• Beldur Barik programaren barruan, uda garaian errespetuan eta berdintasunean oinarritutako jarrerak bultzatzeko helburuaz egin da
• Kartel bat eta eraso sexistak prebenitzeko gida bat jarri dute eskuragarri jairik gabeko uda berezi honetan erabiltzeko

“Eraso sexistarik gabeko uda” kanpaina, eraso sexistak prebenitzen laguntzeko sortutakoa, Beldur Barik programaren barruan kokatzen da, urtero Emakundek bultzatu, eta Arabako, Bizkaiko eta Gipuzkoako Foru Aldundiek eta EUDEL-Euskadiko Udalen Elkarteak laguntzen duten gazteei zuzendutako kanpainan, hain zuzen ere.

Aurreko urteetan jaietako eraso sexistak prebenitzeko kanpaina egin da, baina Covid-19aren pandemiak eragindako aurtengo egoera berezia ikusita, kanpaina ez da jaietan oinarritu baizik eta udan, orokorrean.

Eraso sexistak prebenitzea guztion kezka da: herritarrena eta erakundeena, bereziki tokiko eremuko erakundeentzat, hiritarrengandik gertuen daudelako. Horregatik, eta udan ere errespetuan, berdintasunean eta autonomian oinarritutako jarduerak bultzatzeko helburuz, Beldur Barik programaren barruan zenbait material eskaini zaizkie EAEko udalei haien bidez herritarrak gai horrekin sentikortzera eta inplikatzera zuzendutakoak. Kartel bat eta eraso sexistak prebenitzeko gida bat.

Udalei bidalitako material hauekin, indarkeriaren kontrako irudi bateratu bat bilatzeaz gain,  lortu nahi  da herrietan lan-prozesu ezberdinak sortzen joatea,  gazteekin,  aisialdi-giroetan eman daitekeen biolentzia sexuala antzemateko, prebenitzeko eta hari aurre egiteko banakako zein taldeko erantzunak garatzeko.

Kanpaina bultzatzen duten jarrera aktiboa eskatzen dute emakumeak errespetatzen ez dituzten edozein adierazpen fisikoren edo hitzezkoren kontra.  Errespetuan, berdintasunean eta autonomian oinarritutako jarrera. Eta gazteei espezifikoki baina hiritar guztiei deia egiten diete euren inplikazio eta jarrera aktiboarekin, udan ere jarrera sexistarik gabeko espazioak sortarazten laguntzeko.

JEITSI KARTELA

• ‘Virginia Woolf Basqueskola’ tokiko hautetsien sareak webinar bat antolatu du uztailaren 3rako, “Feminismoa eta eraldaketa politikoak” gaiari buruz, Mari Luz Esteban antropologo feministaren eskutik.

• EUDELeko ordezkari Angela Eguiak (Gordexolako alkatea) eta Emakundeko zuzendari Izaskun Landaidak irekiko dute jardunaldia, 16:30ean. Streaming bidez ikusi ahal izango da, webgune honetan: virginiawoolfbasqueskola.eus

• Hitzaldiaren ondoren, lau udal hautetsik gidatutako solasaldia egingo da. Webinarrean izena ematen duten emakumezko alkate eta zinegotziek modu aktiboan parte hartu ahal izango dute, zoom plataformaren txataren bitartez galderak eta iruzkinak eginez.

Bilbao, 2020ko uztailaren 2a. UPV/EHUko gizarte antropologiako irakaslea, feminista, aktibista eta jardunaldi honi izenburua eman dion El feminismo y las transformaciones de la política liburuaren egilea den Mari Luz Esteban izango da ekimenaren hizlari nagusia. Gakoak emango ditu ondoren Euskadiko lau hautetsi hauek egingo duten solasaldirako: María Teresa Córdoba Fernández, Lapuebla de Labarcako alkatea; Pilar Legarra Cortajarena, Asteasuko alkatea; Paula Amieva Clemente, Getxoko zinegotzia, eta Idoia Inoriza Bustamante, Muskizko zinegotzia.

Nola eragiten dute mugimendu feministek politika instituzionalaren esparruan eta, zehazkiago, tokiko politikaren esparruan? Zer onura dakar mugimendu feministaren eta politika instituzionalean zuzenean parte hartzen duten emakumeen (alkateak, zinegotziak eta teknikariak) arteko harreman bizi eta aberasgarriak?  Gai horiek jarriko dira mahai gainean jardunaldian, besteak beste, eta gai nagusia izango da Euskadin mugimendu feministak azken hamarkadetan bizi izan dituen aldaketak eta horiek zer eragin izan duten politikaren esparruan.

EUDELek eta Emakundek 2012. urtetik sustatu duten Virginia Woolf Basqueskola espazioak aurrera jarraitzen du, Euskadiko emakumezko tokiko hautetsientzat interes handikoak diren gaien inguruko truke, analisi eta eztabaida espazioak antolatzeko lanean. Basqueskola sareak alkate eta zinegotzien lan politikoa babesten du, eta haiek ahalduntzen eta berdintasuneko tokiko politikak ezartzen laguntzen du. Basqueskola espazio parte-hartzaile eta plurala da; aliantzak sortzen ditu Euskadiko udaletan ikuspegi politiko guztietako hautetsien artean, hala gobernuko nola oposizioko hautetsien artean.

