen, lurralde-oreka handiagoa ahalbidetzeko eta gune txikienak, bizitzeko erakargarriak izateaz gain, lan egiteko ere erakargarriak izan daitezen.

Ingurumena hobetzeko laguntzak

Halaber, euskal udalerrietan zuzenean eragingo duten beste hainbat jarduketari buruz ere hitz egin dute, hala nola energia berriztagarriak sortzeari, ingurumen-proiektuak bultzatzeari, Udalsarea Hitzarmena berritzeari, eta herri eta hirietako saneamendua eta arazketa hobetzeari buruz.

URA Uraren Euskal Agentziak udalerrien eskutik jarduten du, ubideak, ibaiertzak eta errekak lehengoratzeko, kontserbatzeko, berreskuratzeko eta ingurumena hobetzeko lankidetza-protokoloen bidez.

Era berean, partaidetza-prozesu bat irekitzea planteatu da toki-erakundeekin, hiri-erabilerako uraren ziklo integralari buruzko arautegiari, Plan Hidrologikoari eta uholde-arriskua kudeatzeko Planari ekiteko.

Arrantza- eta laket-portuak

Ekonomiaren Garapen, Jasangarritasun eta Ingurumen Sailera atxikitako Portuen Zuzendaritzak aurreikusi du esku hartzeak egitea, arrantza- eta laket-portuak hobetzeko jarduketen bidez kostaldeko udalerrietan eragina izango duten hobekuntzak eginez.

Horretarako, Mutriku, Bermeo, Hondarribia, Getaria, Lekeitio eta Ondarroa, Donostiako arrantza eta aisialdiko portuak hobetuko dituzte.

Elikadura

Tokiko eta sasoiko produktuak sustatzeko eta lehen sektoreari laguntzeko azokek eta merkatuek ere hainbat ekimen aipagarri dituzte.

EUDELek 2018ko urritik parte hartzen du Euskadiko Elikagaien Xahutzearen aurkako Plataforman, eta, beraz, haren lankidetza eta elkarrizketa garrantzitsuak izango dira hainbat ekintza gauzatzeko.

Tokiko merkatuek laster izango dute beren ordenantza. Ordenantza hori lantzen ari dira udalekin eta landa-garapeneko elkarteekin batera, eta Eudelek talde teknikoan parte hartuko du. Eta azpimarragarria da, halaber, Euskal Azoken Sarea ekimena, Gipuzkoan sortu baita, Euskadira zabaltzeko asmo argiarekin.

Udal guztientzako informazio-saioak apirilean

Ekonomiaren Garapen, Jasangarritasun eta Ingurumen Sailak eta EUDELen zuzendaritzak informazio-saioak koordinatuko dituzte Eusko Jaurlaritzak jarduera horiei buruzko informazio zehatza udal guztiei eman diezaien. Informazio-saioak apirilean egingo dira eta, EUDELen bidez, udalei behar besteko aurrerapenaz deituko zaie.

23.02.2021 Berriak

Gorka Urtaranek eta Josu Erkorekak Ertzaintzaren eta Euskadiko Udaltzaingoaren lehenengo prestakuntza-ikastaro bateratua inauguratu dute

Ikasleen % 31 emakumeak dira, eta proportzioa oraindik ere txikia bada ere, jauzi kualitatibo bat da emakumeek Euskadiko polizia-kidegoetan gaur egun duten presentzian
Izangaien % 90ek euskara eskakizunen bat egiaztatu dute
Prestakuntza erronka bat izango da Polizia eta Larrialdietako Euskal Akademiarentzat antolaketaren eta logistikaren ikuspegitik, COVID-19ak eragindako osasun-murrizketen ondorioz

Gorka Urtaran EUDELen elkarteburuak, Josu Erkoreka lehendakariorde eta Segurtasuneko sailburuarekin eta Andrés Zearreta Polizia eta Larrialdietako Euskal Akademiako zuzendariarekin batera, Ertzaintzaren eta Euskadiko Udaltzaingoaren lehenengo prestakuntza-ikastaro bateratuaren inaugurazioan parte hartu du gaur. Ekitaldi ofizialari hasiera eman aurretik, minutu bateko isilunea egin dute orain dela 21 urte hil zituzten Fernando Buesa politikariaren eta haren bizkartzaina zen Jorge Díez ertzainaren omenez.

