2023ko otsailak 16. EUDELn Guatemalako delegazio tekniko baten bisita jaso du, tokiko garapenaren eta gobernu irekian inspirazio-iturri diren esperientziak identifikatzeko interesa duelako eta, bide batez, Euskadiko Udalen Elkarteak, arlo horietan, udalei eskaintzen dien laguntza nola gauzatzen duen ezagutzeko.
EUDELeko zuzendari nagusiak, Mar Zabalak, Guatemalako San Marcos departamentuko ordezkaritzari, otsailaren 14tik 17ra Euskadin bisitan egon den bitartean, proiektuaren zehaztasunak azaldu dizkio, GARAPENen eskutik (Garapen Agentzien Euskal Elkartea). Azterketa-bisitaren buru COPROSGUA da, Guatemalako Proiektuen Koordinatzailea, Pro Verde Fundazioaren eta CONEXX-EUren laguntzarekin. Helburua da praktika onak identifikatzea tokiko garapen ekonomikoan, hondakinen kudeaketan eta gobernantzan, tokiko agintariak EBri eta beste finantzatzaile batzuei instituzioak indartzeko proiektu bat proposatzeko.
Elkartearekin izandako topaketan, Guatemalako ordezkaritzak Europako Kontseiluaren Bikaintasunaren Zigilua (ELoGE) proiektuan interes handia erakutsi du. Ekimen hori, Europako Kontseiluak egiaztatutako eskualdeko plataforma gisa, EUDELek bultzatu zuen, 2017an, tokiko erakundeek Gobernantza Onaren 12 printzipioen hobekuntza hauspotzeko. ELoGeko lau edizioetan, guztira, 22 udalerrik parte hartu dute eta Euskadiko 12 udalek Europako Kontseiluak ematen duen zigiluaren kalifikazio altuena lortu dute.
Topaketan parte hartu dutenak:
Mar Zabala, EUDELeko zuzendari nagusia
Jorge Fernando Mérida, COPROSGUAko presidentea
Edwin Meyer Vásquez, COPROSGUAko presidenteordea
Kevin Alberto Rivera, Depósito de San Marcoseko ordezkaria. Guatemalako Gazteriaren Kontseilu Nazionala.
Wilson Donaldo Castañeda, Pro Verde fundazioko zuzendari exekutiboa
Alejandro Cantó, CONEXX-EUko zuzendari nagusia