Nabarmenak

12.07.2018 Nabarmenak

EUDELek gaur egin du Vitoria-Gasteizen 2018ko Ohiko Batzar Nagusia

Vitoria-Gasteiz, 2018ko uztailaren 12a.

Euskadiko udalerrietako alkateak Vitoria-Gasteizen bildu dira gaur EUDELen Ohiko Batzar Nagusia egiteko; aurten, Arabako hiriburuko Europa Jauregian izan da.

Batzarra EUDELen elkarteburua eta Getxoko alkatea den Imanol Landaren gidaritzapean egin da, eta harekin mahaian egon dira Irungo alkatea, Jose Antonio Santano, eta Errenteriako alkateordea, Garazi López de Etxezarreta, biak Euskadiko Udalen Elkartearen elkateburuordeak.

Bileran garrantzitsua izan da, halaber, EUDELen Batzorde Eragilearen gainerako kideak ere egon izana, baita Vitoria-Gasteizko alkatea, Gorka Urtaran, eta, Bilbokoa, Juan Mari Aburto ere. Donostia/San Sebastiángo alkateak Jaime Dominguez-Macayaren esku utzi zuen bere jarduera.

2018ko Batzarrak Euskadiko Udalen Elkartearen jardueraren balantzea egiteko balio izan du, eta, halaber, udaletan lehentasun diren gaiak gogoratzeko; aldi berean, legealdiko azken txanpa da, ikasturte politikoa amaitu aurretik, eta gero 2019ko udal- eta foru-hauteskundeetara abiatuko da. Etorkizun hurbileko erronkei dagokienez, Euskadiko Toki Erakundeei buruzko Legea (ETEL) jorratu da, indarrean jarri zenetik bi urte pasatu ondoren.

Bilera, gaur, goizeko 11:00etan hasi da, Gorka Urtaran alkate anfitrioiaren ongietorri-hitzaldiarekin. Ondoren, EUDELen elkarteburuak, Imanol Landak, eguneko gai-zerrendaren puntuak aurkeztu ditu, eta, horien artean, Elkartearen aurrekontua onartu da, 2018ko ekitaldiari dagokiona. Zehazki, 2.958.769 eurokoa izan da guztira EUDELen funtzioak garatzeko zenbatekoa, eta funtzio horiek dira, hala nola, EAEko udal guztiei aholkularitza tekniko-juridikoa eskaintzea eta udal-kudeaketari laguntzeko zerbitzuak ematea.

Imanol Landa elkarteburuak berak Batzarreko kideei jakinarazi die EUDELen zerbitzu-eskaintza berria: aurten, beste behin ere, asmoa da udal txikiei emandako laguntza sendotzea (haiekin egon eta laguntzarako tresnak eman), eta, gainera, udal guztientzako dokumentu-ereduak egin dira, zeinak erreferentziazko ereduak izango diren Euskadiko udalerri guztietarako, orokorrean. Adibidez, Izapideen Eskuliburuak, kudeaketa elektronikora pasatu aurretik, eta Kontratazioko Baldintza-agiriak, Sektore Publikoaren Kontratuen Lege berriari egokitutakoak. Berdintasunaren arloan, eta Emakunderekin lankidetzan, aurten prozedura komuna egin da, uda-arauetan genero-inpaktuari buruzko ebaluazioak egiteko. Urtearen bigarren seihilekoan diseinatuko dira genero-indarkeriako erasoei aurre egiteko aholku-gidak nahiz tokian-tokiko erantzuna emateko eta prebenitzeko protokoloak.

Zenbait arloren artean, EUDELen 2018ko jarduera-balantzean gai hauek azpimarratu dira: tokiko berrikuntza, kudeaketa elektronikoa bultzatzea eta interoperabilitatea oinarri duena; lurralde bakoitzean Gizarte Zerbitzuen Mapak hedatzea; euskararen sustapena udaletan, edo funtzio publikoa, tokiko erakundeen langileentzako ‘Udalhitz’ hitzarmenaren negoziazio kolektiboarekin.

Aldi berean, EUDELek jarraitzen du udalen arteko sareak sendotzen, adibidez Berdinsarea, berdintasun arloko langile teknikoentzat, edo Basqueskola, Euskadiko emakumezko alkate eta zinegotzientzat; horrekin batera, Europan lankidetza-proiektuak bultzatzea, esaterako, Gobernantza onaren arloan Europako Kontseiluarekin egiten dena (ELoGE Zigilua), edo Europako Herrien eta Eskualdeen Batzordearen (CMRE) kide gisa, eta horrek aukera eman dio EUDELi, Bilboko Udalarekin batera, “Berdintasuna, Dibertsitatea eta Inklusioa” konferentzia antolatzeko, ekainaren 11tik 13ra.

08.06.2018 Nabarmenak

Bilbok Europa osoko udalerriak hartuko ditu elkarrekin tokiko berdintasun, inklusio eta aniztasun politiken etorkizuna diseinatzeko

Bilboko Udalak eta EUDELek Europako Udal eta Eskualdeen Kontseilua (CEMR) hartuko dute ekainaren 11tik 13ra. Bertan, 500 alkate, tokiko zein eskualdeko lider, Europako entitate eta nazioarteko erakunde bilduko dira

40 herrialde baino gehiagoko ordezkariak etorriko dira, gehienak Europatik, baina beste kontinente batzuetatik ere bai, Amerika, Afrika eta Asiatik, esaterako Ordezkaritzarik anitzenak Alemania, Suedia, Belgika, Frantzia eta Finlandiatik etorriko dira, berdintasun zein gizarte-ongizatearen politiketan aurreratuenak diren horietatik, alegia
Bilboko konferentzia Europako etorkizunari buruzko eztabaidaren erdigunean dago, eta Europako gizarte-paisaia eraldatzeko mugarri berri bat markatzea du xede, herritarrengandik hurbilen dauden eta pertsonei zuzentzen zaizkien politiketatik abiatuta

Hiru gaiak uztartzea izango da ekarpenik berritzaileena. Horrela, pertsona guztientzako berdintasunezko askotariko udalerri inklusiboagoak garatuko dira, desberdintasunetatik harago Europako hiru balio nuklearrak gurutzatu behar dira, ezinbestekoak baitira ongizatean, bizikidetzan eta gizarte-kohesioan aurrera egiteko

Programak 33 saio, mahai-inguru eta tailer izango ditu, paraleloan, eta Europako herrien artean esperientziak eta jardunbide egokiak partekatzeko aukera bikaina izango da. Gainera, kongresuko saio guztien erdia hartuko dituzte euskal esperientziek.

Iñigo Urkullu lehendakariak hilaren 11n, astelehena, inauguratuko du konferentzia. Orduan, Rigoberta Menchú Bakearen Nobel saridunaren hitzaldia antolatuko da. Amaitzeko, ekainaren 13an, konferentziako ondorioei buruzko dokumentua aurkeztuko da

Bilbon, 2018ko ekainaren 1ean. Juan Mari Aburto Bilboko alkateak, Imanol Landa EUDELeko elkarteburuak eta Frédéric Vallier CMREko idazkari nagusiak, hau da, hiru antolatzaileek, Europako udalerrien eta eskualdeen hurrengo konferentziaren saioen programa eta helburuak aurkeztu dituzte gaur goizean, udaletxeko Areto Arabiarrean. Konferentzia Bilboko Euskalduna Jauregian egingo da ekainaren 11tik 13ra, eta“Berdintasuna, Aniztasuna eta Inklusioa. Desberdintasunek batzen gaituzte!” izango du izenburu.

