Sailetako Albisteak

13.03.2014 Berriak

Udal gardentasuna abian jartzeko eta kudeatzeko eskuliburua

Pasa den ostiralean, martxoaren 7an, Gardentasunaren aldeko Euskadiko Udalen Sarearen barne-bilera bat egin zen. Bertan erantsitako dokumentua aurkeztu zen: ‘Udal Gardentasuna abian jarri eta kudeatzeko eskuliburua’.

Gardentasunari buruzko estrategia zehaztu ondoren, udalak burutu beharreko ekintza zehatzen arabera egituratzen da eskuliburua.

Eskuliburua
Jeitsi

Ereduaren oinarria zera da: udalek herritarrei eskaini beharreko informazioa plazaratu eta etengabe eguneratzea, gardentasun-maila altua erdietsi ahal izateko. Zeregin horretan laguntzeko, Gidak AGINTE KOADRO bat ere badakar, ekintza zehatzen egutegiarekin eta parte har lezaketen udal sailekin.

EUDELek, lanean erraz erabiltzeko, Aginte Koadroa Excel formatuan dauka, eta udalek eskatuz gero helarazi egingo zaie. Eskaerak egiteko: udaltransparencia@eudel.net

Eskuliburu bera eta Gardentasunaren aldeko EUDELeko Euskadiko Udalen Sarearen esparruan egindako gainerako argitalpenak hurrengo estekan daude: www.eudel.net/gardentasuna

Informazio gehiago

Sarearen onurak: ezagutza partekatzea – parte izatea

Sarean landutako ezagutza, materialak eta baliabideak Euskadiko tokiko erakundeei banatzen jarraituko du Eudelek, udal gardentasuna ezartzen lagundu eta prozesua hedatzeko asmoz. Izan ere, antolamendua, herritarrekiko harremana eta Gobernu Ona hobetzeko premiatzat ez ezik, horretarako aukeratzat ere ulertu behar da gardentasuna.

Gardentasun Sareari atxikitzeko:

KONTAKTUA: udaltransparencia@eudel.net

INFORMAZIO GEHIAGO: www.eudel.net/gardentasuna

11.03.2014 Tokiko Garapena eta Enplegua

Bizkaiko ‘BEHARGINTZA’ hitzarmena 2014.

Aurreko urteetan bezala, EUDEL eta Bizkaiko Foru Aldundiko Ekonomia Sustatzeko Sailaren artean elkarlanerako Hitzarmena sinatu da, enplegua eta ekonomia sustatzeko politikak Bizkaiko lurralde mailan artikulatzeko (Behargintza Zentroak).

Hitzarmen berri hau 2015ko otsailaren 28an bukatzen da, eta gogoratu nahi dizuegu, eskualdeko jarduerak betearazteko proiektuak aurkezteko epea apirilaren 16an bukatzen dela.

Hitzarmena
Jeitsi

Behargintza Zentruen kudeaketa eta funtzionamendurako Bizkaiko Foru Aldundiak eta EUDELek adostutako Lankidetza Hitzarmena.

Hitzarmen horren bidez foru erakundeak 725.155 euro jarri ditu Bizkaiko eskualde guztietan jarduten duten enplegurako eta garapenerako 21 zentroak kudeatzeko.
EUDELek eta Ekonomia Sustatzeko Sailaren ustez Behargintzak toki mailan enplegua kudeatzeko eta ekonomia sustatzeko formularik egokienak dira, lehiakortasuna hobetuz, eskualdearen potentzialtasun ekonomikoa aprobetxatuz eta, azken finean, enplegua hobetuz eta sortuz.

Bizkaiko Foru Aldundiak eta EUDEL, Euskadiko Udalen Elkarteak, horien kudeaketa sustatzen jarraitu nahi dute, zertarako-eta euren ahaleginak biltzeko eta enpleguan eta toki mailako egitura horien garapenean laguntzeko.

