• Garapenerako Lankidetzaren Euskal Agentziak UN Women erakundearekin batera “Mujeres y políticas municipales a favor de la Igualdad” izeneko proiektua bultzatu du bertan
• Emakundek eta EUDELek tokiko eremuan duten eskarmentua aurkeztu dute esperientziak  elkarbanatzeko nazioarteko gunean 

El Salvadorren abenduak 2 eta 3an ospatu den “Promoción e intercambio de buenas prácticas para implementar políticas locales a favor de la igualdad de género” izeneko gunea Garapenerako Lankidetzaren Euskal Agentziak Nazio Batuak Emakumeak erakundearekin batera bultzaturik proiektuaren emaitza da. Bertan berdintasunaren aldeko euskal udal politikak eredu bezala aurkeztu dira. Emakunde/Emakumearen Euskal Erakundea gonbidatua izan da gune honetara alor honetan duen esperientzia aurkezteko, eta udal eremuan bultzatzen dituen berdintasun politikak Eudel-ekin elkarlanean egiten dituenez (Berdinsarea, Berdinbidean edota erakunde arteko hainbat eremuetan), Euskal Udalen Elkarteak ere parte hartu du gonbidatu bezala nazioarteko gune honetan. Era honetara, El Salvadorren izan dira egunotan Izaskun Landaida Emakundeko zuzendaria eta Ibon Uribe Galdakaoko alkatea eta EUDEL-eko berdintasun arduraduna, erakunde bakoitzeko teknikariekin batera.

Gunearen helburua euskal udaletan berdintasunerako tokiko araudian egin diren praktikak azaltzea izan da, baita berdintasuna bultzatzen duten tokiko agendena. Eremu honetako erronka nagusiak eta orain artean ikasitakoak erakutsi ditu El Salvadorren euskal ordezkaritzak. Emakundek Berdintasunerako Euskal Legearen onartu zenetik hamar urte hauetan eman diren aurrerapausoak azpimarratu ditu bertan, eta honekin batera azaldu ditu Euskadiko Berdintasunerako Planak eta araudiari egiten zaion aurretiazko ebaluazioa genero ikuspegitik.  Bai Emakundeko ordezkaritzak zein Eudel-ekoak bi erakundeen arteko hamar urte baino gehiagoko lankidetza estrategikoa azpimarratu dute eta honen fruituak azaldu dituzte, hala nola, gazteen artean sexismoa prebenitzeko Beldur barik programa, Berdinsarearen barruko emakumeen kontrako indarkeriaren aurkako batzordea, Virginia Wolf Basqueskola euskal emakume hautetsientzako ahalduntze eskola edota berdintasunerako udal ordenantzak.

Gunea Mujeres y políticas municipales a favor de la igualdad en El Salvador proiektuaren barruan kokatzen da, eta proiektu hau Garapenerako Lankidetzaren Euskal Agentziak bultzatzen du. Proiektuaren helburua udal gestioaren ikuspuntu tradizionala gainditu eta berdintasunean oinarritutako tokiko garapenerako gestioaren alde egitea da, berdintasunaren araudia indartuz, eta genero ikuspegia duten programa eta aurrekontuak sortuz. Helburuen artean, genero errailak gainditzen joatea, emakumeen eskubideetan aurrera egitea (indarkeriarik gabeko bizitza, diskriminaziorik gabekoa, aukera berdintasuna) eta emakumeen behar eta lehentasunak tokiko garapen planetan eta udalen ekintzetan presente egotea.

• Yo soy (Pasaia) eta 40 golpe (Berriatua) izan dira kategoria bakoitzeko lan irabazleak.
• Jabekuntza eta emakumeen batasuna, mikromatxismoen identifikazioa, gizarteratze ezberdindua eta maitasun erromantikoa bezalako elementuak oso presente egon dira aurkeztutako eta saritutako lan askotan.
• Sariak Beldur Barik Topaketan banatu dira, Amurrioko Antzokian.

Pasaiatik bidalitako “Yo soy”  lana izan da lehen kategoriako (12 eta 17 urte) lan irabazlea eta “40 golpe”, Berriatuatik bidalita, bigarren kategoriakoa (18 a 26 años). “Yo soy” Priscila Samanta Black Txoni, Sonia Tejera Danger dancer, Joselyn Valencia Sua Girl, Sara Santana Kactusha, Jessica de Sousa La Ruina eta Daniela Alejandra maia Da Silva La Kapri dira eta 500 euro eramango dituzte. Epaimahaiaren iritziz, bideoklip honek kultur aniztasuna, gorputz aniztasuna, kolonialismoa, klasismoa, arrazakeria, gordofobia, indarkeri fina eta mikormatxismoei buruzko mezu feminista bat heleraztea lortu du. Horretarako, reggaeton-a erabili dute, orainarte matxistatzat hartua den genero bat berradieraziz. “40 golpe” lanaren egileak, Leire Bereikuak ere, 500 euroko saria eraman du. Epaimahaiaren arabera, lan honek mota askoriko indarkeriak agerian jartzen ditu, indarkeria fisikora mugatu barik. Lan honek indarkeria sexistaren irudikapen guzti hauek batu egin ditu: mikromatxismoen identifikazioa, emakumeen gorputzekiko indarkeria estetikoa, gizarteratze ezberdindua mutilei akzio rolak egokituz eta neskei aldiz, zainketa eta pasiboak diren rolak, publizitate sexista, pertsona eta materialen zainketa lanen banaketa, eraso sexistak, emakumeen gorputzak gauza bihurtzea sexu erakargarria bezla, musika eta kirolean matxismoaren identifikazioa. Amaiera emanez mobilizazio feministara dei egiten duen mezu jabetu batekin.