INFORMAZIO OSOA PRENTSA-OHARRAN

Konferentziako EGITARAUA : www.cemrbilbao2018.eu #cemrbilbao2018

Juan Mari Aburto Bilboko alkateak konferentzia Bilbon egin izanaren inguruko balorazioa egin du: “Aukera paregabea da nazioartean hiri ireki, konprometitu, kohesionatu eta solidario gisa gure lekua lortzen jarraitzeko, hala baikara eta gero eta gehiago izaten jarraitu nahi dugu.Desberdintasunek mesede egiten gaituzte, hobeagoak izan gaitezen, indartsuagoak. Aniztasunaren alde egin behar da apustu, eta kudeatu. Ez bakarrik erakundeetan eta gizarte zibilean, baita enpresaren eremuan ere. Enpresa ezberdinenak, gizartearekiko ardura dutenak, lehiakorrenak izaten dira, hau da, balio gehien sortzen dutenak.”

Juan Mari Aburtok, gainera, hauxe nabarmendu nahi izan du: “Berdintasuna, aniztasuna eta inklusioa funtsezko balioak dira Europako udalerri eta eskualdeen artean Europa hobeago bat eraikitzeko, bidezkoagoa, inklusiboagoa eta gizatiarragoa. Hain zuzen ere, horixe da Bilbon nahi duguna: gizarte hobeago bat eraikitzen laguntzeko beharrezkoak diren balioak eta tresnak garatzen jarraitzea”, gehitu du.

Imanol Landa EUDELeko elkarteburuak honako hau nabarmendu du: “Bilboko 2018ko konferentzia aukera aparta da Europako udalerriok gure esperientziak eta jardunbide egokiak partekatzeko, eta ideia berritzaileak geureganatzeko elkarrekin berdintasunerako, inklusiorako eta aniztasunerako politikak lortze aldera, Europan komunak diren irizpideekin.”

Lortutakoaren arrakastari dagokionez, Imanol Landak udalerrietako elkarteetako lanaren garrantzia nabarmendu du: “funtsezko eragileak dira sarean lan egitea errazteko eta udalen artean irtenbide bateratuak bilatzeko orduan, eta tokiko errealitate desberdinetik herritar guztien bizi-kalitatean eta ongizatean aurrera egiteko helburua partekatzen dute”.

Frédéric Vallier Europako Udal eta Eskualdeen Kontseilua CEMRko idazkariak hauxe azaldu du: “CMREk berdintasunean, aniztasunean eta inklusioan duen eginkizuna funtsezkoa da. Gaur egun, 1.700 udalerri eta eskualde baino gehiago konprometitu dira bidezkoagoak diren gizarteak lortzeko gure Emakumeen eta Gizonen arteko Berdintasunerako Europako Gutunaren bidez. Alabaina, komunikabideetan gogorarazten digutenez, bide luzea dugu egiteko pertsona guztiak benetan berdinak diren gizarteak lortzeko, generoa, etnia, sexu-orientazioa edo desgaitasuna gorabehera.

Honekin lotuta, Frédéric Vallier azpimarratu nahi izan du ekitaldiaren helburua: “Konferentziarekin ziurtatu nahi dugu tokiko politikak giza eskubideen errespetuan oinarritzen direla, garapen jasangarrirako helburuekin bat. Mundua aldatzen ari da. Gure herritarrentzat aldaketak merezi izatea lortu behar dugu”.

CMREk, Bilboko Udalak eta EUDELek nazioarteko hitzaldi estimulatzaile eta irakasgarri bat antolatu nahi dute, non Europako udalerrien ordezkaritza handi eta heterogeneoa bilduko den. Europako 40 herrialde baino gehiagoko eta munduko beste toki batzuetako (Amerika, Afrika edo Asia) 500 parte hartzaile eta iristea espero da: tokiko zein eskualdeko ordezkari hautetsiak, Europako erakundeak, estatu-gobernuak, akademiaren munduko pertsonak eta konferentziaren gaiaren inguruan lan egiten duten gizarte zibileko partner direlakoak.

Udalerriak, gizarte-prozesuen eraldaketa sortu eta barne hartzeko duten gaitasuna kontuan hartuta, demografia-, gizarte- eta jarrera-aldaketen nukleoak dira. Inoiz baino gehiago sortzen ari dira orain, sormena eta aukerak sustatzeko espazio gisa.

Konferentzian tokiko gobernuak berdintasun, inklusio eta aniztasunaren alorrean ezartzen ari diren ekintzak azalduko dira, bai eta nola “gurutza” daitezkeen herritar guztien bizi-kalitateari eta ongizateari mesede egiteko, euskal udalerrientzako eta Europa osoko udalerrientzako erronka partekatua dena.

Konferentziaren programa hiru egunekoa izango da eta, guztira, 33 saio eskainiko dira. Horietako asko paraleloan egingo dira, hala nola hausnartzeko eta eztabaidatzeko mahai-inguruak, jardunbide egokien tailerrak eta hiria ezagutzeko kanpoko bisitak, Bilboko Udalak eta tokiko entitate eta eragileek lekuan bertan nola lan egiten duten ikusteko.

UDALERRIEN ARTEKO LOTURAREN SINBOLOA

Bilbo Europako udalerri eta eskualdeen Konferentzia garrantzitsuaren egoitza bihurtzeko hitzarmena CMREren Zuzendaritza Batzordeak sinatu zenMaastricht-en, 2016ko abenduaren 12an, Europar Batasunaren Tratatuaren 25. urteurrenaren egunean, hain zuzen ere.

Europako Udal eta Eskualdeen Kontseilua (CEMR) Europako tokiko, lurraldeetako eta eskualdeko gobernuen ahotsa da. Erakundea Europako Kontseiluaren mende dago, eta 150.000 autoritate publiko baino gehiago ordezkatzen ditu. Horietatik, 130.000 tokiko gobernuak dira, eta 41 herrialde desberdinetako 62 elkartetan biltzen dira. EUDEL (Euskadiko Udalen Elkartea) erakunde horien artean dago, eta Konferentziaren antolatzaileetako bat da Bilboko Udalare

20.03.2018 Nabarmenak

Bost udalek -Irun, Urnieta, Basauri, Ermua eta Leioa- Gobernantza bikaintasuneko Europako zigilua lortu dute

EUDELek eta Europako Kontseiluak sustatu dute proiektu pilotu bat. Bertan, bederatzi udalek euren maila neurtu dute, kalitate eta eraginkortasun demokratikoari dagokionez. Neurketa Gobernantza Onaren hamabi printzipioetan oinarrituta eta ebaluaziorako 97 adierazleren bitartez egin da.

Horrenbestez, bost Euskadiko udalak Gobernantza onaren arloko abangoardiako bereizgarri hau daukaten Europako lehen 200 udalen artean sartu dira.

