Sailetako Albisteak

26.06.2015 Berdintasuna

EUDEL Berdintasunerako presidentea izango da Europako Udalen Kontseiluan

Europak Euskadiko udalen esku utzi du berdintasunerako tokiko politiketako lidergoa

Izendapena CMRE-ko Zuzendaritza Batzordeak egin du ofizial, ostegunean eta ostiralean Munichen egindako bileran. Bertan, hain zuzen ere, Euskadiko Udalen Elkarteko elkarteburuak parte hartu du.

Ibone Bengoetxeak gustura hartu du albistea, eta oso pozik dagoela adierazi du, Euskadiko udalek eta herritarrek egindako lanaren eta ibilbidearen bermea dela uste duelako. Aldi berean, Euskadiko instituzio guztiek emakume eta gizonen berdintasunaren alde garatutako lankidetza ere aitortu dute horrela: “Elkarrekin lan egin dugu, Euskadi berdintasunerako politika publikoetako erreferentea izan dadin”.

Bilbon, 2015eko ekainaren 26an. Europako Udalen eta Eskualdeen Kontseiluak (CMRE) EUDELen esku utzi du bertako Berdintasuneko Lantaldeko presidentetza (Standing Committee for Equality). Hain zuzen ere, herrialde kideetako berdintasunerako tokiko politikak koordinatzen dituen organo gorena da.

Gaur egun, Galdakaoko alkatea, Ibon Uribe, EUDELeko Batzorde Eragileak dimentsio guztietako berdintasunerako daukan ordezkaria dela kontuan hartuta, lantaldeko presidentetza hartuko du bere ardurapean.

Gaur goizean, izendapena modu ofizialean jakinarazi da Munichen, CMRE-ko Zuzendaritza Batzordeak ekainaren 25ean eta 26an Alemaniako hiri horretako Komunitate Juduaren Zentro sinbolikoan egindako urteko bileran. Ibone Bengoetxea Europako tokiko gobernuetako emakume eta gizon liderren arteko goi mailako topaketara joan da, Euskadiko udalen ordezkari gisa.

Bengoetxeak Euskadiko maila askotako gobernantza-eredua balioetsi du, baita Europa mailako lanerako tresna gisa daukan ahalmena ere. “Emakume eta gizonen berdintasuna lehentasuna da garapen globalari begira. Aurrera egiten jarraitzeko, zenbait herrialdek partekatutako estrategiak eta aliantzak ere aplikatu beharko ditugu”.

Euskadi-Suedia

Hurrengo bi urteetan, 2017. urtearen amaierara arte, Euskadiko Udalen Elkarteak presidentetza izango du bere ardurapean, berdintasunaren arloan berarekin lankidetza-harreman ezin hobea daukan elkarte suediarrak lekukoa eman ostean. Europako Iparraldeko herrialdeak aurreratuenetakoak dira berdintasunaren arloan, eta Euskadiko udalek Europako Iparraldeko eredurantz begiratu dute betidanik.

INFORMAZIO GEHIAGO:
www.eudel.eus/eu/areas/igualdad

24.06.2015 Berriak

Tokiko Korporazio berriak: 2015-2019 Legealdiari buruzko datu eguneratuak

EUDELek 2015-2019 legealdi berriko alkate eta zinegotzien zerrenda argitaratu du www.eudel.eus/herririkherri bere webgunean.

Era berean, Elkartea ‘Euskal Udalen Tokiko Direktorioa’ liburuaren edizio berria lantzen ari da, eta berorrek udalekin harremanetan jartzeko datu eguneratuak eskainiko ditu (web, posta elektronikoa, telefonoa, faxa, e.a.).

Laster argitalpen horrexeri buruzko informazio gehiago emango dugu.

23.06.2015 Berriak

Agintaldi berriko hautetsien lehenengo topaketa

Durangon, 2015eko ekainaren 22an. Durangoko Landakogunean, agintaldi berriko ia 300 alkate eta zinegotzi elkartu dira, Euskadiko Udalen Elkarteak deituta. Euskadiko Tokiko Gobernuen lehenengo topaketa izan da, EUDELen Batzar Eratzailearen aurretik. Hain zuzen ere, ziurrenik, Batzar Eratzailea uda ostean egingo da, Batzorde Eragile berria eta Lurralde Batzordeak aukeratzeko.

