• Uztailaren 20an, 21ean eta 22an, Armeniako hamahiru udalerritako hogei bat lagunez osaturiko ordezkaritza izango dugu Euskadin, EUDELekin eta zenbait udalekin batera azterketa bisita bat egiteko.

• Bisita Europako Kontseiluak antolatu du, Armeniako tokiko agintarien interesei erantzunez, Euskadiko udalek Gobernantza egokiaren alde egiten duten lana bertatik bertara ezagutzeko, etika publikoa, gardentasuna eta herritarren parte-hartzea bezalako gaietan, besteak beste.

Bilbon, 2016ko uztailaren 19an. Datozen egunotan, uztailaren 20an, 21ean eta 22an, Armeniako alkate eta tokiko ordezkari talde bat izango dugu bisitan, Europako Kontseiluaren babespean, Euskadiko udalek Tokiko Gobernantza Egokiaren alorrean gauzatzen dituzten kudeaketa-eremu desberdinei buruzko esperientziak ezagutu eta informazioa biltzeko asmoz. Arrigorriaga, Amurrio, Basauri, Galdakao eta Getxoko udalen kasuak aztertuko dira, bai eta Gipuzkoako Foru Aldundiarena ere.

Etika publikoa, gardentasuna eta herritarren parte-hartzea bezalako eremuak lehentasunezko ardatz estrategikoak dira EAEko udalentzat, eta, beraz, baita EUDELentzat berarentzat ere. Joan den legegintzalditik, izan ere, lankidetzarako zenbait ekimen sustatzen dihardute, hala nola, Gardentasunaren aldeko udalen Sarea edota tokiko ordezkarien Jokabide Kodea.

Armeniako ordezkaritza, zehazki, 10 alkatek eta tokiko beste horrenbeste ordezkarik osatzen dute, eta 40.000 eta 1.000 biztanle arteko 13 herri eta hiri armeniarretatik datoz. Datu hori bat dator Euskadiko udalen batezbestekoarekin, udalen ia %60 baita 2.000 biztanletik beherakoa.

EUDEL ari da Armeniako ordezkaritzaren Euskadiko egonaldia koordinatzeko lanetan. Aipatutako hiru egun horietan (uztailak 20, 21 eta 22), zenbait bisita tekniko eta elkartrukerako saioak antolatu dira Euskadiko udalekin nahiz bestelako erakundeekin.

ARMENIARREN AZTERKETA BISITAREN EGITARAUA

Asteazkena, hilak 20:

09:30-11:30. EUDELen Bilboko egoitza. Euskadiko udalen esperientzia herritarren parte-hartzean (udal aurrekontuak, hirigintzako antolamendua, ‘Auzobegiraleak’).  Parte-hartzaileak: Amurrio, Basauri eta Galdakao.

12:00. Bisita Getxoko Udalera. Esperientzia: Gardentasun-ataria eta gobernu irekia.

Osteguna, hilak 21

09:30-11:30. EUDELen Bilboko egoitza. EUDEL- Euskadiko Udalen Elkartearen egitekoa eta funtzioak. Udalen arteko lankidetza-proiektuak: Gardentasun Sarea, tokiko berrikuntza agendak eta herritarren arretarako zerbitzuak (HAZ).

13:00. Bisita Gipuzkoa Foru Aldundira.  Etika publikorako, integritaterako eta gobernu egokirako foru estrategia.

Ostirala, hilak 22

09:00. EUDELen egoitzan. Bilbao Metropoli-30 Fundazioa. Bilboren hiri-eraldaketaren aurkezpena.

10:30. Bisita Basauriko Udalera. Herritarren Arreta Zerbitzua-.HAZ

12:30. Bisita Arrigorriagako Udalera. Udalaren antolaketarako formula berritzaileak – Herritarren Arretarako Zerbitzua (HAZ).

Europako Kontseiluak tokiko europar gobernuei laguntza, euskarri teknikoa eta laguntasuna emateko zenbait egitarau edo programa-ildo desberdin ditu.  Egitarau horien baitan, aldian-aldian, azterketarako eta informazio-trukerako bisitak antolatzen dira herrialde eta eskualde desberdinetako udalerrien artean, horien errealitatea eta bizi duten esperientzia bertatik bertara ezagutzeko.  *Europako Kontseilua 47 estatukidek osatzen dute, eta Armenia da horietako bat.

www.eudel.eus

• Udalen eta Bizkaiko Foru Aldundiaren arteko datu-trukea lankidetza-hitzarmen baten bidez egingo da; truke honi esker hitzarmenari atxikitako udalerrietako herritarrek errazago eta erosoago egin ahal izango dituzte beren administrazio-izapideak.
• Udazkenean abiaraziko dira Aldundiak eta udalek lankidetzan sortutako plataforman bideratuko diren lehen proiektuak: gizarte ekintzako modulua eta erroldako datuak partekatzeko modulua.
• Ondoren, apurka-apurka, beste arlo batzuetako datuak sartuko dira truke-plataforman, esaterako gizarte prestazioei buruzko ziurtagiriak, DSBEri buruzko informazioa, zerga-betebeharrei buruzko ziurtagiriak, eta NANak Poliziarekin konektatuz egiaztatzeko zerbitzuak.
• Herritarrek onura hauek izango dituzte: administrazio-izapideak errazagoak izango dira, ez dute edukiko zertan joan hainbat leihatilatara agiriak eskatzeko, eta ez dituzte aurkeztu beharko administrazioak badauzkan agiriak.