Parte hartu duten gainerako lau udalek (Beasain, Elgoibar, Galdakao eta Mungia) euren konpromisoa berriztu dute, etengabeko hobekuntzarako eta praktika onak elkartrukatzeko tresna honekin.

Sortu duen interesa ikusita, proiektua Europako zigilua lortzeko hurrengo deialdiren batean parte hartu nahi duten udal gehiagori ere ireki zaie. Bigarren fase honetarako, EUDELek erakunde arteko ELoGEko batzorde bat eratu du, Eusko Jaurlaritzak eta foru aldundiak elkarrekin.

Donostia, 2018ko martxoaren 20a. Gaur goizean, Basauri, Leioa, Ermua, Irun eta Urnietako udalek Europako Kontseiluak ematen duen Gobernantzaren alorreko Bikaintasuneko Europako Zigilua (ELoGE) lortu dute. Zigilua emateko, gobernantza onaren 12 printzipioetan oinarritu dira: gardentasuna, herritarren parte-hartzea, portaera etikoa, eraginkortasuna eta efizientzia, finantza-kudeaketa osasungarria, berrikuntza, berdintasuna, giza eskubideak eta aniztasuna, besteak beste. Modu horretara, Euskadiko udalak Europako 200 udaleko talde txiki bati batu zaizkio (Estatuan bat bakarrik), non udalek aipatutako bereizgarria duten, abangoardiako posizioan egoteagatik, gobernantza onari eta kalitate demokratikoari dagokienez.

IMANOL LANDAREN HITZAK

PRENTSA OHARRA JEITSI

Zigilua EUDELek 2017an eta 2018an Gipuzkoako eta Bizkaiko 9 udaletan sustatutako proiektu pilotu baten amaierako aintzatespena da, aipatutako bost udalez gain, Beasainen, Elgoibarren, Galdakaon eta Mungian. Denek hartu dute euren gain, euren borondatez, 97 adierazletan eta bi galdeketatan oinarritutako autoebaluazio prozesu zorrotz bat egiteko konpromiso politikoa; galdeketetako bat gobernuko eta oposizioko zinegotzientzat izan da, eta bestea, herritarrentzat.

Donostiako Koldo Mitxelena aretoa agertoki izan da gaur goizean, 2017ko ELoGE Zigilua emateko ekitaldian: kristalezko dodekaedro bat, 12 printzipioen betetze-maila orokorrean kalifikaziorik altuena lortu duten bost udalak dira, adierazle bakoitzarentzat eskatutako puntuazioa beteta. Bost udalen alkateek saria jaso dute: Jose Antonio Santano (Irun), Mikel Pagola (Urnieta), Andoni Busquet (Basauri), Maria del Carmen Urbieta (Leioa) eta Carlos Totorika (Ermua). Peru Bazako, Erakunde Harremanetarako Sailburuordeak, eta beste Foru Aldundien ordezkariek parte hartu dute ekitaldian.

Ekitaldia EUDELeko elkarteburu Imanol Landak eta Europako Kontseiluko ordezkari Alina Tatarenkok gidatu dute, eta proiektu pilotuko eta proiektuan interesa duten beste hainbat udaletako ordezkari tekniko eta politiko ugari bertaratu dira.

Europako Zigiluaren xedea “tokiko eragileen ekintzak mobilizatu eta suspertzea” da, “herritarrek gobernantza on eta demokratiko batez goza dezaten, zerbitzu publikoak etengabe hobetuz, herritarren parte-hartzearekin eta espero bezalako ordezkari politikoekin”. (Helburu hau Europako Kontseiluaren 2007ko Valentziako Adierazpenean dago adierazita, eta 2010ean zigiluaren abiapuntu izan zen).

ELoGE Zigilua lortzeko hurrengo deialdiak

Lehenengo aldiz eman dute ELoGE Zigilua Euskadin, eta, sortu duen interesa ikusita, hemendik aurrera, aldizkako deialdiak egitea espero da. Horretarako, EUDELek lurralde plataforma bat sortu du Zigilua emateko eskumenarekin, eta, aurten, 2018an, udalen bigarren talde bat eratzea da asmoa, lanean has daitezen hurrengo deialdietan, urtero ahal baldin bada, banatuko den bereizgarria lortzeko.

Proiektuaren jarraikortasuna sendotu eta bermatzeko, ELoGErako erakunde arteko batzorde bat eratu da, EUDELeko, Eusko Jaurlaritzaren Gobernantza Publiko eta Autogobernu Saileko eta lurralde bakoitzeko foru aldundietako ordezkariek osatuta. Xede nagusia Zigilua merezi duten udal hautagaiak onartzea, sor daitezkeen gatazkak konpontzea, eta etorkizunerako hobekuntza planak aztertu eta horien jarraipena egitea izango da.

ELoGE Europako Zigilua ©EuropeanLabelforGovernance’ Excelence

Europako Zigiluak zerbitzu publikoak hobetzea bilatzen du, eta tokiko gobernuak aintzatesten ditu, kudeaketa politikoan euren praktikek duten kalitateagatik eta udalen kudeaketagatik, kanpo harremanei dagokienez, herritarrekin, bereziki.

Zentzu horretan, esaterako, iruzurrari aurre egiteko neurriak ebaluatzen ditu hainbat arlotan –kode etikoen edo jokabide kodeen bitartez–: kontratazio publikoa, baimenak eta lizentziak ematea, gardentasuna eta udaleko informazioaren eskuragarritasuna sustatzea, kontuak ematera bideratutako baliabideak, edota inklusio eta kohesio sozialaren garapen maila. Alderdi horiek guztiek tokiko gobernuen heldutasun maila adierazten dute, bai eta aipatutako helburuak betetzeko bertako ordezkari politikoek duten konpromisoa ere.

Zigilua aintzatespenerako eta etengabeko hobekuntzarako tresna da, inola ere ez tokiko erakundeak kontrolatzeko. 2 urteko denbora-tarte mugaturako emango da. Behin iraungita, Udalak ziurtagiria modu errazean berriztu ahal izango du, adierazleak modu egokiagoan betetzeko hobekuntza planak ezarriz.

Gobernantza Onaren 12 printzipioak

Valentziako (2017) eta Utrecheko (2009) adierazpenen markoan, Europako Kontseiluko 47 estatu kideetako ministroek Zigiluaren oinarri diren tokiko mailako Gobernantza demokratiko onaren 12 printzipio ezarri zituzten.

12 european principles: www.coe.int/good-governance

Hauteskundeak eta ordezkaritza eta parte-hartze bidezkoak
Erantzuteko gaitasuna
Efizientzia eta eraginkortasuna
Irekiera eta gardentasuna
Zuzenbide-estatua
Portaera etikoa
Eskumenak eta gaitasunak
Berrikuntzaeta aldaketaren aurrean irekita egotea

Jasangarritasuna eta epe luzerako orientazioa

Finantza-kudeaketa osasungarria

Giza eskubideak, dibertsitate kulturala eta kohesio soziala

Kontu ematearen beharra

13.02.2018 Nabarmenak

Udalen ordezkariek Herri Dirubideen Euskal Kontseiluaren urteko lehenengo bileran hartu dute parte

Eusko Jaurlaritzak, aldundiek eta udalek aurten Ekarpenen Lege berria adosteko konpromisoa hartu dute. Erakunde bakoitzaren finantziazio beharrizanei buruzko txosten bat egingo dute maiatzaren 31 baino lehen.