JARDUNALDIKO HITZALDIAK

Harrera eskuliburua: “Udal politika berriaren ardatzak”
Rafael Jiménez Asensio

Udal Gobernuaren testuingurua araudiari eta arlo ekonomiko-finantzarioari dagokienez
Sebastián Zurutuza

Agintaldiaren hasiera: Gobernatzeko gakoak
Enrique Sacanell

Euskadiko udalen ordezkariak tokiko gobernu berriak osatzen dituzten pertsona guztiei helarazi die EUDELek egiten duen lanaren gaineko babesa eta laguntza. Agintaldiaren hasieran, Udalbatzak berritu egiten dira, eta, beraz, garrantzi handiko unea da; hori horrela, EUDELen elkarteburuak beharrezkoak diren adostasunak eskatu ditu berriz ere, Udal Legea onartzeko; izan ere, arau horren bitartez, udalek “ziurtasun handiagoak izango dituzte eguneroko lanean”.

Jardunaldian, herri administrazioari eta udal politikari buruzko aditu batzuek ere hartu dute parte, eta azken lau legegintzaldi-urteei buruz duten ikuspegia eman dute. 2011-2015 denbora-tartean, Tokiko erakundeek araudi-aldaketa handiak izan dituzte: hortxe daude, esate baterako, Aurrekontu Egonkortasunerako eta Iraunkortasun Finantzariorako Legea, eta Tokiko Administrazioaren Arrazionalizazio Legea (tokiko erreforma); azken horri dagokionez, EAErako egin den moldaketan, efekturik sakonenak foru arauen bitartez leundu dira.

Bakoitzaren neurrira eskainitako prestakuntza

Urrian eta azaroan emango den Prestakuntza Programa berriaren bitartez, EUDELek zenbait tresna eskaini nahi dizkie hautetsi berriei, lagungarriak izango zaizkielakoan 2015-2019 agintaldiko gobernu-zereginen garapenean.

2015eko udazkeneko prestakuntza beharrei buruzko galde-sorta

Programa presentziala osatzeko, udal kudeaketarako material eta tresna praktikoak ere eskainiko dira, bai eta laguntzarako dokumentu birtualak ere.

Harrerako Gidaliburua: 2015-2019 Tokiko Politika berriaren ardatzak”

EUDELek argitaratutako Harrerako Gidaliburua udalbatza berrietako kideei dago zuzenduta, bai gobernu-lanetan daudenei zein oposiziokoei. Gidak agintaldi honetako tokiko politikaren ardatz estrategikoei buruzko oinarrizko kontzeptuak, informazio interesgarria eta gomendioak jasotzen ditu: iraunkortasun ekonomiko-finantzarioa eta eraginkortasuna, berrikuntza eta kudeaketa aurreratua, Gobernu ona, gardentasuna, parte-hartzea eta berdintasuna, besteak beste.

Gidaliburuko hasierako kapituluak lan politikorako funtsezkoak diren gaitasunak eta trebetasunak sendotzen ditu; ezaugarri horien artean daude, esate baterako, lidergoa, komunikazioa eta negoziazioa. Era berean, antolakuntza-arloko beste gai batzuk ere jasotzen dira bertan; adibidez, pertsonen zuzendaritza edo politikaren eta kudeaketaren lerrokatzea.

*EUDELen Harrerako Gidaliburua 2015-2019: http://www.eudel.eus/web/docum/manualacogida/Harrera_eskuliburuaEUDEL2015_2019.pdf

08.06.2015 Berriak

Ekainaren 28rako 25eko Leioako Udalak Ikaskuntza, Komunitatea eta Tokiko Politikari buruzko jardunaldi eta tailer bat hartzen ditu

Ikaskuntza, Komunitatea eta Tokiko Politika.

