Eudel

Author

eudel

Azken berriak

27.01.2016 Berdintasuna

EUDELek bat egiten du Vitoria-Gasteizko gaitzespen elkarretaratze isilarekin gaur 12:00etan

Eraso bortitzaren ondorioz Alicia neskatoa atzo hil zenez, eta ikerketek zein bide hartuko eta isilpeko sumarioa noiz kenduko zain gaudelarik, EUDELek gaitzespen irmoena eta arbuio erabatekoa adierazten du edozein indarkeria kasu matxistaren aurka.

Hala, EUDELek bat egiten du gaur, urtarrilak 27, izango den elkarretaratze isilarekin, Vitoria-Gasteizko Udalak deitua, xede duena gertakari anker horiek salatzea eta adin txikiko biktimaren amarekin zein hurrekoekin elkartasuna adieraztea.

EUDELeko Berdintasun ordezkari eta europar udalerrien Berdintasun Batzordeko lehendakaria, Galdakaoko alkate Ibon Uribe,  Vitoria-Gateizen izango den elkarretaratzera bertaratuko da gaur, urtarrilak 27, 12:00etan, Udaletxeko fatxadaren aurreko Plaza Berrian.

 

Continue Reading
By

26.01.2016 Nabarmenak

Bizkaiko lurraldeko Gizarte Zerbitzuen maparen aurkezpena Udalerriei

• Euskadiko Udalen Elkartea–EUDELek eta Bizkaiko Foru Aldundiko Gizarte Ekintza Sailak gizarte zerbitzuen zorroari buruzko dekretu berrian jasotako gizarte prestazio eta zerbitzuen lurralde antolamenduaz arduratuko den erakundeen arteko talde bat sortuko dute

2016ko urtarrilak 26.- Udalek gizarte zerbitzuen arloan duten garrantzi handia kontuan hartuta, EUDELek eta Bizkaiko Foru Aldundiak lan-bilera bat egin dute Bizkaiko alkateekin, gizarte zerbitzuen zorroari buruzko dekretu berria ezartzean gure lurraldean egingo den zerbitzu eta prestazioen inguruko eskumenen banaketa denon artean eztabaidatzeko. EUDELek Bilbon duen egoitzan egin da bilera eta bertan izan dira EUDELeko elkarteburua, Imanol Landa, Gizarte Ekintza Saileko foru diputatua, Isabel Sanchez Robles, eta Eusko Jaurlaritzako Gizarte Gaietako sailburuordea, Lide Amelibia.

Imanol Landa EUDELeko buruak nabarmendu du Bizkaiko Mapa egiteko “beharrezkoa dela koordinatuta lan egitea eta udalen beraien arteko akordioetara iristea”. “Udaloi dagokigu gure zerbitzu berriak non kokatu erabakitzea. Gure artean hitz egin behar dugu, sistema berria udalen errealitatera eta gizarte beharrizan berriei egokitzeko”. Halaber, erakundeen garrantzia azpimarratu du “konturatu gaitezen amaierarik ez duen etengabeko hobekuntzarako bidean abiatzen garela, iraunkorra izango den eta denboran iraungo duen gizarte zerbitzuen benetako sistema bat eraikitzeko”.

Prozesuak dirauen bitartean, EUDELek aholkularitza eta laguntza eskainiko dizkie udalei, haien kontsulta guztien inguruko laguntza teknikoa eta juridikoa eskainiz.

Isabel Sanchez Robles Gizarte Ekintza Saileko foru diputatuak gogorarazi du 2008ko Gizarte Zerbitzuei buruzko Legeak eta 2014. urtearen amaiera aldean hitzartutako Gizarte Zerbitzuen Zorroari buruzko dekretuak ezartzen dutela gizarte zerbitzuak hiritar guztien eskubide subjektibo bihurtu direla eta, helburu hori lortzeko, “denon artean Gizarte Zerbitzuen Euskal Sistema babestu eta eraikitzen jarraitzeko” erakundeen arteko lan-mahai bat sortzeko lehen urratsa eman da. Sanchez Roblesek azpimarratu du erakundeen arteko inplikazioa eta koordinazioa funtsezkoak direla helburu hori lortzeko: “erakunde bakoitzaren autonomiarekiko begirunetik, erabakitzeko eta koordinatzeko dugun erantzukizunetik eta errealitate printzipiotik, Bizkaiko Foru Aldundia eta udalerriak gidariak izango dira foru zein udalen eskumeneko baliabideak jaso eta lurraldeko zentroen hedatzeari buruzko proposamen bat egingo duen Bizkaiko Gizarte Zerbitzuen Mapa egiteko orduan”.