Vitoria-Gasteizen, 2018ko otsailaren 13an. Gaur arratsaldean, Herri Dirubideen Euskal Kontseiluaren urteko lehenengo bilera egin da; izan ere, aipatutako Kontseilua bilketa kopuruak aztertu eta herrialde osoko baliabideen banaketa erabakitzeko Euskadiko erakunde organo gorena da.

HDEK-k gaur, 2018ko otsailaren 13an, euskal ogasunen 2017ko bilketa berretsi du, aurretik jakinarazi izan zen bezala, 14.473,9 milioi eurokoa, iazkoa baino %11,8 gehiago. Hori, termino absolutuetan, 1.523 milioi euro dira.

Eudeleko Elkarteburuak datu hauek aldekoak direla esan du, “agertoki positibo” bat irudikatzen dutelako 2018ko egoera ekonomiko-finantzariorako, aurreko urteekin alderatuz, non udalek lurralde bakoitzaren foru funtsei dagozkien itzulketak direla-eta zailtasunei aurre egin behar izan dieten. Dena dela, Imanol Landak adierazi du “udaletako bilketaren inpaktua zein den benetan ezagutzeko, Finantzen Lurralde Kontseiluak beharrezkoak direla“. Hurrengo egunetan Gipuzkoa, Araba eta Bizkaian deituta daude, eta udal bakoitzaren banakako datuak xehetasun handiagoz aztertuko dituzte udal eta foru arduradunek, Foru Funtsei (FOFEL, Udalkutxa eta FFFM) 2017ko ekitaldirako dagokienean, eta tokiko mailan egoera zehatzago baloratzeko aukera emango dute.

18/02/13 Finantza Kontseiluak hartutako erabakiak (Iturria: EJ-Ekonomia eta Ogasuna)

Ekarpenen Lege berria, maiatzaren 31 baino lehen

Euskadiko erakunde guztiek hurrengo hilabeteetan Ekarpenen Lege berriari buruzko akordioa hartzeko konpromisoa hartu dute (2012tik atzeratzen ari da), urtea amaitu baino lehen testua Eusko Legebiltzarrera bidali ahal izateko.

Ogasun sailburu Pedro Azpiazuk astearte honetan eman du erabakiaren berri, Herri Dirubideen Euskal Kontseiluaren (HDEK) bileraren ostean. Bertan, Eusko Jaurlaritza, Bizkaiko, Gipuzkoako eta Arabako Foru Aldundiak eta EUDEL-Euskadiko Udalen Elkarteko ordezkariak daude.

HDEK-ko bileran, maiatzaren 31rako Euskadiko hiru erakunde mailetako (autonomikoa, forala eta udalekoa) finantziazio beharrizanei buruzko txosten bat onartzea erabaki da.

Testua, zeina Ekarpenen Legea aldatzearen aurreko pauso gisa egitea Euskadiko Toki Erakundeen Legeak erregulatzen baitu, egungo Ekarpenen Legea aldatuko duen araua egiteko oinarri izango da (2012tik atzeratzen ari da).

EUDELeko elkarteburu Imanol Landaren ustez, “oso lege garrantzitsua” da, Euskadiko erakundeen arteko diru-sarreren banaketa erregulatzen duelako, eta gogorarazi du arau horren gaineko erabakia hartzeak “udalen akordioa behar duela”, LTHren 28.10 artikuluak ezartzen duenaren arabera, akordio hori hiru foru ordezkariek eta hiru udal ordezkariek hartu behar dutelako, eta gehiengo osoa behar du (4 boto gutxienez).

Erlazionatutako albistea:“Udalen botoa ezinbestekoa da Ekarpenen Lege berrian”

Hiru lurraldeetako eta tamaina ezberdinetako udalak

HDEKn, udalek erakunde maila ezberdinekin batera parte hartzen dute, Eusko Jaurlaritzarekin eta hiru Foru Aldundiekin, alegia. Euskadiko Toki Erakundeen Legearen ostean, udalek aukeratutako hiru ordezkari dituzte Lurralde Historiko bakoitzeko, eta askotariko populazio-tamainako udalerrietakoak. Zehazki, hiru dira EUDELeko ordezkariak:

–Imanol Landa Jauregi, #Getxoko alkatea (Bizkaia) eta Eudeleko elkarteburua

– Josune Irabien, #Amurrioko alkatea (Araba)

– Eneko Maioz, #Orexako alkatea (Gipuzkoa)

14.11.2017 Nabarmenak

Herri Smartik jardunaldia: Gobernantza eta Udal Garapen Adimendunaren Estrategia 2017-2020

Euskadiko Udalen Elkartea Eusko Jaurlaritzarekin ari da lanean, Euskadi 2020 Agenda Digitala tokiko mailan hedatzeko; horrenbestez, marko horretan, ‘HERRI SMARTIK-udalerri adimendunak’ programa berria jaio da, udalei berrikuntza publikoan eta tokiko administrazioaren modernizazioan laguntzeko.

Ekintza-plan estrategiko honek lau laguntza-lerro eskaintzen dizkie udalei 2017-2020 aldirako: Administrazio elektronikoa, antolaketa-eraldaketa eta aldaketa kulturala sustatzea, Gobernantza ona garatzea eta lurralde/udalerri adimendunen (‘Smart Cities’) sareko sistema sortzea.

EUDELek ‘LURRALDEAK‘ sortuko ditu, politikariz eta teknikariz osatutako azpibatzorde-sarea. Udalen arteko topaguneak izango dira; bertan, behar zehatzak identifikatu, eta lurralde bakoitzaren tokiko errealitatearentzako erantzunak bilatuko dira.

www.herrismartik.eus webgune berriak gaurkotasuneko informazioa, gidaliburuak eta argitalpenak eskainiko ditu, bai eta Tokiko Esperientzien banku bat ere.

<iframe src=”https://player.vimeo.com/video/76979871?background=1″ width=”500″ height=”281″ frameborder=”0″ webkitallowfullscreen mozallowfullscreen allowfullscreen></iframe>

Bilbon, 2017ko azaroaren 14an. Gaur, goizean, EUDELek udal-langileentzako lantalde bat antolatu du, “Herri SmarTIK-udalerri adimendunak” tokiko berrikuntza ekintza-plana ezagutarazteko. Plana EUDELek eta Eusko Jaurlaritzak antolatu dute, hurrengo urteetan ‘Euskadi 2020 Agenda Digitala’ EAEko udalerrietan sustatzeko. Agenda Digitalaren programa berriak herrialde mailako tokiko estrategia adimendun bat garatzea dakar, udalen parte-hartze aktiboan oinarrituta eta hiru lurraldeetako Foru Aldundiek lagunduta.