Bere hitzaldian, Gorka Urtaranek Euskal Polizien lehen promozio bateratuaren emaitza izan den lankidetza instituzionala azpimarratu du. EUDELen elkarteburuak nabarmendu duenez, Udaltzaingoak eta Ertzaintzak pandemiaz erakutsi dute azken urte honetan zergatik diren funtsezko zerbitzuak herritarrentzat. Gorka Urtaranek adierazi duenez, euskal gizarteak bere poliziarengan konfiantza izan behar du, eta, beraz, “Euskal alkateen babes osoa duzue, Udaltzainak eta Ertzainak osasun-langileen funtsezko kolaboratzaileak zarete”, azpimarratu du EUDELen elkarteburuak.

Gorka Urtaranek azpimarratu duenez, Euskal Udalok harro zaudete, Eusko Jaurlaritzarekin batera lan eginez, Udaltzaingoen belaunaldi-erreleboan lagundu ahal izateaz. Ertzaintzarekin batera egiten den lehen promozioa da, udalerri guztietarako irizpide komun eta homogeneoekin prestatzen den lehena, edozein dela ere haien tamaina eta baliabideak. “Polizia gazte eta moderno, gero eta prestatuago, euskaldunago eta, batez ere, berdinzaleago baterantz aurrera egiteko beste urrats bat da. Zuek egungo gizartearen isla zarete, eta aurrerapen horren froga.” nabarmendu du Urtaran elkarteburuak

IKASTAROAREN HASIERA

Ikastaroari iaz deitutako eta egindako hautaproba guztiak gainditu dituzten 853 pertsonarekin emango diote hasiera, eta gaurtik aurrera 9 hilabeteko nahitaezko prestakuntza-aldia hasiko dute plaza lortu duten polizia-kidegoan sartu aurretik. Hautaketa-prozesu honetan 5.989 pertsonak eman zuten izena, eta horietatik 700 hautatu dituzte Ertzaintzako agente izateko eta 153 Euskadiko udaltzaingoetako agente izateko.

Horrela, hasi duten prestakuntza-aldi honetan ikasleek lansaria jasoko dute eta Euskal Poliziako agente gisa hasiko duten karrera profesionalari aurre egiteko beharrezko trebakuntza eskuratuko dute. Bederatzi hilabeteko ikastaro hau gainditzen dutenean, agente berriek praktikaldia hasiko dute plaza lortu zuten polizia-kidegoan. Sartzen diren polizia-kidegoko oinarrizko eskalaren arabera ordaindutako praktikak izango dira. Beste 12 hilabeteko iraupena izaten du praktikaldi horrek, eta gaindituz gero, agenteak karrerako funtzionario izatera pasatuko dira.

IKASLEEN PROFILA

Ikastaroa 853 pertsonak hasiko dute, eta horietatik 262 emakumeak dira eta 591 gizonak. Emakumeen proportzioa, % 31koa, oraindik ere txikia da, baina jauzi kualitatibo bat da emakumeen presentzian; izan ere gaur egun emakumeek Ertzaintzan duten presentzia % 14 ingurukoa baino ez da.

Lurralde historikoen arabera, Akademian prestakuntza hasiko duten gehienak bizkaitarrak dira (% 62), ondoren gipuzkoarrak (% 22) eta arabarrak (% 11). Gainerako % 5a Euskal Autonomia Erkidegotik kanpoko ikasleak dira.

Ikasle gehienek, % 90ek, hizkuntza-eskakizunen bat egiaztatuta dute: B1 (% 3,7), B2 (% 62,3) edo C1 (% 23,2), eta datu horiek erraztu egiten dute Eusko Jaurlaritzak ezarritako helburu estrategikoa, hau da, euskara harremanetarako ohiko hizkuntza izatea bai lanean bai herritarrei arreta ematean.

COVID-19

Gaur hasiko den ikastaroa pandemia globalaren ondorio diren prebentzio-neurriek markatuko dute. Berez, bai hautaprobak bai prestakuntza-aldia atzeratu egin ziren iaz pandemiaren ondorioz.

