Egoitza Madrilen duen Herriaren Defendatzailearen jakinarazpena jaso du EUDELek, eta, bertan, Ingurumen eta Hirigintza Sailaren bitartez, udalei zuzendutako gomendio orokorraren berri ematen da, hasieran onartutako erregelamenduko arau orokorren testu osoak (ordenantzak, araudiak, aurrekontuak eta hirigintza planak) argitara ditzaten euren webgune instituzionaletan, “herritarrek modu errazagoan kontsultatu ahal izan ditzaten, agiriok jendaurrean jartzeko epeak irauten duen bitartean. Modu horretan, ez dute udal egoitzara berariaz joan beharrik izango”.

 Defendatzaileak dio, webguneetan arau orokorrak ediktuen tauletan bezala argitaratuz gero, “arreta hobea emango zitzaiela interesdunen informazio-eskariei, eta interesdunek modu errazagoan, azkarragoan eta hara joan beharrik gabe eta ordutegirik gabe ezagutu ahal izango zituzten testu horiek. Ondorioz, gehiago parte hartu ahal izango lukete toki esparruko gai publikoetan”.