Prentsa Dossierra
Jeitsi

50 politikari eta teknikariren aurrean, Imanol Landa elkarteburuak eta EUDELeko Berrikuntza Batzordeko alkateek (Elgoibar, Ermua, Larrabetzu eta Zambrana) lau ekintza-lerro garrantzitsuenak aurkeztu dituzte, udalei, tamaina eta abiapuntua edozein delarik ere, tokiko euskal administrazioa modernizatzen laguntzeko. Honen bidez egingo da: 1) antolaketa-eraldaketa eta aldaketa kulturala 2) administrazio elektronikoa 3) Gobernantza ona eta etorkizunari begirakoa, 4) ‘lurralde/udalerri adimendunen’ sistema sarean.

Ekitaldiaren hasieran, EUDELen elkarteburuak esan duenez, “Udaletan, BERRITZEAK esan nahi du udal kudeaketa herritarrentzako, udalerrietan jarduera ekonomikoa sortzen duten enpresentzako eta, orokorrean, gizarte osoarentzako emaitzarik onenak lortzera bideratzea”. Imanol Landa Getxoko alkatearen ustez, “berrikuntza publikoak hirietako kudeatzaileen eta bertako bizilagunen arteko harremana estutzeko balio du. Teknologia modu “adimendunean” erabiltzean, mesede egingo zaie tresna eta kanal berriei; horien bidez, herritarrek modu aktiboan hartu ahal izango dute parte, eta erantzunkidetasuna sustatuko da.”

Webgune berria eta Tokiko esperientzien bankua

Gaurkotasunari buruzko informazioa, gidaliburuak eta argitalpenak, eta tokiko eta Europako praktika onak www.herrismartik.eus webgunean bilduko dira, eta webgune horren bidez zabalduko dira. Eremu berri honek Euskadiko udalerriek garatutako ‘Smart’ proiektuak partekatzeko atal bat izango du, TOKIKO ESPERIENTZIEN BANKUA izenekoa.

LURRALDEAK – lurralde bakoitzaren beharrei erantzuteko

Estrategia ezartzeko, eta Berrikuntza Batzordearen ildoei jarraituta, EUDELek ‘Lurraldeak’ azpibatzorde-sarea sortzea erabaki du, politikariz eta teknikariz osatua, lurralde bakoitzeko udalen beharrak zein diren identifikatu eta beraien udal errealitatera moldatzeko.

Sareko lan dinamiko hori ezinbestekoa izango da tokiko erakundeei administrazio elektronikoa garatzen laguntzeko, eta NISAE: Euskadiko administrazioen segurtasunerako eta elkarreragintasunerako nodoan pixkanaka sartzeko; izan ere, horrek udalen eta foru aldundien arteko gertuko kolaborazioa ahalbidetuko du.

Nazioarteko radarra – Smart Cities eta ‘Alkate adimendunak‘

Aurreikusitako jardueren artean, NAZIOARTEKO SAREEKIN konektatuko da, eta Europako erreferentziazko proiektuak behatuko dira. Horretarako, EUDELek Smart Cities delakoetan aditua den Igor Calzadaren, Oxfordeko Unibertsitateko irakasle eta ikertzailearen, aholkularitza izango du. Igorrek txosten estrategiko bat egin du, Europako joera berri eta kasu arrakastatsuetan oinarrituta, EAEko udaletan udal garapen adimendunari buruzko eredu bat orientatzeko.

Benetako “udalerri adimendunak” eraikitzea planteatzen du. Planteamendu horretan, ‘Smart Cities’ delakoen kontzeptu digitalaz harago doa, eta teknologiaren erabilera bitarteko gisa erabiltzen du, eta ez helburu gisa. Horrek zerbitzu publikoak hobetzea, eraginkortasun irizpideetan oinarrituta, eta ingurune, ekonomia, demografia, teknologia eta beste hainbat arlotako erronkei erantzuten dien hiriko eraldaketa sustatzea du helburu.

Txostenean, Calzadak “alkate adimendunen” lidergo politiko eta berritzailearen aldeko apustua egiten du, eta herritarrek agente aktibo modura hartuko dute parte (herritar erantzunkidea)-

21.06.2017 Nabarmenak

“Udalek hurbiltasunerako funtsezko osagaia gehitzen diegu politikei, udalerrietan aplikatzea errazteko eta herritarrentzat erabilgarriak izan daitezen”

Tokiko Politika Publikoen euskal kontseiluaren eraketa.

EUDELen elkarteburu Imanol Landaren ustez, Kontseilua eratu izana “albiste ona” eta “aurrerapauso esanguratsua” da, bai udalentzat bai erakunde-sistema oro har dinamizatzeko, “aukerak sortzeko tresna bat, borondateak bateratu eta adostasunak biderkatzeko, akordioak lortu eta proposamenak egiteko, helburu komuna lortzeko: herrialdea eraikitzea”.

“Udalak beste erakunde batzuen ondoan jarri gara, udal eskumeneko politika publikoen ‘sukaldearen’ barruan” elkarteburuak azaldu du, udalen interesak aitortu eta neurtu daitezen, gobernuaren tokiko esparruari eragiten dieten politika publikoak diseinatu, sortu, betearazi eta ebaluatzeko prozesuetan.

PRENTSA OHARRA JEITSI

EUDELen ordezkariak Kontseiluari ahalik eta etekin handiena ateratzera animatu ditu erakundeak, “organo bizia izan dadin, funtzionatzen duena eta ondo funtzionatzen duena, gainera”. Landak uste du ezinbestekoa dela organo horrek modu egonkorrean lan egitea bermatzeko beharrezko bitartekoak jartzea, “lantzean behin eta itxurak gordetzeko soilik bildu ez dadin”.

Kontseiluak toki, foru eta autonomia mailako ordezkaritza paritarioa dauka (18 kide guztira, Eusko Jaurlaritzako 6, foru aldundietako 6 eta Euskadiko udaletako 6 ordezkari: gizonezko 3 hautetsi eta emakumezko 3 hautetsi, hiru lurraldeetako udalerrietakoak eta tamaina guztietakoak).

Ekainaren 21a, Vitoria-Gasteiz. EUDELen elkarteburu Imanol Landa komunikabideen aurrean agertu da, Tokiko Politika Publikoen Euskal Kontseilua eratzeko lehen bileraren aurretik, Euskadiko udalen balorazioa helarazteko, udalen interesak kontuan hartuta, tokiko politikak modu bateratuan diseinatzeko erakunde arteko lankidetza-organo berria abian jartzeari dagokionez.

EUDELen elkarteburuaren ustez, Kontseilua eratzea “albiste ona” eta “aurrerapauso esanguratsua” da; izan ere, Euskadiko udalei zeregin garrantzitsua esleitzen die EAEren erakunde-sistemaren harremanen eta funtzionamenduaren esparruan. Aldi berean, Imanol Landak zera nabarmendu du: Kontseilua “aukerak sortzeko tresna da”, zentzu bikoitzean; izan ere, horren baitan askotariko mailatako lankidetza gorpuzteaz gain, “borondateak bateratu eta adostasunak biderkatzen laguntzen du, akordioak lortu eta proposamenak egiteko, helburu komuna lortzeko: herrialdea eraikitzea”.

EUDELen elkarteburuak Kontseilua “udal eskumeneko politikak herrialde mailan egosten diren sukaldea” dela esan du; bertan, udalak lehenengo mailako eragile politikoak izango dira, ordezkaritza paritarioarekin*, Eusko Jaurlaritzarekin eta foru aldundiekin batera.