Continue Reading
By

26.01.2016 Nabarmenak

EUDELek administrazio elektronikoan eta prozeduretan araudi berria azaldu dizkie udalei

  • Gaur urtarrilaren 26an, asteartean, Euskadiko Udalen Elkarteak jardunaldia antolatu du Bilbon. Bertan, Estatu osoko legelari adituek Herri Administrazioen Araubide Juridikoaren eta Prozedura Erkidearen lege berriak aztertuko dituzte.
  • EUDELen jardunaldian 300 lagun inguru izan dira, hiru lurraldeetako udaletatik etorritakoaak. Gehienak, idazkaritza, kontu-hartzailetza eta zerbitzuko buruzagitzako goi mailako funtzionarioak.
  • Urte batetik bi urtera bitarteko epean, toki-erakundeek eta administrazio publiko guztiek araudi berrira egokitu beharko dute. Horrek administrazio elektronikoa lehenesten du, batere paperik gabekoa, interkonektatua eta gardena, eskubide eta betebehar gisa hartuta.
  • Erreformaren bidez, herritarrek eta enpresek administrazioarekin dituzten harremanak arinagoak eta irisgarriagoak izatea lortu nahi da, eta, horretarako, prozedurak sinplifikatu eta izapidetzeko aldiak murriztu nahi dira.

Prentsa Oharra
Deskargatu

Bilbon, 2016ko urtarrilaren 26an. Aurtengo urritik aurrera, administrazio guztiek araudi berria hartuko dute, eta horrek betebehar garrantzitsuak finkatzen ditu administrazio elektronikoaren eta prozeduren sinplifikazioaren arloan. 2015eko urriaren onetsitako Administrazio Prozedura Erkideari eta Sektore Publikoaren Araubide Juridikoari buruzko legeen ondorioa da dena.

EUDELek betebehar berriei buruzko informazioa eta orientabidea eman nahi dizkie udalei, oro har urtebeteko epean jarriko baitira indarrean. Administrazio elektronikoaren arloko alderdi batzuk izango dira salbuespena, horiek 2 urteko epea izango baitute indarrean sartzeko.

Indarrean dagoen herri-administrazioaren ereduaren erreforma handinahi honek bi ardatz osagarri ditu: Administrazioak herritarrekin eta enpresekin dituen kanpoko harremanak (Prozeduraren Legea, 39/2015 Legea, urriaren 1ekoa), eta, bigarrenik, antolakuntza eta funtzionamenduaren barne araubidea, eta, orobat, administrazioen arteko harremanenak (40/2015 Legea, urriaren 1ekoa.)

Esate baterako, Prozedurari buruzko 39/2015 Legeak ezagutzeko errazagoa den administrazio-prozedura erkide bakarra sortu du, gaur egun dauden prozedura berezi ugariak alde batera utzita, eta prozedura “espres” bat aurreikusi du, konplexutasun gutxiagoko kasuetarako.

Horrez gain, administrazio publikoekin bide elektronikoak erabiliz harremanetan jartzeko eskubidea eta betebeharra ezarri du lehenengo aldiz. Izapideak bide elektronikoen bidez egiteko nahitaezkotasuna ezarri die pertsona juridikoei eta pertsona fisiko batzuei.

Continue Reading
By

25.01.2016 Berriak

Arreta Soziosanitarioko Euskal Kontseilua aurrera doa bere helburuak lortzeko bidean

Erakundeek Kontseiluan dituzten ordezkari berriak bat datoz arreta integralagoa eta kalitate handiagokoa sustatzeko finkatutako helburuak lortu behar diren ustean.

Arreta Soziosanitarioko Euskal Kontseiluak 2016ko lehen bilera egin du gaur Lakuan. Bertan, Eudel-Euskadiko Udalen Elkarteko, hiru foru-aldundietako, eta Eusko Jaurlaritzako Osasuneko eta Enplegu eta Gizarte Politiketako sailetako ordezkariek sakonki aztertu dute zer aurrerabide egin den 2013ko uztailean onartutako ildo estrategiko soziosanitarioen esparruan ezarritako helburuak betetzen, autonomia-erkidego osoan zerbitzuok erabiltzen dituzten pertsonei emandako arreta hobetzeko, hartara.