Behargintzak udalerriaren edo eskualdearen garapen integrala sustatzeko sortu ziren udal zentroak dira; halaber, pertsonen enplegagarritasuna hobetzeko ekintzak egiten dituzte, udalerri edo eskualdeko enpresa eta merkataritza bilba sustatzekoak eta enplegurako prospekzioak eta informazioa ematekoak; horiek ez ezik, inoren konturako laneratzea, autoenplegua eta enpresen sorkuntza laguntzen dute; zerbitzuak ematen dizkiete udalerrian edo eskualdean kokatuta dauden enpresei; eta, azken finean, toki garapena bideratzeko era guztietako jarduerak egiten dituzte. Zentro horiek era juridiko desberdinak dituzte baina guztiak dira toki esparrukoak.

07.03.2014 Nabarmenak

EUDELEK Arabako Batzar Nagusietan agerraldia egitea eskatu nahi du Lurralde Kontseiluaren operatibitate eta efikaziarik ezaren aurrean

Gasteizen, 2014ko martxoak 7. EUDELek Lurralde Kontseiluaren akordioan oinarrituta, Arabako Batzar Nagusietan agerraldia egitea eskatu du gaur, Toki Administrazioaren eta Finantzen Lurralde Kontseiluaren operatibitate eta efikaziarik ezaren berri emateko asmoz.

EUDELen Arabako Lurralde Batzordeak, 2014ko martxoaren 7an Vitoria-Gasteizen egindako bileran, hartutako erabakiak hurrengoa esaten du hitzez hitz:

Prentsa oharra
jeitsi

“29/1996 Foru Arauaren bitartez, tokiko administrazioko erakundeen eta Arabako Foru Aldundiaren arteko parte-hartze eta koordinaziorako organo gisa eratu da Arabako Toki Administrazioaren eta Finantzen Lurralde Kontseilua. Izaera aholku-emailea eta eztabaida-xedea daukan arren, Kontseiluari funtzio garrantzitsuak esleitzen zaizkio lurraldeko tokiko erakunde guztiei eragiten dieten gai orotan.

Maila desberdineko erakundeen arteko topaketa eta akordio organoa izan beharko lukeen hau tresna formal eta eduki gabekoa bihurtu da; izan ere, Foru Aldundiaren ordezkariek bete beharreko izapide soiltzat hartzen dute.

Kontseiluaren funtzioak tratatzeko era horren ondorioz, ez dauka eraginkortasunik, eta hori agerian geratzen da Lurraldeko tokiko erakundeek informazioa lortzeko duten zailtasunean; hain zuzen ere, informazio hori banan-banan eman beharko litzaieke Herri-dirubideen Euskal Kontseiluaren bileren ondoren.

Egoera hori, gainera, larriagotu egiten da Arabako Toki Administrazioaren eta Finantzen Lurralde Kontseiluaren bileretan tokiko interesak defendatzeko izendatutako hautetsiei ematen zaien tratuagatik; izan ere, egoera hori jasanezin bihurtu zen Toki Administrazioaren eta Finantzen Lurralde Kontseiluak joan den martxoaren 3an egindako bileran.

Azaldutakoari buruzko informazioa emateko eta gaiari buruzko irtenbideak proposatzeko asmoz, EUDELek uste du komenigarria dela Arabako Batzar Nagusien agerraldia eskatzea, eta honen bitartez hori egiten du.”

04.03.2014 Nabarmenak

LTDren hedapen berria eta telekomunikazioko udal azpiegiturekin duen erlazioa

ITELAZPI Telekomunikazioen Sozietate Publikoaren arduradunen eta EUDELen Udalerri Txikien Batzordeko ordezkarien artean izandako bileretan, Lurreko Telebista Digitalerako (LTD) Plan Tekniko Nazionalaren egoerari buruzko informazioa eman zen. Plan horren arabera, ezarpena egikaritzeko egunak
2015eko urtarrilaren 1a izaten jarraitzen du.