Imanol Landak azpimarratu duenez, Kontseiluaren xede zehatza tokiko politika publikoak dira, eta azaldu du orain arte “erabaki garrantzitsuenak gobernuaren beste maila batzuetan hartu izan direla, eta eragin handia dutela udalen zereginean”.

Zentzu horretan, EUDELen elkarteburuak defendatu du garrantzitsua dela tokiko gobernuek hasieratik parte hartzea gainerako erakundeekin batera, udal eskumenei eragiten dieten politikak egiteko prozesuan: “udalak hurbiltasunerako funtsezko osagaia gara, politika, plan edo programa horiek udalerrietan modu arrakastatsuan aplikatu daitezen. Azken finean, tokiko politikak herritarrentzako erabilgarriak eta praktikoak izan daitezen lortu nahi dugu, pertsonen bizimoduan benetako onura ekar dezaten”.

EUDELen ordezkariak Kontseiluari ahalik eta etekin handiena ateratzera animatu ditu erakunde guztiak, “organo bizia izan dadin, funtzionatzen duena eta ondo funtzionatzen duena, gainera”. Horretarako, komenigarria dela organo horrek modu egonkorrean lan egitea bermatzeko beharrezko bitartekoak jartzea, “lantzean behin eta itxurak gordetzeko soilik bildu ez dadin”.

Benetako erronka, Legea garatzea

Euskadiko Toki Erakundeen apirilaren 7ko 2/2016 Legearen barruan, sortzea aurreikusi den lehenengo organoa da Kontseilu hau, eta udalen aldarrikapen historikoetako bat da 2010eko martxotik; izan ere, data horretan egin eta Eusko Jaurlaritzari bidali zitzaion “Euskadiko Udal Legerako Oinarrien Dokumentua” (2010eko martxoa).

Horregatik, erakunde guztiek Legean aurreikusitako lehen organoa den Tokiko Politika Publikoen Euskal Kontseilua eratzeko agertutako inplikazioa eta esfortzua balioetsi nahi izan du EUDELen ordezkariak.

EUDELen elkarteburuak adierazi duenez, “benetako erronka orain hasiko da, Legea garatzeko prozesuarekin”, eta “lan handia dago oraindik egiteko”, eskumenen esparruan zein esparru ekonomiko-finantzarioan aurreikusitako mekanismo guztiak abian jartzeko, baita gainerako sektore-esparruei eragiten dietenak martxan jartzeko ere. Imanol Landak “prozesu konplexua, zaila eta neketsua” dela esan du, erakunde guztientzat aldaketa handiak dakartza-eta, “hala gure erakundeen ‘barne kulturan’ eta lan egiteko moduan, nola erakundeen artean erlazionatzeko moduan”, baina, aldi berean, “erronka liluragarria da Euskadiko udalentzat”.

Elkarteburuak baieztatu duenez, Toki Erakundeen Legea “estrategia- eta egitura-ardatza da EUDELentzat”, orain eta hurrengo urteetan. “Adi egongo gara, eta erakunde guztiek hartutako konpromisoak betetzen direla eta udalerrietan modu egokian aplikatzen direla zainduko dugu”.

Tokiko Gobernuen Batzordea

Imanol Landak Tokiko Gobernuen Batzordea ere aipatu du; aipatutako organoa Tokiko Politika Publikoen Euskal Kontseiluaren jarraian eratuko da. Batzorde horretan parte hartuta, araudi berriak euren eskumenen esparruan izandako eragina positiboa edo negatiboa izan den baloratu ahal izango dute udalek. EUDELen elkarteburuak azaldu duenez, “Batzorde honen funtzioak bere osaera zehazten du”; udaletako ordezkariek soilik (tokiko 12 hautetsi) eratutako organo horrek “alerta goiztiar” gisa funtzionatuko du, araudi-aurreproiektuetan udalen autonomia urratzea saihesteko.

“Batzorde honen bitartez, araudiaren testuarekiko aldeko edo kontrako jarrera agertu ahal izango dugu udalek, tramitazioa hasten den unetik bertatik”, aurreratu du Imanol Landak. Azaldu duenez, organo honek “audientzia-eskubidea gainditzen du, eta analisia eta balorazioa egiteko funtzioak gaitzen ditu, eragin juridikoekin”.

*Udaletako ordezkariak Tokiko Politika Publikoen Euskal Kontseiluan, Lehendakariak EUDELen proposamenez izendatutakoak, Euskadiko Toki Erakundeen apirilaren 7ko 2/2016 Legearen 83.3 artikuluarekin bat etorriz:

GETXOko alkate eta EUDELen elkarteburua, Imanol Landa
IRUNgo alkate eta lehen elkarteburuordea, José Antonio Santano
ERRENTERIAko alkateorde eta bigarren elkarteburuordea, Garazi López de Etxezarreta
MUNGIAko alkatea, Ager Izagirre
ASPARRENgo alkatea, Consuelo Auzmendi
BURGELUko alkatea, Mª Natividad López de Munain

01.06.2017 Nabarmenak

EUDELek bere burua eskaintzen die udalei Europarekiko lotura-portua izateko eta Euskadin tokiko autonomiaren zaindari izateko

IKUSI/JEITSI ASAMBLADAKO ARGAZKIAK

Imanol Landa, EUDELeko Elkarteburuaren eta udalerri anfitrioiaren alkateak mezu horrekin egin die harrera gaur goizean Euskadiko Udalen Elkarteko urteko Batzarrean bildu diren Euskadi osoko alkateei; batzarra goizeko 11.00ak geroztik egiten ari da itsas bidaia-ontzien itsas terminal berrian, Getxoko portuan bertan.

Ekitaldiaren inauguraziorako, EUDELek udalerriekin lankidetzan diharduten lehen mailako bi erakunde gonbidatu ditu: Eusko Jaurlaritza, Josu Erkoreka sailburu eta bozeramaileak ordezkatua, eta Europako Kontseilua, Gudrun Mosler-Törnström andreak, Toki eta Eskualde Botereen Kongresuko (CPLRE) agintari gorenak ordezkatua.

PRENTSA OHARRA DESKARGATU

Biek bilera pribatua izan dute Elkarteburuarekin eta EUDELeko Batzorde Eragileko gainerako kideekin, eta bertan izan dira, halaber, hiru euskal hiriburuetako alkateak; bilkura hori terminalean bertan egin da, Batzarraren aurretik.

“Udalen ahotsa entzun behar du Europak, errealitatera lotuta egoteko eta herritarrekin konfiantzan oinarritutako harreman berri bat sortzeko. Tokiko demokrazia da Europa berritzeko giltzarria. Iritsi zaigu ahalduntzeko unea”, egin die dei Landa Elkarteburuak euskal udalei.

IMANOL LANDAREN HITZALDIA DESKARGATU

EUROPAKO GUTUNA DESKARGATU

Udal legealdia erdibidean den honetan eta datozen urteei begira, Imanol Landak elkartearen egiturazko bi erronka nagusiak zein diren azpimarratu du: Euskadiko Toki Erakundeen eta organo berrien Legea garatzeko bidean “udalei bultzada, gidaritza eta laguntza ematea”; eta EUDELek “udal eremuko kontsentsuaren erreferente gisa betetzen duen zeregina sendotzea”.