Informazioa guztia, hemen: www.virginiawoolfbasqueskola.eus

@basqueskola               basqueskola@eudel.eus

Hizlaria:

Mari Luz Esteban. Medikuntzan lizentziaduna eta gizarte antropologian doktorea. Familia plangintzako mediku gisa egin zuen lan 1984tik 1996ra arte. 1994tik gizarte antropologiako klaseak eman izan ditu Leóngo Unibertsitatean lehenengo, Nafarroako Unibertsitate Publikoan (UPNA-NUP) ondoren, eta, gaur egun, Euskal Herriko Unibertsitatean (UPV-EHU). Aditua da antropologia feministan, baita REDAMeko (Medikuntzaren Antropologiaren Latindar Sarea) kidea ere. Bere ikerketek ardatz dituzte Medikuntzaren Antropologiaren esparrua, Antropologia Feminista, eta Gorputzaren eta Emozioen Antropologia. 1980. urtetik, ekimen eta elkarte feminista ugaritan parte hartu izan du: Bizkaia Emakume Asanbladaren kide izan zen, baita Mendekotasunari Arreta eskaintzeko Euskal Sistema Publikoaren aldeko Plataformako kidea ere. Gaur egun, Basauriko Emakumeen Taldeko (Bizkaia) eta Marienea Elkarteko (Basauriko Emakumeen Etxea) kidea da; lehenengo horretan, bere unibertsitate garaitik da kidea. Liburu ugari idatzi ditu; hauxe da azkena: El feminismo y las transformaciones de la política; hain zuzen, hori hartu da erreferentziatzat jardunaldi hau antolatzeko.

LGTBI kolektiboa, berriro biltzen da ekainaren 28an, aurten ere, euskal gizartearen aurrean eskubideak eta bizikidetza aniztasunetik aldarrikatzeko., 1969ko ekainaren 28an, joan den urtean 50. urteurrena ospatzen ari ginela, Stonewalleko errebolta gertatu zen New Yorken, eta data hori bihurtu da, urtero, gure aldarrikapenak eta lorpenak agerian jartzeko eguna; ezinbestean, data hori izan behar da oraindik lortu gabe dugun guztia agerian jartzeko eguna ere.

Eusko Jaurlaritzaren LGTBI kolektiboarentzako Informazio eta Laguntza Zerbitzua den Berdindu zerbitzu publikoak, eskerrak eman nahi ditu bizitza eta ahaleginak eman dituzten pertsona guztiei sexu-askapenaren aldeko borrokaren alde, eta, gaur egun, gizartea sentsibilizatzeko, kontzientziatzeko eta eraldatzeko lana antolatzen eta gauzatzen jarraitzen dutenei. Era berean, hemen eta gure mugetatik kanpo isilik irauten duten pertsona guztiak aitortu eta ahaldundu nahi ditu. Eta oso bereziki 2020. urte honetan, hain ohikoa ez den egoera bat bizitzen ari garen honetan.

Mundu guztian zehar etxeetako itxialdi orokorrera behartu gaituen pandemiak, kolektiboko pertsona asko erabateko babesgabetasunera eta ikusezintasunera eraman ditu. Eman diren egoera askoren artean, arreta jarri nahi dugu beren bizikidetza-ingurunean armairuan berriz gordetzeko betebeharra ikusi duten pertsona guztiengan, bai eta hurbileko pertsonen zainketen zama beren gain hartzen duten eta honengatik, aldi honetan bereziki bakardadea eta urruntasuna jasan duten LGTBI kolektiboko pertsona guzti horiengan.

Berdindu! -n argi dugu ezin dela adi egoteari utzi. Azken urteotan, agerikoa da faxismoa defendatzen duten taldeen itzulera eta foro publiko jakin batzuetatik ere egiten diren saiakerak, LGTBI kolektiboaren eskubideei buruzko zalantzaren hazia mahai gainean jartzea, bai eta pertsona guztien berdintasunari buruzkoa ere.

Horregatik uste dugu berebiziko garrantzia dutela bizitza eta eskubideak babesten dituzten lege arau berrituak. Oso garrantzitsua da, halaber, LGTBI kolektiboaren egungo errealitatea ezagutzea, hiri-zurrumurru eta -kondairez gain, egiaztatutako eta kuantifikatutako datuekin.

Ikusgaitasun lesbiko, trans eta bi-en egunak, trans despatologizazioaren aurkakoak, LGTBIfobiaren kontrakoak… bat egiten dute gaur egun, garen bezala izatearen eta nahi dugun bezala desiratzearen harrotasunaren aldarrikapenean, bakoitza bere erara, denak eta anitzak.

Hori guztiagatik, Berdindu!-tik pertsona guztiei egun hau sexu-askapenaren alde egiten ari garen aurrerapen guztiak ospatzeko aprobetxatzera animatzen ditugu.

COVID-19ren urtean, oso konplexua da LGTBI kolektiboarentzat kalera irtetea errealitatea ikusarazi eta aldarrikatzera. Gainera, arduragabekeria litzateke herritarrei kalean bilera masiboak egitera deitzea. Baina, krisietatik aukerak atera behar dira, eta, horregatik, ez da aukera galdu behar denboraldi honek gure gizartea eraldatzeko eman duen hausnarketan; eta hori egin beharra dago banantzen gaituen guztia kenduz eta izateko eta adierazteko askatasuna eman behar diren bizikidetza-arauak indartuz, LGTBI kolektiboko pertsonei, eta gainerako pertsona guztiei.

Herritarrei eskatzen diegu, beraz, sentsibilizazio- eta aldarrikapen-ekitaldi guztiekin bat egin dezatela, foro publikoetatik, komunikabideetatik eta sare sozialetatik erakuts dezatela gaur aniztasunaren aldeko borroka-eguna dela, eta balkoietan eta leihoetan bandera zintzilika dezatela.