Informazioa
Jeitsi

Era berean, ITELAZPIko arduradunek jakinarazi zuten bezala, epe laburrean bere Udalarekin harremanetan jarriko dira, udalerri horretako Komunikazio Zentroaren erabilera lagapenari dagokionez jarraitzen ari diren espedientearen tramitazioa aztertzeko.

Aipatutako espedienteak azpiegitura horien ondare-egoera erregularizatzea du helburu, eta, ondorio horietarako, Udalaren eta ITELAZPIren artean lankidetza hitzarmena sinatzea beharrezkoa dela aurreikusten du. Hitzarmenean honakoak sartzen dira: Udalari dagokionez, zentroak hartzen duen lursaila dohainik erabiltzeko lagapena, horretara sartzeko bidea erabiltzeko baimena, eta, hala badagokio, hori osatzen duten azpiegituren titulartasunaren lagapena; ITELAZPIri dagokionez, funtzionamendu, mantentze, konponketa eta kontserbazio gastuak bere gain hartzea legezko eta lan segurtasuneko berme guztiekin, eta etorkizunean ekipamendua berritzeko egin daitekeen edozein inbertsio.

Jakinarazi beharra dago, aipatutako zentroa ez erregularizatzeak bi ondorio ekarriko dituela: alde batetik, ezingo da telebista-eskaintza osoa eskuratu LTDrako Plan Tekniko Nazional berriak adierazitako kanal eta frekuentzietan; eta, bestetik, Dibidendu Digitalak eragindako LTD kateak derrigor desagertuko dira 2015eko urtarrilaren 1a baino lehen.

03.03.2014 Berriak

HODEI EGILUZ. Adierazpen instituzionala.

Hodei Egiluzen aldeko Adierazpena

25.02.2014 Berriak

Toki Poliziako Bitarteko Agenteen lan-poltsa

Segurtasun Sailak hautatzeko eta trebatzeko prozesu bat deitu du udaltzaingoko bitarteko agenteen ( Oinarrizko Eskala eta C-2 Sailkatze Taldea) poltsa bat sortzeko, kidego horretan aldi baterako zerbitzua emateko. Izena emateko epea martxoaren 13an bukatuko da, goizeko 11tan, PLEAren www.arkauteakademia.net webgunean.

Euskadiko Segurtasun Publikoaren Sistema Antolatzeko ekainaren 28ko 15/2012 Legean eta Euskal Herriko Poliziari buruzko uztailaren 17ko 4/1992 Legean xedatutakoarekin bat eta Euskal Autonomia Erkidegoko zenbait udalek helarazitako eskaerak aintzat hartuta egin da deialdi hau.

Aurrerakiak eta Deialdiaren Xehetasunak

Deialdiaren onairriak EHAA (otsailak 25)

Bai Eusko Jaurlaritzako Segurtasun Saila, baina Euskal Autonomia Erkidegoko udalak, jakitun dira zeinen arazo larriak dakartzan tokiko administrazioen arloan udaltzaingoko oinarrizko eskalako agenteak aldi baterako ordeztu beharrak, dela oporraldiak estaltzeko (normalean udan), dela haien funtzioak egiteko bitarteko agenteak izendatu beharra dakarten bestelako egoera jakin batzuetan.

Udalerrien bitarteko teknikorik eza dela-eta, Polizia eta Larrialdietako Euskal Akademia arduratuko da deialdiaz, hautaketaz zein prestakuntzaz, eta lan-poltsaren ondorengo kudeaketaz, berriz, Segurtasuna Koordinatzeko Zuzendaritza arduratuko da; aipatutako poltsa, bestalde, behar beste araututa egongo da.

Aurten bitarteko 80 udaltzain trebatuko dira gutxienez

Udaltzaingoko bitarteko agenteen poltsa bat toki-korporazioen esku aurtengo bigarren hiruhilekoaren amaierarako jartzea da asmoa, aipatutako kidegoetan dauden premiazko zerbitzu-beharrak, aldi baterako bada ere, estali ahal izateko. Lehen 40 udaltzainak ekainerako egongo dira prestatuta, eta gainerako 40ak urtean zehar, irailetik aurrera.