Ikastaroa erronka berezia izango da Polizia eta Larrialdietako Euskal Akademiarentzat, kutsatzea saihesteko protokolo zorrotzak sortu baitira. Esate baterako, ikasleak gehienez 20 pertsonako 39 taldetan banatuko dira. Arkauteko egoitzan presentzia fisikoa txandatu egingo da astero, eta presentziala ez den astean, beraz, taldeak online jasoko du prestakuntza.

Gainera, COVID-1ak Akademiaren aurrekontua 3,2 milioi euroan gehitzea eragin du prestakuntza-aldian pertsonen lansariei aurre egiteko, obrak egiteko eta guneak higienizatzeko beharrezko materiala erosteko, azpiegiturak distantzia berrietara egokitzeko, prestakuntza-gela birtualak abian jartzeko, eta abar.

BELAUNALDIEN ARTEKO TXANDA

Eusko Jaurlaritzak hitzeman du urtean hautaketa-prozesu bat deituko duela XII. Legegintzaldiko lau urteetan. Helburua Euskadiko poliziak ematen duen oinarrizko zerbitzu publikoa behar bezala betetzeko beharrezko eta behar adinako baliabideak bermatzea da. Gaur hasiko den ikastaro honekin aurrera egingo da Ertzaintzako eta Euskadiko udaltzaingoetako erroldak gaztetzeko eta belaunaldien arteko txanda bermatzeko konpromisoan.

23.02.2021 Berriak

Gorka Urtaranek parte hartu du hiri-mugikortasun jasangarriaren bigarren biltzarraren aurkezpenean

Bilboko Udalak eta Petronorrek Sum Bilbao 2021 Mugikortasunaren Nazioarteko Biltzarra egingo dute Bilbon, urriaren 6an eta 7an.

Bilbon, 2021eko otsailaren 23an. EUDELen elkarteburu eta Gasteizko alkateak parte hartu du, modu telematikoan, gaur goizean Azkuna Zentroan egindako ekitaldian. Aurkezpenaren buru Bilboko alkatea eta Petronorreko presidentea izan dira, Biltzarraren antolatzaile gisa. Gaurko ekitaldian ere izan dira BBKko zuzendari nagusia eta Rafael Sterling Irizarreko CEOa. Horiekin batera, modu telematikoan parte hartu dute Abel Caballero FEMPeko presidenteak, eta Francisco Iglesias Alsako CEOak.

Gorka Urtaranek azaldu duenez, EUDEL Itun Berde handi bat bultzatzen ari da, “Euskal Udalen Green Deal” delakoa, hirien eta herrien eraldaketa iraunkorraren protagonista izan daitezen.

Urtaran elkarteburuak azpimarratu duenez, “Euskal Udalok planetaren erronka nagusiekin konprometituta gaude: klima-aldaketa eta trantsizio energetikoa, garraio publiko modernoa eta pertsonei lehentasuna emango dien hiri-mugikortasuna”. Adibide zehatzen artean, Gasteizko alkateak bere hiriko “superetxadien” proiektua nabarmendu du, eta proiektu horren ardatza “espazio publikoa pertsonei ematea” dela adierazi du.
Gorka Urtaranen hitzetan, EUDELen eta Euskal Udalerrien konpromisoa haratago doa, “Gure gizartea bidezkoagoa, berdintasunezkoagoa eta kohesionatuagoa izan dadin, baita ekonomiak gure ingurune naturala oso presente izan dezan ere.”esan du Urtaranek.

Bilboko Adierazpena

Petronorrek eta Bilboko Udalak Hiri-mugikortasun jasangarriagorantz deritzon Bilboko Adierazpenaren bigarren urteurrena ospatu dute gaur goizean, Azkuna Zentroan antolatutako ekitaldian.

Bilboko Adierazpena SUM Bilbao Mugikortasunaren Nazioarteko Biltzarraren barruan sinatu zen, eta horren edizio berri bat aurkeztu dute gaur, urrian Bizkaiko hiriburuan antolatuko dena.