Ekainak 25, Osteguna. Kultur Leioan. 9.30etatik – 18.30ak arte.

Pertsona (eta bere ikaskuntza) zainduz, talde-hazkuntza (eta taldea) ekarriko dituzten harreman estiloak, egiturak eta jolas-arauak bilatuz osatu zen, orain dela bi urte HerriLaborategia: Komunitatea IkasIngurune gisan sustatu, esperientziak saretu eta norabide honetan jardungo duten politiken garapena laguntzeko.

Hartarako, antolaketak gonbidatzen gaitu Ekainaren 25eko Jardunaldira eta 26, 27 eta 28an izango dugun tailerrera.

JARDUNALDIA
Ekainak 25
Herritarregandik, enpresa mundutik, hezkuntzatik…Ikaskuntza eta Komunitatea, eta elkarrekin hazteko bide ezberdinak urratzen ari diren esperientziak eta ikuspuntuak.

IKASTAROA
Ekainak 26-28
HaurrenHiria proiektua eta komunitatea ikas ingurune gisa lantzeko oinarrizko kontzeptuak eta praktiken inguruan hausnartzeko tailerra izango dugu Francesco Tonucci, Antonella Prisco eta Solasgunerekin.

Lotura honetan irakur dezakezu informazio osoa, edo deitu zalantzarik gabe ezer argitu behar baduzu (94.4209488 Innobasque).

Izen Ematea: evenbrite

Informazio gehiago: info@herrilaborategia.org // 94.4209488 (Innobasque)

Ekainaren 25eko Jardunaldiaren PROGRAMA

Hauxe da osotu dugun egitaraua (Lotura honetan eskuragarri):

9:30H – 12.00 Aurkezpena eta IKUSPUNTU ANITZAK:
Ongietorria Mari Carmen Urbieta (Leioako Udala)*

– Abusu Sarea (eskola eta auzo esperientzia)
– Bizitoki (eskola eredua eta komunitatea)
– Hirikilabs (makers eta herritarren ikaskuntza)
– Zerbikas (ikaskuntza eta zerbitzua)*
– Wikitoki (kolaborazio erlazioak eta praktikak)*

Laguntzailea: Gurutze Ezkurdia. Euskal Herriko Unibertsitatea.

12:00H. – 12:30H. Atsedena.

12:30H. – 14:00H. HITZALDIAK:

– Jara Rocha “Herri-tar antolaketa aukerak, ezagutza, ongizatea eta prokomuna” *
– Ponente por confirmar “Pertsona eta komunitateen hazkuntzarako harreman estilo berriak” *
Eta ondorengo ELKARRIZKETA

Laguntzailea: Eukene Fernandez. Solasgune.

14:00H. – 15:00H. Bazkalordua.

15:00H. – 17:00H. HERRIAK SARETZEN.

– Leioa (Herrigune IkasKomunitatea)
– Bergara (Elkarlana Sarean)
– Tolosa (Zeharkotasuna)
– Berriz (Eragileen koordinazioa)
– Arartekoa (Umeen Kontseilua)

Laguntzailea: Enrique Arce. Berritzegune Leioa.

17:00H. – 18:30H. HITZALDIAK:

– Jokin Bildarratz. “Politika Komunitatearen zerbitzura”*
– Francesco Tonucci “Politika egin umeen begiradaz” *
Eta ondorengo ELKARRIZKETA

Laguntzailea: Bizkaiko Foru Aldundia

18:30H. AMAIERA: Gotzon Bernaola (Innobasque)

* Gazteleraz. Jardunaldian euskeratik gaztelerara aldibereko itzulpena izango da.

05.05.2015 Nabarmenak

2011-2015ko Euskadiko Udalen balantze ekonomikoa

EUDEL-Euskadiko Udalen Elkarteak eskura jartzen die bai udalei bai gainerako tokiko euskal erakundeei UDALA aldizkariaren ale berezia, legealdiaren amaierarekin batera.