Hala, gaur asteartean, otsailak 25, deialdiaren oinarriak Euskal Herriko Agintaritzaren Aldizkarian argitaratu ondoren, interesa duten pertsonek izena emateko aukera izango dute, 2014ko martxoaren 13 ostegun goizeko 11:00ak arte, PLEAren www.arkauteakademia.net webgunean.

Hartarako osatutako epaimahaiak erabakiko ditu ondoren proba bakoitza egiteko eguna, ordua eta tokia. Azken horiek behar bezala iragarriko dira Polizia eta Larrialdietako Euskal Akademiaren webgunean, gutxienez 72 ordu lehenagotik. Halere, oposizioa martxoaren 29an hastea aurreikusita dago.

Polizia eta Larrialdietako Euskal Akademiak hautatutako lagunak deituko ditu, lehentasun-hurrenkerari jarraituta, maiatzean prestakuntza-ikastaro bat egiteko. Ikastaro hori nahitaezkoa eta kanporatzailea izango da. Ikastaroa amaituta, prestakuntza hori egiten duten pertsonek ebaluazio bat gainditu beharko dute eskuratutako ezagutzak egiaztatzeko, eta gai edo ezgai kalifikazioa emango zaie.

Doako telefonoa informazio lortzeko

Doako telefono honetara deitzeko aukera dago: 900 840 088, astelehenetik ostegunerako ordutegian, 8:30etik 16:30era, eta ostiraletan 8:00etatik 14:00etara, horren gaineko informazio guztia lortzeko.

25.02.2014 Nabarmenak

EUDELek Datuak Babesteko Euskal Bulegoaren Saria jaso du udal administrazioetan praktika onak zabaltzeagatik

Bilbon, 2014ko otsailaren 24an. EUDELek -Euskadiko Udalen Elkarteak- Datuak Babesteko Euskal Bulegoaren saria jaso du, pribatutasuna kudeatzeari eta datu pertsonalak erabiltzeari dagokionez, euskal udalerrietan praktika onak zabaltzeagatik.

“Datu pertsonalak babesteari buruzko euskal udalerrientzako Praktika Onak Gidaliburua” prestatzeagatik jaso du EUDELek aitorpen hau. Halaber, material honek aipamen berezia jaso zuen Europako Herri Administrazioen Praktika Onen Sariaren V. edizioan (2009). Gidaliburu hau prestatzeko udal administrazioaren pertsona-talde bat ibili da elkarlanean, EUDELen eta Datuak Babesteko Euskal Bulegoaren lidergopean. Taldean Basauri, Beasain, Eibar, Ermua, Getxo eta Vitoria-Gasteizko udaletako teknikariak egon ziren.

Gidaliburu hau Euskadiko herri-administrazioan lan egiten duten 20.000 pertsonarentzako lan- eta laguntza-tresna da, beren zereginak burutzeko dauzkaten datu pertsonalen isilpekotasuna bermatu ahal izateko.

Prentsa-oharra Jeitsi

Dokumentuak lau bolumen dauzka eta kudeatzeko prozedurak, eskabideak, dokumentu-ereduak eta ohiko galderetarako erantzunak dakartza. Gainera, eredu praktikoak eta balizko kasu zehatzak dauzka datuen babesari lotutako eguneroko egoerei erantzuna emateko, eta jarraitu beharreko prozeduren eskemak ere badakartza.

Araudia tokian tokiko errealitatearen arabera egokitzea

Honako gidaliburu honek prozeduren inguruko irizpide-sorta bat eskaintzen du datu pertsonalak babesteari buruzko indarreko legeria udal erakundeen tokiko errealitateari behar den bezala egokitzeko. Horretarako, bere tamaina eta baliabideak kontuan hartzen ditu eta sentsibilizazioa, kontzientzia hartzea, prestatzea eta praktika onak bereganatzea sustatzen da.