Bilboko Adierazpenean, garraio, automobilgintza zein energia arloetako enpresek beren gain hartu zuten diseinu eta ekoizpen-prozesuak pixkanaka-pixkanaka ingurumen-inpaktu txikieneko garraiobide jasangarri, seguru eta eraginkorretarantz bideratzeko konpromisoa. Halaber, tokiko gobernuek mugikortasun-eredu berriak garatzea ahalbidetuko duten arau-esparruak bultzatzeko konpromisoa hartu zuten, ingurumen-iraunkortasuna eta gizarte-ongizatea bermatzeko eta mugikortasun jasangarrian oinarritutako garapen sozioekonomikoa sustatzeko. Laburbilduz, trantsizio energetikoaren prozesua bultzatuko duen ibilbide-orria.

Bilboko Adierazpena SUM Bilbao mugikortasunaren nazioarteko lehen biltzarraren barruan sinatu zuten Bilboko Udalak, Petronorrek, FEMPek, EUDELek, Estrasburgoko Udalak, Mercedes-Benzek, BBKk, Ibilek, Alsak, Kapschek, Irizarrek, FCCk, Sacyrrek, Beazek, Red Eléctrica de Españak, AMETICek eta Energiaren Euskal Erakundeak (EVE).

SUM Bilbao 2021 Mugikortasunaren Nazioarteko Biltzarra

Bilboko Udalak eta Petronorrek gaur iragarri dutenez, urriaren 6an eta 7an antolatuko da Bizkaiko hiriburuan Mugikortasunaren Nazioarteko Biltzarraren edizio berri bat, SUM Bilbao 2021. Biltzar honetan mugikortasunarekin zerikusia duten gaur egungo gairik garrantzitsuenak jorratuko dira, mugikortasun jasangarriaren arloko eragile nabarmenen partaidetzari esker.

SUM Bilbaoren edizio berriak ondorengo arlo tematikoak izango ditu ardatz: batetik, trantsizio energetikoa, hidrogenoari lotutako aukerak, energia garbiak eta energiaren deskarbonizazioa. Bigarren ardatz tematikoa gobernantza eta finantzaketari buruzkoa izango da, hau da, klima-aldaketa arintzeko arau-esparruak eta aliantza publiko-pribatuak. Eta hirugarren ardatz tematikoan mugikortasuna, digitalizazioa eta berrikuntza izango dira aztergai. Izan ere, mugikortasun berria konektatua, irisgarria, planifikatua eta garraio publikoaren bidezkoa izatearen aldeko ikuspegitik aztertuko da.

www.sumbilbao.com

19.02.2021 COVID19

Informazio-saioa: NEXT GENERATION EU funtsak eta udalentzako aukerak

Martxoaren 4an,osteguna, 09:00etatik 10:30era, EUDELek webinar bat antolatu du udal politikarientzat eta teknikarientzat. Hiru helburu ditu: Europako Funtsen egoera azaltzea, deialdietara sartzeko prozedurari buruzko zalantzak argitzea eta tokiko proiektuak finantzatzeko aukerei buruzko informazio egonkorraren zerbitzu berria udalei aurkeztea.

Online jardunaldia (Webinar), euskal udaletako politikarientzat eta teknikarientzat bakarrik.

Eguna: martxoak 4, osteguna

Ordua: 09:00etatik 10:30era

Formatua: Webinar ZOOM saioaren bidez (udalek bakarrik eman dezakete izena).

Hizlariak:

Gorka Urtaran, EUDELeko elkarteburua.
Guillermo Dorronsoro, Management Board Advisor . Zabala Innovation Consulting.

Azalpena:

¿Nola lor dezake udal batek aukera hori bere proiektuak finantzatzeko? Izango al da deialdirik aurten? Nola antolatu, praktikan, aurrekontu osagarri horiek? Noiz jakingo da proiektu jakin bat NEXT GEN funtsen bidez finantzatu daitekeen?

18.02.2021 COVID19

Bizkaiko udalerriek aurreikusitakoa baino 13,2 milioi gutxiago itzuliko diote Udalkutxari

Gaur egin da Finantzetako Lurralde Kontseilua, eta bertan jakitera eman da Bizkaiko udalek 2020ko ekitaldiari dagokionez zenbat zor dioten Udal Finantzaketarako Foru Funtsari, batez ere Covid-19aren pandemiak eragindako krisi ekonomikoaren testuinguruagatik.