EUDEL, 2017ko ekainak 1. “EUDELek bere burua eskaintzen die udalei Europarekiko lotura-portua izateko eta Euskadin tokiko autonomiaren zaindari izateko”. Horixe izan da Imanol Landa Elkarteburuak eta Getxoko alkateak adierazitako konpromisoa EUDELen Batzar Nagusian bildu diren hiru lurraldeetako udalerrietako alkateei egin dien harrera-hitzaldian. Batzarra gaur goizeko 11:00etatik aurrera egiten ari da, Getxoko portuan inauguratu berri den itsas bidaia-ontzien itsas terminal berrian.

Hitzaldiarekin hasi aurretik, Imanol Landak maitasunezko eta elkartasunezko mezu bat helarazi die euskal udalerrien izenean Kabulgo eta Manchesterreko azken sarraskietan hil eta zauritu diren biktimei. “Sakon nahigabetuta gaude Europako eta munduko gainerako lekuetako herriak behin eta berriz kolpatzen dituzten eraso terroristengatik eta indarkeriaren espiralagatik. Hori dela eta, balio konpartituen defentsa inoiz baino beharrezkoagoa da gaur egun” azpimarratu du Landak.

Europa une erabakigarrian da, erronka handiei buru egin beharrean, hala nola Brexitari, nazioarteko terrorismoari eta errefuxiatuen krisiari, eta, hain zuzen, 2017. urte honetan, EUDELek lehen mailako bi erakunde gonbidatu ditu urteko Batzarraren irekieran parte hartzeko, udalerriekin lankidetzan diharduten bi erakunde nagusi: Eusko Jaurlaritza bera eta Europako Kontseilua.

Imanol Landak eskerrak eman dizkio Josu Erkoreka Jaurlaritzako Gobernantza Publiko eta Autogobernuko Sailburuari, bertan egoteagatik, eta “EUDELi laguntzeko beti prest egoteagatik, horrela egin baitu eskatu izan diogun guztietan”. Uneotan, Departamentua eta EUDEL elkarlan estuan ari dira aurreko urtean Eusko Legebiltzarrak onartutako Euskadiko Toki Erakundeen Legean jasotako lankidetza-mekanismoak eta -organoak martxan jartzeko.

Europako Kontseiluaren aldetik, berriz, Toki eta Eskualde Botereen Kongresuaren (lehendakaria, Gudrun Mosler-Törnström andrea, izan da batzarrean. Elkarteburuak eta alkate anfitrioiak ongietorria egin dio Getxora eta EUDELera, “euskal udalerri guztien etxera”. Mosler-Törnström andreak ibilbide luzea egina du erakundeetan, hala Kongresuaren agintari goren gisa nola Salzburgoko eskualdeko Legebiltzarreko lehendakariorde gisa, eta esperientzia zabal horren berri eman die euskal alkateei, eta, halaber, deszentralizazioari, tokiko autonomiari eta tokiko gobernantza eredu egokiei buruzko bere ikuspegi aditua eskaini die.

Euskadira lehen bisita instituzionala zuen Mosler-Törnström andreak, eta aurtengo Batzar Nagusiko ohorezko gonbidatua izanik, EUDELek aurreko bilkura bat antolatu du 10:30ean, eta hor bildu dira CPLREko lehendakaria, Imanol Landa Elkarteburua, Josu Erkoreka Sailburua eta haren Departamentuko kideak, eta EAEko hiru hiriburuetako alkateak.

Batzarraren ondoren, Gudrun Mosler-Törnströmek bilera erronda bat izango du euskal erakunde nagusiekin; besteak beste, Eusko Jaurlaritzarekin berarekin, gaur 12:00etan, Bilboko alkatearekin gaur arratsaldean; eta bihar, ostirala, Eusko Legebiltzarreko lehendakari andrearekin Gasteizko kontroleko osoko saioaren aurretik, eta Bizkaiko Batzar Nagusietako lehendakariarekin, Gernikan, goiz erdian.

Tokiko Autonomia eta Udalerrien Elkartea

Tokiko autonomiaren defentsa izan da Batzarreko gai nagusia, eta horri buruzkoak izan dira erakundeetako hiru ordezkarien esku-hartze gehien-gehienak. Gehien sakondu duena EUDELeko Elkarteburua bera izan da. Halaxe gogorarazi du Landak: “Toki Autonomiaren Europako Gutuna Europako toki boterearen funtsezko zutabea da, eta alkateok beti gidaritzat hartu behar dugu gure eguneroko zereginean”.

CPLREk berak 1985an bultzatua, Europako Gutuna tokiko gobernuen eskubideak bermatzeko lehen tresna juridikoa da. Imanol Landak zehazki Gutunaren 10. artikulua aipatu du, Udalerrien Elkarteen misioa zein den onartzen baita berariaz artikulu horretan, “udalen interes komunak babestea eta sustatzea”, hain zuzen.

Gutuna inspirazio-iturri zuzena izan da Euskadiko Toki Erakundeen Legea hezurmamitzeko. Gutunaren oinarriekin guztiz bat dator euskal Legea, eta, alde horretatik, Europako abangoardian dago, batetik, udal eskumenak eta horien finantzazioa bateratzen dituelako; eta bestetik, toki autonomia bermatzeko mekanismoak finkatzen dituelako erakunde-arteko hainbat lankidetza-organo berriren bidez.

Imanol Landak azpimarratu duenez, tokiko autonomia “funtsezko tresna da udal kudeaketa eraginkor eta efizientea gauzatzeko, eta herritarrei zerbitzu publikorik onena eskaintzeko. Hori nola? Kudeatzeko eta erabakitzeko gaitasun propioak izanda, eta gure baliabideak baliatuta. Hori esan nahi du tokiko autonomiak”.

EUDELen proiektu estrategikoak eta erronkak

Hitzaldiaren azken aldera, Imanol Landak EUDELek Europan martxan dituen zenbait proiektu estrategiko aipatu ditu; besteak beste, Europako Kontseiluarekin eta euskal udal talde batekin batera ‘Gobernantza egokiaren alorrean Bikaintasunaren europar Zigilua’ ezartzea euskal udalerrietan; edo Bilbok 2018an hartuko duen Berdintasun, aniztasun eta inklusio politikei buruzko Europako Biltzarra.

Elkarteburuak EUDELen egiturazko bi erronkak ere aipatu ditu udal legealdi honetarako eta hurrengoetarako: Euskadiko Toki Erakundeen eta organo berrien Legea garatzeko bidean “udalei bultzada, gidaritza eta laguntza ematea”; eta EUDELek “udal eremuko kontsentsuaren erreferente gisa betetzen duen zeregina sendotzea”.

Bi erronka horiei buruz zehaztasun eta sakontasun handiagoz jardungo dira Batzarraren bigarren zatian. Saio hori barnekoa izango da, udalentzat soilik, eta ateak itxita egingo da 12:00etatik aurrera. Halaber, bazkideek saio horretan bozkatuko dituzte 2016ko urteko kontuak eta 2017 ekitaldi berriari dagokion aurrekontua.