Lehen kategoriako aipamen berezia Basauriko  “Hau ez da bakarrik jolas bat” bideoari eman zaio, Ane Cenecorta egileari. Epaimahaiak erabaki du lan honi sari hau ematea indarkeria sexistarekin amaitzeko hezkuntzan jartzen duelako garrantzia, eta baita baloreen transmisioan. Lan honek 300 euroko saria jaso du.

Epaimahaiak bigarren kategoriako aipamen berezia bi lanen artean banatzea erabaki du. Lan hauek  Donostiako “Yo soy preciosa” eta Iurretako “Sin ti soy yo” dira. Lan bakoitzak 150 euroko saria eramango du. “Yo soy preciosa” lanaren egileak Ainhoa Bakaikoa, Idoia Machimbarrena, Elena Otegi, Leire Zabala, Alejandra Sanz eta Elena Gorbea dira. Epamahaiak Down sindromea duten neska talde baten hausnarketak nork bere ezagutza, gorputz, plazer eta sexualitatearen desioaren inguruko hausnarketak isladatzen duen lan honek Beldur Barik Jarrera agertzen du, mezu jabetu bat erabiltzen dutelako eta momentu oro emakumeen arteko elkartasuna ikusi dezakegulako. Bigarren aipamen berezia “Sin ti soy yo” lanarentzat da, Ester Ferré García eta Judit Ferré García dira lan honen egileak. Amaral taldearen “Sin ti no soy nada” kanta ezaguna erabiliz, buelta eman diote maitasun erromantikoaren himno nagusienetariko bateri, printzesa eta printzipe urdinen estereotipoak apurtuz eta ozen oihukatuz “Sin ti soy yo” .

• Emakundek bultzatutako eta EUDEL-en eta hiru Foru Aldundien parte-hartzearekin Beldur Barik 2015 programaren amaiera ospatuko da azaroaren 28an Amurrioko Topaketan.
• Beldur Barik programak 69 udalerritako  310 ikus-entzunezko lan jaso ditu. Programak gazteei indarkeria sexista identifikatzeko eta horiei Beldur Barik Jarrerarekin aurre egiteko tresnak eskaintzen dizkie.
• Emakumeenganako Indarkeriaren Aurkako Nazioarteko Eguna dela eta, erakundeek puntu lila erabiltzera deitu dituzte hiritarrak emakumeenganako indarkeriaren aurkako daudela erakusteko

Beldur Barik programa, gazteekin batera, indarkeria sexista prebenitzeko urteroko programa da. 2009an jarri zen abian Emakundek eta EUDEL-ek bultzatuta, Berdinsarea- Berdintasunaren aldeko eta Emakumeenganako Indarkeriaren aurkako Euskadiko Udalen Sarea-ren esparruan. Egun, Emakundek bultzatzen du eta Arabako, Bizkaiko eta Gipuzkoako Foru Aldundien, zein EUDEL-en babesa eta finantziazioa jasotzen ditu. Gainera, Eusko Jaurlaritzako Hezkuntza, Hizkuntza Politika eta Kultura Sailaren, Euskal Herriko Unibertsitatearen (EHU) eta EITBren laguntza du.

2015ko Beldur Barik Topaketa Amurrion ospatuko da azaroaren 28an, larunbatean. Jaiak balio izango du urte osoan zehar, euskal geografia osotik gazteekin garatutako lan handiari amaiera emateko. Topaketan Beldur Barik ikus-entzunezko lehiaketaren (12 eta 26 urte bitarteko gazteei zuzendutakoa) sariak banatuko dira. Ezberdintasun egoerei aurre egiteko errespetuan, berdintasunean, askatasunean, autonomian, erantzukidetasunean eta indarkeria sexistaren ukapen irmoan oinarritutako jarreren ikus-entzunezko adierazpenak saritzen dira.

Edizio honetan 310 izan dira aurkeztutako lanak, 69 udalerritakoak. Horietatik 216 lehen kategoriakoak dira, 12 eta 17 urte bitartekoena. Bigarren kategoriari dagokionez, 18 eta 26 urte bitartekoa, 94 lan aurkeztu dira. Kategoria bakoitzeko bi sari banatuko dira: 500 euroko lehen saria eta 300 euroko aipamen berezia. Horietaz gain, beste bi sari ere banatuko dira. Web-gunean egingo den herri-bozkaketarekin herria-saria aukeratuko da eta 300 euroko saria jasoko du. Eta, aurten ere, pasa den urtean lehenengo aldiz egin zen bezala, ikus-entzunezko ekoizpen onena baloratuko da 300 euroko sariarekin. Era berean, nabarmentzekoa da tokian-tokiko Beldur Barik lehiaketa ugari antolatu direla (Beldur Barik web gunean Lehiaketa Lokalei buruzko informazioa aurkituko duzue: http://beldurbarik.org/category/lehiaketa-lokalak-2015/).