Udalek 2022an eta 2023an (% 50 urtero) itzuli ahal izango dute 2020an sortutako 45,9 milioi euroko likidazio negatiboa.

Bizkaian, 2021eko otsailaren 18an. Gaur Bilbon egindako Finantzetako Lurralde Kontseiluak jakitera eman du zein den Bizkaiko udalerriek Udalkutxari itzuli beharko dioten azken zenbatekoa, hau da, Bizkaiko udalek tributu itunduen bilketan parte hartzeko erabiltzen duten Udal Finantzaketarako Foru Funtsa.

Azkenik, Bizkaiko Lurralde Historikoko udalek 45.965.138 euro itzuli beharko dituzte Udalkutxak iaz egindako likidazio negatiboagatik, diru-bilketaren jaitsieraren ondorioz. Joan den urrian Finantzetako Lurralde Kontseiluak aurreikusitakoa (59,9 milioi euro) baino 13.235.977 euro txikiagoa da kopuru hori.

Udalen finantza-egoera errazteko, Bizkaiko Foru Aldundiko Gobernu Kontseiluak erabaki zuen zenbateko horren itzulketa 2022 eta 2023 ekitaldietara geroratzeko aukera ematea, hau da, % 50 ordaintzea urtero. Gaurko Finantzetako Lurralde Kontseiluan, itzulketa modu horretan egiteko funtsezko alderdiak jorratu dira.

Finantzetako Lurralde Kontseiluari buruz

Hamar kide ditu Bizkaiko Finantzetako Lurralde Kontseiluak, eta haietatik bost EUDEL-Euskadiko Udalen Elkarteko ordezkariak dira, alegia, eta agintaldi honetan udal hauetakoak dira ordezkariok: Bilbo, Fruiz, Larrabetzu, Plentzia eta Portugalete.

Beste bost kide ere baditu Kontseiluak, Bizkaiko Foru Aldundikoak dira; besteak beste, Kontseiluaren presidentea eta Herri Administraziorako eta Erakunde Harremanetarako foru-diputatua.

Bizkaiko Finantzetako Lurralde Kontseilua gutxienez urtean bitan biltzen da, Herri Dirubideen Euskal Kontseiluaren bileren ondoren. Bizkaiko udalen eta Foru Aldundiaren arteko partaidetza- eta koordinazio-organoa da, eta udal finantzaketaren banaketa egokia bermatzen du Bizkaiko Lurralde Historikoan.

18.02.2021 Berriak

6.671 pertsonak eman dute izena Euskadiko polizia-kidegoen deialdi bateratuan

Aurreko hautaketa-prozesuan baino % 11,4 gehiagok.
Gora egin du Ertzaintzan edo Euskadiko udaltzaingoetan sartu nahi duten emakumeen kopuruak ere, % 21, hain zuzen ere
Enplegu publikoaren eskaintza 751 plazak osatzen dute: Ertzaintzako oinarrizko eskalako 700 agente plaza eta Euskadiko 18 udaletako udaltzaingoetako 51 plaza dira
Lehenengo probak udaberrian egingo dira Barakaldoko BECen

6.671 pertsonak eman dute izena Ertzaintzako eta Euskadiko udaltzaingoetako deialdi bateratuan, Euskadiko polizia-kidegoetarako iaz deitu zen hautaketa-prozesuan baino % 11,4 gehiagok. 6.671 pertsona horiek Ertzaintzako oinarrizko eskalako 700 plazetako bat edo Euskadiko 18 udalek euren udaltzaingoetarako eskainitako 51 plazetako bat lortzen saiatuko dira.

Datuen genero-ikuspegia kontuan izanda, hautaketa-prozesu honetan izena eman duten gehienak, % 70,3 (4.691) gizonezkoak dira, baina garrantzitsua da azpimarratzea % 21 egin duela gora emakumeen kopuruak aurreko deialdiarekin alderatuta: 344 emakume gehiago.

Lurraldez lurralde, Euskadin bizi diren eta izena eman duten hautagai gehienak bizkaitarrak dira, % 59 (3.931), alegia; Gipuzkoakoak % 19,7 dira (1.311) eta, azkenik, Arabakoak % 13,1 (877). Gainerakoak, % 8,3 (552) Euskal Autonomia Erkidegotik kanpora bizi dira, eta zifrak behera egiten jarraitzen du aurreko urteekin alderatuta.