Ostegun honetako Batzarrak euskal udaletan agintzen duten sentsibilitate desberdinetako ordezkariak bildu ditu. Hain zuzen, 2016ko maiatzean Elgoibarren izan zen ezohiko Batzarrean EUDELeko zuzendaritza-organoak (Batzorde Eragilea eta Lurralde Batzordeak) berritzeko lortu zen adostasunaren emaitza izan da batasun hori. Elgoibarkoa baino hilabete lehenago, Gasteizko ohiko batzarrean, EUDELek Estatutuak eta antolaketa araudia aldatzea erabaki zuen, bi testuak errealitatera egokitzeko.

Landa Elkarteburuak, orobat, aipamen berezia egin nahi izan die Batzorde Eragileko lankideei, eta eskerrak eman dizkie, egindako lan eskergagatik, eta modu berezian kide berriei, “beren leialtasunagatik, bete-betean inplikatu baitira Elkartearen lanean, erantzukizunez eta jarrera guztiz eraikitzailearekin”.

“Udal gobernuen batasuna, ahots bakar bat, horixe da gure indar nagusia gainerako erakundeen aurrean”, amaitu du Landak.

24.01.2017 Nabarmenak

Ipar Euskal Herriko Elkargoa: solaskidetza bakarra elkarren interesekoak diren esparruetan lan egiteko

[nivo effect=”sliceDownLeft” slices=”9″ directionNav=”button” width=”600″]
[image]https://noticias.eudel.eus/wp-content/uploads/2017/01/delegacionCOMPLETA_ok1.jpg[/image]
[image]https://noticias.eudel.eus/wp-content/uploads/2017/01/SanJuanLuz1.jpg[/image]
[image]https://noticias.eudel.eus/wp-content/uploads/2017/01/nuevoPresidente1.jpg[/image]
[image]https://noticias.eudel.eus/wp-content/uploads/2017/01/iparralde-elkargoa_32485167815_o.jpg[/image]
[image]https://noticias.eudel.eus/wp-content/uploads/2017/01/iparralde-elkargoa_31641682314_o.jpg[/image]
[image]https://noticias.eudel.eus/wp-content/uploads/2017/01/general1.jpg[/image]
[image]https://noticias.eudel.eus/wp-content/uploads/2017/01/foto_delegacion1.jpg[/image]
[image]https://noticias.eudel.eus/wp-content/uploads/2017/01/electos_iparralde.jpg[/image]
[image]https://noticias.eudel.eus/wp-content/uploads/2017/01/delegacion_mesa1.jpg[/image]
[/nivo]Imanol Landa, Getxoko alkate eta EUDEL-Euskadiko Udalen Elkartearen elkarteburua, Baionara joan zen atzo arratsaldean, Ipar Euskal Herriko Hirigune Elkargoaren presidentea (Baionako alkate Jean-René Etchegaray) eta horren gobernu organoak hautatzeko ekitaldian egoteko.

Baionako alkate zentrista Ipar Euskal Herriko Hirigune Elkargoaren, Iparraldeko erakunde berriaren, lehen presidentea bihurtu zen atzo. Jean René Etchegarayk urteak daramatza euskal erakunde bat sortzea aldarrikatzen. 233 ordezkariz osatutako batzorde berriaren lehenengo osoko bilkuran, botoen %73,4 lortu zuen. Erakundearen ordezkari berriak 231 botoetatik 157 lortu zituen, adeitasunak markatutako osoko bilkuran, hainbat hilabetez eztabaidan eta desadostasunean egon ondoren.

Hautetsi eta begirale askok egun historikotzat jo zuten atzokoa; izan ere, Iparraldeko hiru herrialdeetako 158 udalerriak lehen aldiz daude erakunde politiko berean bilduta.

Euskadiko Udalen Elkartearen elkarteburua, Imanol Landa, Baionako hautaketa-ekitaldira bertaratu zen Hegoaldeko erakundeen ordezkaritzako kideetako bat izan da. Besteak beste, Eusko Jaurlaritzako eta Nafarroako Gobernuko ordezkariak eta Gipuzkoako Foru Aldundiaren ordezkariak ere izan ziren bertan.

Ekitaldiaren aurretik, EUDELeko elkarteburuak eta euskal erakundeen gainerako ordezkariek topaketa laburra izan zuten Jean-René Etchegaray Baionako alkate eta hautetsi nagusiarekin. Imanol Landak zoriondu egin zuen, Iparraldeko udalerriak biltzen dituen lehenengo erakunde politikoaren sorreragatik. Bere hitzetan, “albiste bikaina da euskal udalgintzarentzat; aukera eskaintzen du Iparraldean solaskide bakarra izateko eta, era horretan, lankidetzarako eta lan partekatutako etapa berria irekitzeko, interes komuneko gaiei dagokienez, adibidez, euskarari, kulturari edo garapen ekonomikoari dagokienez”.

EKITALDIKO ARGAZKIAK IKUSI

Imanol Landaren ustez, “Hegoaldeko eta Iparraldeko herrien arteko lankidetza indartuko da, herritarrengandik oso gertu dagoen tokiko esparrutik abiatuta, eta ekimenak eta esperientziak trukatzea sustatuko da”. EUDELen elkarteburuak azaldu duenez, “adostasunerako eta lanerako harreman estuagoa ekarri du, ekintzarako hainbat gai eta alorretan, eta partekatzen ditugun behar eta interes komunetan oinarrituta”.

“Lan handia dugu egiteko oraindik”

Atzoko saioa erakunde berriaren 233 ordezkari hautetsien lehen topaketa izan da, urtarrilaren 1ean eratu zenetik. Atzo arratsaldean bildu ziren, presidentea eta Kontseilu Iraunkorreko kideak (69 kide) eta Batzorde Exekutiboko kideak (25 kide) hautatzeko; izan ere, Elkargoko gobernuaren organo nagusiak dira aipatutako horiek.

Elkargo berriak Iparraldean aurretik zeuden 10 interkomunalitateak biltzen ditu, eta Ipar Euskal Herriko Hirigune Elkargoa deitura hartu du. Guztira, 300.000 biztanle ordezkatzen ditu, 158 udalerritan banatuta; horietako %70 erakunde hau sortzearen alde agertu ziren.

Kargua hartzeko ekitaldian, Ipar Euskal Herriko Hirigune Elkargoaren lehenengo presidenteak azaldu zuen Iparralde trantsizio-fasean sartu dela eta lana hasi baino ez dela egin. Etchegarayk ziurtatu zuenez, erakunde berriak hainbat gai kudeatuko ditu: euskararen eta gaskoiaren aldeko hizkuntz politika Baionako eskualdean, nekazaritza, mugaz gaindiko harremanak eta legeak ezarritako zortzi eskumenak, adibidez, garapen ekonomikoa, garraioak eta hondakin-bilketa. Etchegarayk nabarmendu zuenez, erakunde berriak orain arte eskaini dituen zerbitzu publiko berberak eskainiko dizkie Lapurdiko, Nafarroa Behereko eta Zuberoako herritarrei. “Lan handia dugu egiteko, baina ez gara beldur. Duintasunez egingo dugu”, esan zuen, presidente hautatu ondoren.

Dossiera deskargatu

Berriak

Azken berriak