Gidaliburua formatu bikoitzean eskaintzen da: inprimatuta eta bertsio digitalea. Udalek eta horri buruz zerbait jakin nahi duten herritarrek DPBB/AVPDren eta EUDELen webguneetan ere eskuratu dezakete.

20.02.2014 Sailetako Albisteak

Udal erreformari buruz udalei informatzeko jardunaldia

Jardunaldia urtarrilaren 10ean ospatu zen, Bilboko Euskalduna Jauregian, eta Euskadiko toki erakundeetako 500 lagun baino gehiago bertaratu ziren.

JARDUNALDIAREN IRUDIAK

Diputatuen Kongresuan abenduaren 19an onartu ondoren, eta urte amaieran BOEn argitaratu ostean, 2014an sartu da indarrean Toki Administrazioaren Arrazionalizazio eta Iraunkortasun Legea. Legearen eragin nagusien gaineko lehenengo hurbilketa egiteko asmoz, EUDEL-Euskadiko Udalen Elkartea zabalkunderako jardunaldi bat ospatu zuen, bereziki hiru lurraldeetako udal, mankomunitate, kuadrilla eta partzuergoetako teknikariei zuzenduta. Saioan alkateak eta udal zinegotziak ere izan ziren, bai eta Euskadiko beste instituzio batzuetako langileak ere.

Jardunaldia 09:30ean hasi zen Eudelen elkarteburu Ibone Bengoetxearen hitzaldiarekin, eta Luciano Parejo, Francisco Velasco eta Rafael Jiménez katedradunen txostenekin jarraitu zuen; arau berriaren ardatz nagusiak izan zituzten hizpide, bai eta euskal esparruan izango dituen ondorioak ere.

Testua: 27/2013 Legea, abenduak 27, Toki Administrazioaren Arrazionalizazio eta Iraunkortasun Legea.

Izaera orokorreko lehenengo zabalkundearen ondoren (behin betiko testua onartu eta berehala), Elkarteak Lege berriaren azterketa juridiko zehatza egingo du, Euskadiko tokiko erakundeen jarduera-eremuetako bakoitzean izango dituen ondorioak aztertzeko.

Txostenak

Luciano Parejo Alfonso:
De la Ley de Bases de Régimen Local a la Ley de Racionalización y Sostenibilidad de la Administración Local: cambio de modelo.

Francisco Velasco Caballero:
Competencias y prestación de servicios municipales en la Ley de Racionalización y Sostenibilidad de la Administración Local.

Rafael Jimenez Asensio:
La reforma local en el sistema institucional vasco.

Aurrekariak

Ogasun eta Herri Administrazioen Ministerioak egindako lehenengo iragarpenetik, 2012ko uztailetik hain zuzen ere, 2014an indarrean sartu den arte, urte eta erdi iraun du Tokiko Administrazioa erreformatzeko arau berria izapidetzeko prozesuak. Halaber, edukiaren azterketa ere konplexua izan da; izan ere, hainbat eta hainbat zirriborro egin dira, eta, azkenean, testuan funtsezko aldaketak izan dira.

Euskadiko Udalen Elkartea 2012ko maiatzean egindako Batzarretik aritu izan da Lege honen azterketan eta jarraipenean lan egiten, proiektu legegilearen iragarpen ofiziala baino hilabete lehenagotik. Izapidetze epean, Eudelek hainbat lan-batzorde antolatu ditu udaletako teknikari eta politikariekin, eta, ondoren, balorazioak eskumena duten erakunde guztiei bidali dizkie: Euskadiko tokiko erakundeei, Eusko Jaurlaritzari, hiru lurraldeetako Foru Aldundiei, Ogasun eta Herri Administrazioen Ministerioari, Udalerri eta Probintzien Espainiako Federazioari (FEMP) eta Kongresuko nahiz Senatuko talde politikoei.

Informazio gehiago: www.eudel.net

Prentsa
Oharra jeitsi

Berriak

Azken berriak