Hautagai gehienak, ia % 60, 20 urtetik 30 urtera bitartekoak dira, baina asko dira, % 24, alegia, 30 urtetik 35 urtera bitartekoak ere. Hautaketa-prozesu honetan izena eman dutenen artean gutxienak dira 20 urtez azpikoak eta 35 urtetik gorakoak. Hala ere, ertzain edo udaltzain izan nahi dutenen artean, iazko datuekin alderatuta, 20 urtez azpikoen taldea da gehien igo dena.

751 PLAZA

Eusko Jaurlaritzaren kalkuluen arabera, hautaprobak udaberrian egingo dira Barakaldoko Bilbao Exhibition Centren. Hautagaiek, oraingoz, 751 plaza lortu ahal izango dituzte. Baina zifra hori oraindik behin-behinekoa da, hautaketa-prozesua zabaldu baitaiteke datozen hilabeteetan:

700 plaza XXX. Promoziorako dira. Helburua da Legegintzaldi honetan zehar, 2021etik 2025era bitartean, 4 hautaketa-prozesu deitzea, urtean bat.
Udaltzaingoetako plazak 51 dira, eta honako udal hauetarako dira: Azkoitia, Basauri, Bermeo, Bilbo, Donostia, Durango, Etxebarri, Getxo, Hondarribia, Irun, Laudio, Lekeitio, Pasaia, Portugalete, Tolosa, Vitoria-Gasteiz, Zarautz eta Zumaia.

HELBURU HIRUKOITZA

Eusko Jaurlaritzak eta EUDELek lehentasunezko hiru helburu ezarri dituzte Euskadiko polizia-kidegoetan sartzeko deialdi bateratu honetarako:

Euskadiko poliziak ematen duen oinarrizko zerbitzu publikoa behar bezala betetzeko beharrezko eta behar adinako baliabideak bermatzea. Deialdi honekin aurrera egingo da belaunaldien txanda eta erroldak gaztetzea bermatzeko konpromisoan.
Emakumeak deialdi honetara aurkez daitezen sustatzea, emakumeek erroldetan duten presentzia eskasa zuzentzeko. Emakumeen eta gizonen berdintasunean aurrera egiteko konpromisoa da, baina baita zerbitzu publikoa hobetzeko konpromisoa ere, esate baterako delitu matxisten biktimak artatu behar direnerako.
Polizien erroldaren % 100 euskalduna izateko azken helburura iristeko bidean aurrera egitea, euskara harremanetarako ohiko hizkuntza izan dadin, bai laneko hizkuntza gisa bai herritarrei arreta emateko hizkuntza gisa.

DOKUMENTAZIO DESKARGATU

POLIZIA ETA LARRIALDIETAKO EUSKAL AKADEMIA

Oraingoan ere, Polizia eta Larrialdietako Euskal Akademia ari da prestatzen Ertzaintzako eta Euskadiko udaltzaingoetako agente berrientzako deialdi, hautaketa eta prestakuntza prozesu berri hau, eta gauzatu ere akademiak egingo du. Prozesu konplexua, zorrotza eta integrala izaten da, eta izena emateko epea irekitzen denean hasten da eta agente berriak behin betiko karrerako funtzionario izatera iristen direnean amaitzen da. Prozesuak pare bat urte irauten ditu, eta hiru une garrantzitsu izaten ditu:

Hautaketa-prozesua: izen-ematea, kanporaketa-proba guztiak egitea eta agiriak eta merezimenduak egiaztatzea.
Prestakuntza-fasea: hautaketa-prozesua gainditzen duten izangaiek 9 hilabeteko ikasketa-prozesua, ordaindua, hasten dute, eta Arkauteko instalazioetan egiten da.
Praktikaldia: aurreko bi faseak gainditu ondoren, agenteek praktikaldia hasten dute Euskadiko Poliziaren kidegoetan lortzen duten plazan. Sartzen diren polizia-kidegoko oinarrizko eskalaren arabera ordaindutako praktikak izaten dira. Beste 12 hilabeteko iraupena izaten du praktikaldi horrek, eta gaindituz gero, agenteak karrerako funtzionario izatera pasatzen dira.