Gaurko hitzorduan, halaber, kide berriak sartu dira Kontseiluan, iazko udal- eta foru-hauteskundeen ostean euskal erakundeetan izandako aldaketak direla medio. Ángel Toña Enplegu eta Gizarte Politiketako sailburua ere lehen aldiz izan da bilera-buru. Honako kide berri hauek sartu dira kontseiluan, bakoitza bere erakundearen ordezkari gisa: Iñigo Pombo, Bilboko zinegotzia eta EUDEL-Euskadiko Udalen Elkarteko ordezkaria, Beatriz Artozabal Arabako Foru Aldundiko Gizarte Zerbitzuetako foru-diputatua, Isabel Sánchez Robles Bizkaiko Foru Aldundiko Gizarte Ekintzako foru-diputatua eta Maite Peña Gipuzkoako Foru Aldundiko Gizarte Politiketako foru-diputatua. Ekitaldiaren ostean eta karguaren urteko txandakatzeari jarraikiz, Ángel Toñak Osasuneko sailburu Jon Darpóni laga dio kontseilu-burutza. Hark ere gaurko mahaian parte hartu du, Gobernuko beste zenbait goi-kargurekin batera: besteak beste, Osakidetzako zuzendari nagusi Jon Etxeberriarekin.

Horrez gain, hiru foru-aldundiek eta Osasun Sailak lankidetza-hitzarmen bana sinatzeko baliatu dute bilera: hain zuzen, Pazienteen Historia Klinikoaren erabilera partekatu eta Euskadiko laguntza-zerbitzuen prestazioa hobetzeko. Era berean, hiru foru-aldundiek eta aipatutako bi gobernu-sailek etorkizunean Arreta Soziosanitarioko Euskal Kontseiluarekin lankidetza-hitzarmen bat sinatzea adostu dute, Euskadin adinduenganako tratu txar fisiko eta ekonomikoak prebenitzeko eta hautemateko prozeduraren ezarpena sustatzeko.

Historia klinikoak

Osasun Sailak eta Osakidetzak lankidetza-hitzarmen bana sinatu dute hiru diputazioekin, Pazienteen Historia Klinikoen (OSABIDE) erabilera partekatzeko eta Euskadin laguntza-zerbitzuetako prestazioa hobetzeko. Hala, bi erakundeetako profesional baimenduak berehala sartu ahalko dira osasun-zerbitzuetako pazienteen Historia Klinikoan eta datu berriak txertatu ahalko dituzte, betiere, isilpekotasuna bermatuta eta pazienteak aurrez baimen idatzia eman badu.

Horrez gain, Gobernuak beste erakundeei dekretu bat aurkez diezaien ere baliatu dute bilera: premia bereziak dituzten haurrentzako arreta integratuaren prozesuaren bidez EAEn arreta goiztiarra erregulatzeko dekretu bat da, hain zuzen, eta datozen egunotan helaraziko zaio gobernu-kontseiluari, haren onarpena azter dezan.

Continue Reading
By

19.01.2016 Ebentuak

12:00. EUDEL Bilbao (Ertzilla kalea, 13). Bizkaia-Informazio bilera: prestazioen eta zerbitzuen zorroari buruzko dekretua eta gizarte zerbitzuen mapa.

BIZKAIA-INFORMAZIO BILERA: PRESTAZIOEN ETA ZERBITZUEN ZORROARI BURUZKO DEKRETUA ETA GIZARTE ZERBITZUEN MAPA

Prozesu horri buruzko informazioa emateko bilera bat egingo da alkateekin. Bilera horretan, EUDELeko presidenteaz gainera, Bizkaiko Foru Aldundiko Gizarte Ekintzako foru diputatuak eta Eusko Jaurlaritzako Gizarte Politikoetako sailburuordeak hitz egingo dute.

EGUNA: 2016eko urtarrilaren 26a.

ORDUA: 12:00etan

TOKIA: EUDELen ekitaldi-aretoa (Erzilla kalea 13, Bilbo)

GAI-ZERRENDA:

1.- Udal eskumeneko prestazioen eta gizarte zerbitzuen zorroari buruzko dekretua

2.- Gizarte zerbitzuen mapa.

– Zonifikazioa

– Plangintza

3.- Bizkaiko Gizarte Zerbitzuen Erakunde arteko Mahaia

Deialdia

Continue Reading
By