Argitalpen honen bidez, Euskadiko Foru Ogasunen zerga itunduen ondoriozko diru-bilketaren bilakaera aztertu dugu, bai halaber berorrek nolako eragina izan duen Udalak Finantzatzeko Foru-Funtsetan 2011-2015 legealdian zehar.

Era berean, atxikita doan eranskinean 2014ko ekitaldiko likidazioaren datuak azaltzen ditugu, 2015eko otsailean Herri-Dirubideen Euskal Kontseiluak onartutako kopuruetatik datozenak, baita Finantzetako Lurralde Kontseiluek ondoren emandako informaziotik ere.

Aldizkaria formatu digitalean, eskuragai hemen:

http://www.eudel.eus/eu/publicaciones/udala

13.04.2015 Ogasuna eta Finantzak

EUDELek eta bizkaiko foru aldundiak europako kontseiluarekin lan egingo dute tokiko finantzak hobetzeko adierazleen proiektu batean

Gaur goizean sinatu dute hitzarmena Bizkaiko Foru Aldundiko Lehendakaritza Saileko diputatuak, Unai Rementeriak, eta EUDELeko presidenteak, Ibone Bengoetxeak. Horren arabera, Europako Kontseiluarena den udalen erkaketa ebaluazioa egiteko ‘Local Finance Benchmarking’ tresna lurraldeko udaletan ezartzeko proba pilotua egingo da.

Bilbo, 2015eko apirilaren 13a. Gaur goizean, Bizkaiko Foru Aldundiak eta EUDELek (Euskadiko Udalen Elkarteak) berretsi egin dute Bizkaiko udaletan modernizazioa, gardentasuna eta Gobernu Ona ezartzen laguntzeko konpromisoa; hau da, udaletako ekonomiaren eta aurrekontuen informazioari buruzko adierazleen sistema integrala sortzeko lankidetza hitzarmena sinatu dute.

Hitzarmena
Deskargatu

Lehendakaritzako diputatu Unai Rementeriak eta EUDELeko presidente Ibone Bengoetxeak sinatu duten akordioaren bidez proba pilotu bat egingo da Lurralde Historikoko udaletan udalen erkaketa ebaluazioa egiteko tresna ezartzeko. Tresna berri honen sorrera Europako Kontseiluak bermatzen du, tokiko finantzen erkaketa ebaluazioa egiteko ‘Local Finance Benchmarking’ (LFB) izeneko programa duelako. Tresna honek adierazle ekonomiko batzuk ditu, udaletako diru-sarrerekin eta aurrekontuko kudeaketarekin erkatu direnak.

Europako Kontseilua, beraz, hirugarren kolaboratzailea da Europako tresna Bizkaiko udalen errealitatera egokitzeko proiektu pilotu hau bultzatzeko xedean. Tresna honi esker, gainera, tokiko finantzen kudeaketa politiko eta ekonomiko hobea egingo da, bi ardatz kontuan hartuta: gardentasuna eta herritarrei kontuak ematea. Ardatzok funtsezkoak dira udalen Gobernu Onerako.

Unai_Rementeria_Eudel_finantzak_hobetzeko_akordioa (43380 Kb.)

Ibone_Bengoetxea_Eudel_finantzak_hobetzeko_akordioa (164393 Kb.)

Errekurtsoak_Eudel_finantzak_hobetzeko_akordioa (83400 Kb.)

Hitzarmeneko konpromisoak

Hitzarmen honen bidez, Bizkaiko Foru Aldundiak eta EUDELek proiektua abian jartzeko konpromisoa hartu dute. Udaletako adierazleen sistema koordinatuko dute eta batera hausnarketa egiteko esparrua sortuko dute; horrela, lurraldeko udalen ekonomia eta aurrekontu esparruetako informazioa hobeto kudeatzen eta komunikatzen lagunduko dute.

Lankidetzaren esparruan, EUDELek zuzendu, diseinatu eta jarraituko ditu hasieran lurraldeko bost udalen adierazleen sistemari bakarrik aplikatuko zaion proiektu pilotuko ekintzak.