Deialdi hau erronka berezia izango da Polizia eta Larrialdietako Euskal Akademiarentzat, une hauetan dugun osasun-krisi globalaren ondorioz egoera zalantzazkoa baita. Pandemia-egoeraren eta birusa hedatzea geldiarazteko neurrien ondorioz, kutsatzea eragozteko protokolo zorrotzak sortu behar izan dira eta Akademiaren aurrekontua 3,2 milioian gehitu da prestakuntza-garaian lansariak ordaintzeko, obrak egiteko eta eremuak higienizatzeko beharrezko materiala erosteko, azpiegiturak distantzia berrietara egokitzeko, prestakuntza-gela birtualak abian jartzeko, eta abar.

16.02.2021 COVID19

EUDELek udalen datuak bilduko ditu Udaltzainen eta Etxez Etxeko Laguntza zerbitzuko langileen txertaketa planifikatzeko

Osasun Sailarekin koordinatuta, gaur arratsaldean bertan EUDELek idazki bat bidali die udalei laguntza eske, Osakidetzaren txertaketa-prozeduran sartuko diren funtsezko udal-zerbitzuetako bi kolektiboei buruzko datuak emateko.
Udalek otsailaren 22ra arteko epea dute 55 urte edo gutxiagoko profesionalei buruzko informazioa bidaltzeko; Astra Zenecaren lehen dosia jasoko dute horiek. 55 urtetik gorakoei Pfizer txertoa jarriko zaie beste prozesu paralelo batean, txertatze-protokoloei jarraikiz.
Osasun Sailak, txertoen eskuragarritasunaren arabera, zuzenean jakinaraziko die aipatutako kolektiboei, noiz hasiko den txertaketa Osakidetzako zerbitzuen bidez.

Bilbo, 2021eko otsailaren 16a. Aurreko kasuan bezala PCR testa egiteko, EUDELek lankidetza eta koordinazio egonkorrean jarraitzen du Osasun Sailarekin, birusaren aurrean lehen lerroan lan egiten duten udaletako funtsezko zerbitzuetako kolektiboen beharrei erantzuteko.

Gaur arratsaldean bertan, EUDELek Gorka Urtaran elkarteburuaren gutun bat bidali die Euskadiko udalerrietako alkate guztiei. Gutun horretan, haien laguntza eskatzen da Udaltzaingoko agenteen eta Etxez etxeko Laguntza Zerbitzuko (ELZ) langileen plantillei buruzko datuak biltzeko, baldin eta 55 urte baino gehiago ez badituzte, eta Astra Zenecaren txertoa jasotzeko hurrengo funtsezko zerbitzu-kolektibo izango direlako. 55 urtetik gorako profesionalei Pfizer txertoa jarriko zaie, dosi nahikoak daudenean.

Euskadiko Babes Zibileko Planaren Aholku Batzordean egiten duen lanaren esparruan, EUDELek udalekiko solaskide gisa jarduten du. Udalerri bakoitzean datuak biltzea errazteko, bi Excel fitxategi bidali zaizkie, bata Udaltzaingoarentzat eta bestea ELZrentzat. Udalek fitxategi horiek bete eta Osasun Sailera bidali behar dituzte zuzenean. Udalerriek otsailaren 22ra arte (astelehena barne) izango dute eskatutako informazioa emateko aukera.

Jasotako datu guztiekin, Osakidetzak txertaketa-prozedura planifikatuko du. Osasun Saila jarriko da zuzenean kolektibo horretako kideekin harremanetan, egun zehatzak jakinarazteko, txertoen eskuragarritasunaren arabera eta Osakidetzako txertaketa-taldeek ezarritako prozedurari jarraikiz (gripearen prozesuaren oso antzekoa da).

Udal bakoitzak Excel fitxan bete beharreko informazioa pertsona bakoitzaren datu indibidualizatuak dira, udaltzainen nahiz ELZko langileen kasuan. Identifikazioa eta kontaktu pertsonala dira, baita, azken 6 hilabeteetan COVID-19a diagnostikatu ote dieten ere.

