- Gaur, otsailaren 13an (asteartea), EUDELek Bilbon duen egoitzan, “Zaintzen duten udalerriak” tailerra egin da, toki-erakundeetako politikariei zuzenduta.
- Euskadiko baterako lana aztertu da, baita komunitatearen, erantzunkidetasunaren eta ikuspegi feministaren ikuspuntuak dituzten udal-esperientzia aitzindarien bidez ere.
2024ko urtarrilaren 13an. Tokiko hautetsientzako “Udalak Abian” ibilbidearen esparruan, EUDELek saio monografiko bat egin du gaur, bere Bilboko egoitzan, zaintzen erronkari eta horiek udal-eremuan duten eraginari buruz. Tailerra, udaletako arduradun politikariei zuzenduta, EAEko hiru lurraldeetako udalerrietan bultzatutako proiektu aitzindariak aurkezteko balio du.
Zaintzen erronka orokorrak gero eta garrantzi handiagoa izango du gizartean, eta, zehazki, udalerri eta hirietan, non tokiko gobernuak baitira pertsona zaurgarrien zaintzaren eta arretaren bultzatzaile nagusiak. Saio honek zenbait jarduera-gako eta inspirazio-praktika eskaini ditu, eragileekin (profesionalak, familiakoak, erakundeak, entitateak eta udalerriko herritarrak) sare komunitarioa sentsibilizatu eta eratzeko moduari buruz.
Saioa 9:30ean hasi da, EUDELeko ordezkari den Nati López de Munain Burgeluko alkatearen ongietorriarekin. Ondoren, Mémora Fundazioak bere testuinguruan jarri du gaia. Joan Berenguer zuzendariak bere Fundazioaren proiektuaren gakoak azaldu ditu; bizitzaren azken prozesuan pertsonen akonpainamendu eta arreta integralean izandako esperientziatik sortutako proiektua da. Mémoraren “Zaintzen duten hiriak” proiektuak hainbat tresna garatzea proposatzen du, hala nola nahi ez den bakardadeari arreta emateko Behatoki bat eta adierazleak, hausnarketarako guneak, udal-jardunbide egokiak bilduko dituen jarduera-protokoloa, eta, azkenik, ebaluatzeko eta egiaztatzeko metodologia (“Zaintzen duen Hiriaren Kalitate Zigilua”).
Bigarren hizlariak, Rafa López-Arostegik, EAEn egindako lan komuna aurkeztu du. López-Arostegi gizarte, gazteria eta haurtzaroko politiketan aditua da, eta arlo publikoko aholkularia. Euskadin, Eusko Jaurlaritza Herrialde mailako esparru koordinatu bat lantzen ari da, euskal gizartearen errealitatearekin bat datorrena eta zaintzei batera ekiteko berdintasun-ikuspegia txertatzea ahalbidetuko duena.
Tailerrak 12:00ak arte iraun du, Amurrioko, Portugaleteko eta Usurbilgo udaletako ordezkariekin, haien udal-esperientzien berri emateko panel batekin; udal horiek lan-ibilbide luzea dute tokiko komunitateetan. Txerra Molinuevo Amurrioko alkateak, Agurtzane Solabarrieta Usurbilgo alkateak eta Maria José Blanco Portugaleteko alkateordeak hartu dute parte. Udalen panelean, mintzagaien artean izango da zaintzen erronkari erantzuteko baliabide publiko, pribatu eta sozialak nola aktibatu eta lerrokatu ere.
Tokiko praktiken hiru adibide horiek EUDEL, Berdinsarea berdintasunerako sarearen bidez, Euskadiko 2030 Agendari ekarpen gisa egiten ari den azterlan baten parte dira. Ekimen honen helburua da zaintza erantzunkideetarako tokiko eredua diseinatzea, ikuspegi feministarekin, beste udalerri batzuen erreferentzia eta inspirazio izan dadin.
Tokiko hiru esperientzia
Tailerrean aurkeztu diren hiru kasuak Euskadi mailako lan komuna tokiko errealitatera nola egokitzen den erakusten duten adibideak dira:
Amurrio (Araba) zaintzak Udalaren ekintza gidatuko duen itsasargi-politika gisa kokatu nahian dabil. 2022an, udalerriko zaintzen egoerari buruzko Diagnostikoa egin zuen, eta, orain, Ekintza Plana diseinatzen ari da.- Portugalete (Bizkaia) pertsonei zahartu ahala gero eta akonpainamendu handiagoa eskaintzeko lanean ari da, autonomia txikiagoa dagoenean babes handiagoa emateko, eta laguntza-baliabideen bidez (gizarte zentroak-Autonomiaren Sustapenerako zentroa-eguneko zentroa-egoitza) ahalik eta traumatikotasun gutxieneko ibilbidea errazteko. Horrez gain, garrantzia ematen zaio zaintzen duten pertsonen zaintzari.
- Usurbil (Gipuzkoa) zaintzen ikuspegi feministan oinarritzen da. Esperientzia zehatz gisa, belaunaldien arteko etxebizitza komunitarioko proiektuak eta zaintzaileen etxebizitza-auzo berritzaile bat garatzen ari dira.