Bizkaiko Foru Aldundiak, bestalde, 30.000 euro emango ditu 2015eko ekitaldian zehar proiektu pilotua gauzatu ahal izateko. Halaber, adierazleen sistemaren garapena koordinatuko du eta sistema hori ezartzeko behar diren informazioa eta proposamenak ematen lagunduko du.

Hitzarmenean jaso diren jarduerak garatzeko lankidetza eta koordinazioa hobetze aldera Jarraipen Batzorde bat eratuko da, eta Foru Aldundiak eta EUDELek izendatzen dituzten ordezkariez osatuta egongo da.

Tokiko Gobernu Onari lotutako Europako printzipioak

EUDELek urteak daramatza Europako Kontseiluarekin elkarlanean lan-esparru desberdinetan, Tokiko Autonomiaren Europako Gutunaren jarraipenari eta tokiko berrikuntzarako eta gobernu onerako estrategiari lotuta dauden esparruetan batez ere.

Europako Kontseiluak tokiko gobernu onerako ezarri dituen hamabi printzipioetatik bi oso lotuta daude proiektu honekin:

6. printzipioa: jokabide etikoa, interes publikoa interes pribatuen gainetik dagoela bermatzeko.
10. printzipioa: finantza-kudeaketa zintzoa, funts publikoak zuhurtziaz eta modu emankorrean erabili direla bermatzeko.

Informazio gehiago: Europako Kontseilua/tokiko demokrazia/12printzipioak:

http://www.coe.int/t/dgap/localdemocracy/Strategy_Innovation/12principles_en.asp

Jardun onak, gardentasuna eta eraginkortasuna

Europako Kontseiluaren Local Finance Benchmarking programak tokiko finantzaketari lotutako jardun onak balioztatzen ditu. Udaletako zergen esparruko politiken diseinuari arreta berezia ematen dio, eta finantzen eraginkortasuna hobetzeko gardentasuna eta herritarrei kontuak ematea bezalako balioak azpimarratzen ditu.

Era berean, informazioaren eta komunikazioaren teknologien erabilera bultzatzen du eta beste parametro batzuk aztertzen ditu, besteak beste: zergen esparruko politika; zerga administrazioaren erroldak; sistemen, tasen, diru-sarreren eta prezioen auditoretza; zerga-politikaren helburuak eta doikuntzak.

31.03.2015 Nabarmenak

Tokiko ekintzetarako 2015eko ekitaldiko laguntzen deialdia (15/03/31)

Lan Aktibazio Zuzendaritzak 2015eko martxoaren 25eko Lanbide- Euskal Enplegu Zerbitzuak Administrazio Kontseiluak behin onartuta, aurreikusita dauka E.H.A.An argitaratzea enplegua sustatzeko tokiko ekintzetarako 2015eko ekitaldiko laguntzen deialdia martxoaren 31an, asteartea.

EHAA (15/03/31):

http://www.lehendakaritza.ejgv.euskadi.eus/r48-bopv2/eu/bopv2/datos/2015/03/1501468e.shtml

Deialdiko jarraibideak:

http://www.lanbide.euskadi.eus/diru_laguntza/2015/lpe-2015/y94-ayuda/eu/

Diruz lagun daitezkeen jarduerak

1. MOTA.- Enplegua sustatzea.
2. MOTA.– Kontrataziorako laguntzak
3. MOTA.- Enplegua sortzen laguntzen duten toki-garapenerako beste ekintza batzuk

Eskatzaileak (erakundeak zein pertsonak)

Euskal Autonomia Erkidegoko udalak
Mankomunitateak
Kuadrillak

Prestazio ekonomikoa

Diru kopurua: 20.000.000 euro

15.000.000 euroko finantzaketa izango dute aurreko artikuluan ezarritako 1. eta 2. motako jarduketek
5.000.000 euroko finantzaketa izango dute 3. motako ekintzek, langabeziak gogorren jotako eskualdeetara eta udalerrietara bideratuta daudenek.

Informazio gehiago jasotzeko Tokiko eta Eskualdeko Garapen Arloarekin harremanetan jarri:

Tel. 945.160.601 www.lanbide.net