Bi kolektiboetako kideei Osakidetzako txertaketa-taldeetako kideek jarriko dizkiete txertoak udalerri guztietan, hiru hiriburuetan izan ezik; izan ere, udalen laneko prebentzio-zerbitzuko kideek txertatuko dituzte hiriburuetako udaltzainak eta suhiltzaileak.

Udaltzainen eta ELZko profesionalen datuak

Euskadiko Udaltzainen gaur egungo plantilla 3.300 agentek osatzen dute, gutxi gorabehera. Guztira, 81 euskal udalerrik dute Udaltzaingoa; gainera, beste 16 udalerritan, udaltzain-zerbitzua daukate.

ELZri dagokionez, kolektiboa 3.200 profesional ingurukoa da, eta hiru lurraldeetako udalerri guztiak hartzen ditu.

Osasun Sailaren txertaketa-irizpide orokorrak

Eusko Jaurlaritzaren Osasun Sailak adierazi duenez, COVID-19ari aurre egiteko herritarrak txertatzeko erabilgarri dauden dosien eskasia dagoenez, lehentasuneko pertsonak eta taldeak ezarri dira. Lehentasun-irizpide orokorrak Osasun Sistema Nazionalaren Lurralde arteko Kontseilutik datoz, eta hauek dira: zaurgarritasuna eta kutsatzeko arriskuaren aurreko esposizioa, betiere, ekitatearen zeharkako printzipioa errespetatuz. Udaltzainen eta ELZko profesionalen kolektiboei dagokienez, kontuan izan den funtsezko irizpidea hau da: kutsatzeko arriskuaren esposizioa eta txertoen erabilgarritasuna. Irizpide horiek direla-eta, Osasun Sailak lehentasuna eman dio Astra Zenecaren txertoak adierazitako kolektiboei (Udaltzaingoa eta ELZ) jartzen hasteari, bai eta multzo bereko beste batzuei ere (Ertzaintza, suhiltzaileak…).

Astra Zeneca txertoa bi ezaugarrik bereizten dute beste bi txertoengandik (Pfizer eta Moderna):

Oraingoz, ez dira erabili behar 55 urtetik gorako pertsonengan, ez adin horietarako seguruak ez direlako, baizik eta oraindik ez dagoelako ebidentzia zientifikorik eraginkortasun-maila bera dutela egiaztatzeko. Txertoa 55 urtera arteko pertsonei eman dakieke, baita 55 urtera artekoei ere.
eta 2. dosien arteko denbora (10-12 aste) askoz luzeagoa da beste bi txertoen aldean (3 aste Pfizer, eta 4 aste Moderna).

Osasun Sailaren informazio hori oinarri hartuta, Pfizer edo Moderna kolektibo horientzat erabiltzeak ekarriko luke asko atzeratzea lehen dosiaren inokulazioa; aitzitik, Astra Zenecaren eskuragarritasuna berehalakoa da. 55 urtetik gorako profesionalei Pfizer txertoa jarriko zaie, nahikoa dosi daudenean. Hala ere, Osasun Sailak aurreikusten du 55 urtetik gorakoen taldearen immunitate maximoa lortzea 55 urteko eta adin txikiko pertsonen denboran hurbilekoa izan daitekeela; izan ere, asmoa da Pfizerren lehen dosiak inokulatzea Astra Zenecaren bigarren dosiak inokulatu baino bizpahiru aste lehenago.

16.02.2021 COVID19

Covid-Neurri orokorrei eta Kirolari buruzko galdera-erantzunak (otsailak 15)

Lehendakariaren 7/2021 Dekretuak ezartzen dituen neurriei buruzko otsailaren 15ean eguneratutako dokumentua: “Ohiko galderen erantzunak. Koronabirusari aurre egiteko neurri zehatzak”.

Herritarren zalantzak, orain arte egin den bezala, ZUZENEAN herritarrentzako zerbitzuaren bidez bideratuko dira: https://www.euskadi.eus/eusko-jaurlaritza/zuzenean-herritarrentzako-zerbitzua/

Era berean, “Jarduera fisikorako eta kirolako jarraibideak” argitzeko dokumentu eguneratua erantsi da. Kasu honetan, hau da Udalen kontsultak zuzentzeko helbide elektronikoa: kirolak@euskadi.eus

Berriak

Azken berriak