Bilbo, 2016ko uztailaren 15a. Gaur goizean 67 udalerritako alkateekin eta ordezkariekin egindako ekitaldi batean Bizkaiko Foru Aldundiak eta EUDELek elkarreragingarritasunerako hitzarmen bat aurkeztu dute; horri esker hitzarmenari atxikitako administrazioek datuak partekatuko dituzte herritarrek beren izapideak errazago kudeatu ahal izateko.

Aurkezpen-ekitaldian Getxoko alkate eta EUDELeko lehendakari Imanol Landak eta Herri Administraziorako eta Erakunde Harremanetarako diputatu Ibone Bengoetxeak azaldu dute aurtengo udazkenean bi modulu abiaraziko direla, bata gizarte ekintzako datuen trukerako eta bestea erroldako datuen trukerako.

“Elkarreragingarritasuna; alegia, administrazioen arteko lotura eta datuak nahiz informazioa trukatzea, garrantzi handiko urratsa da gure udalen berrikuntzarako eta modernizaziorako”.

“EUDELetik, beti egin izan dugun bezalaxe, udalen ondoan izango gara eta laguntza emango diegu beren eskari eta interesei erantzuten dieten ekimen guztietan; are gehiago herritarrentzat modu nabarmenean onuragarria denean. Kasu honetan, kontua da edozein herri-erakunderekin burutu behar dituzten izapide eta gestioak erraztea eta erosoago egin ahal izatea. Udalek, bereziki, gure herritarrentzako arreta eta zerbitzu gero eta irisgarriagoak, erakinkorragoak eta kalitatezkoak eskaini behar ditugu, batez ere gizarte-beharrei edo egoera zailei erantzun behar zaienean.”

Imanol Landa, EUDELeko elkarteburua.

BI MODULUAK

Gizarte ekintzako moduluaren bitartez ondokoak kudeatu ahal izango dira modu telematikoan eta datuak trukatuz: etxez etxeko laguntza zerbitzua, gizarte larrialdietarako laguntzak, gizarte-inklusioko eta haurren arloko interbentzioak, eta mendekotasunaren balorazioak, besteak beste.

Beste alde batetik, erroldako datuen moduluari esker errolda-helbidea udalerri barruan  aldatu nahi duten herritarrek ez dute edukiko ziurtagiria Bizkaiko Foru Aldundian aurkeztu beharrik informazio hori behar den kudeaketak egiteko, Aldundiko langileak online aztertu ahal izango du eta.

Bi modulu horiek abian jarri ondoren, apurka-apurka beste arlo batzuetako datuak sartuko dira truke-plataforman, esaterako Aldundiaren gizarte prestazioei buruzko ziurtagiriak, DSBEri buruzko informazioa, zerga-betebeharrei buruzko ziurtagiriak, eta NANak Poliziarekin konektatuz egiaztatzeko zerbitzuak.

Hitzarmenaren onurak

Elkarreragingarritasunerako hitzarmen honek hainbat onura ekarriko dizkie herritarrei, batez ere administrazioekin egin beharreko kudeaketetan, asko erraztuko dira eta. Esate baterako, ez da egongo leihatilaz leihatila agiri “eskean” ibili beharrik, herritarrek ez dituzte aurkeztu beharko administrazioak lehendik dauzkan agiriak, beharrezkoak ez diren joan-etorriak saihestuko dira, eta espedienteen izapidetzea bizkortuko da, besteak beste.

Gainera, gure langile publikoei ere lana erraztuko diegu. Berehalako sarbidea izango dute izapidetzeetarako behar duten informaziora, eta, horrez gain, dokumentuak lortzeko herritarrek egindako eskaerak murriztuko dira. Horrela, modu eraginkorragoan, azkarrago eta modu gardenagoan lan egin ahalko dute, erantzunaren kalitatea ere hobetuz.

Imanol Landak eta Ibone Bengoetxeak udalen lana azpimarratu dute, beren ustez funtsezkoa baita 2015ean sinatutako hitzarmen bat dela bide foru aldundiek eta Eusko Jaurlaritzak elkarri datuak linean lagatzeko erabiltzen duten egitura osatzeko. Hitzarmen honi esker Bizkaiko udalak elkarrekin konektatu ahal izango dira, bai eta gainerako administrazio publikoekin eta Estatuko Administrazio Orokorrarekin ere (Eusko Jaurlaritzaren bidez). Horrela, administrazioaren maila guztiak egongo dira konektatuta.

Aldundiaren eta Bizkaiko udalen arteko elkarreragingarritasunerako hitzarmena Bizkaiko Foru Aldundiaren modernizaziorako, gardentasunerako eta gobernu enerako estrategiaren funtsezko elementuetako bat da. Estrategia horretan oinarritzen da oraingo legegintzaldiko gobernu-proiektua, helburu hauek dauzkana: Aldundia modernizatzea egungo egoerara egokitzeko eta zerbitzu hobeak eta erabilerrazagoak eskaintzea.

EUDELeko BATZORDE ERAGILEAK HARTU DUEN JARRERA, gaurko bileran hartu dena, ostegunean, 2016ko uztailak 14, honakoaz: Ogasun eta Administrazio Publikoen Ministerioak eginiko “Gonbidapena”, Eusko Jaurlaritzaren Bitariko Batzordea eratzekoa, Euskadiko Toki Erakundeei buruzko Legearen zenbait artikulurekiko ezadostasunei lotua.

EUDELeko elkarteburua eta Getxoko alkatea, Imanol Landa, astearteartean, hilak 7, 18:30ean, Bilboko Udalak Bilboko Athletic Clubeko emakumezkoen taldeari egingo zaion harrera ofizialean izango da, 2015-2016 denboraldiko Ligako txapeldunen titulua lortu dute-eta.