EUDEL-Euskadiko Udalen Elkarteak bere gaitzespen irmoena azaldu du Vitoria-Gasteizen gertatutako  emakumearen hilketa matxistaren aurrean. EUDELek elkartasuna adierazten die biktimaren senideei eta  hurbilekoei.

EUDEL-Berdinsareak gogorarazten du heriotzek  emakumeenganako indarkeriaren arazoaren alderdi bat baino ez dutela erakusten, izan ere, egoera hori emakumeen eta gizonen arteko desberdintasunean sortzen da.

Emakumeenganako indarkeria, era guztietan  (psikologikoa, ekonomikoa,  fisikoa, sexuala, bikarioa…), emakumeen duintasunaren eta segurtasun fisiko nahiz moralaren aurkako eraso larria da, eta, ondorioz, giza eskubideen urraketa larri eta onartezina.

Tragedia honek berriro dakarkigu gogora hala erakundeek nola euskal gizarte osoak daukagun erantzukizuna, gure udalerrietan Berdintasuna eraginkor egiteko. Zentzu horretan, gure sentsibilizazio eta prebentzio ekintzak indartzen jarraitu behar dugu, etorkizuna ordezkatzen dutenei zuzenduta, gure herritar gazteenei zuzenduta, alegia.

EUDELek bat egiten du Emakundek eta Vitoria-Gasteizko Udalak deitu duten gaitzesteko elkarretaratzearekin. Elkarretaratzea urriaren 13an izango dela, 12:00etan, Udaletxearen aurreko plazan, baita ere antola litezkeen gaitzespen-ekimen guztiekin.

• Virginia Woolf BASQUESKOLA sareko emakumezko alkate eta zinegotziek lan-jardunaldi batean parte hartu dute gaur, Beijingo Emakumeen Biltzarretik hogeita bost urte igaro diren honetan.

• EUDELek eta Emakundek udaletako emakumezko hautetsiekin sustatutako prozesuaren barruan dago Donostian egindako topaketa. Helburua haien gaur egungo egoeraren diagnostikoa egitea eta Basqueskolaren Ekintza Planean 2023ra bitarteko erronka berriak ezartzea izan da.

2021eko irailaren 25ean. Euskal udalerrietako emakume hautetsiek gidatzen duten eta EUDELek eta Emakundek sustatzen duten BASQUESKOLA sareak “Emakumeak eta lidergoak” jardunaldia egin du gaur, Donostiako Udaletxeko bilkura-aretoan. Bertan, aztertu egin dute zer-nolako presentzia duten emakumeek tokiko erakundeetan, zein baldintzatan gauzatzen duten lidergoa eta zein berdintasun faltarekin egiten duten topo politikara iristeko bidean. “Gehiago gara eta elkarrekin egiten dugu lan, gure ahotsa ozen entzun dadin, euskal udaletatik, gizarte osoan. Gaur egun, oraindik ere, emakumeen parte-hartze politikoak berdintasunezko baldintzetan aurrera egin dezan dauden oztopoak identifikatu nahi ditugu, eta politikan aldatu beharrekoa aldatu nahi dugu eremu dibertsoagoa izan dadin, eta emakume belaunaldi berriak erakar ditzan, berdintasuna eraikitzen jarraitzeko”, azpimarratu du Ane Beitiak, Elgoibarko alkateak (EUDEL) eta Basqueskola sarearen ordezkaria.

Saioan emakumezko alkate eta zinegotziek bakarrik hartu dute parte, eta abiapuntua izango da Basqueskolak euskal tokiko politikan diharduten emakumeen lidergo eta aliantza berrien bide-orria diseina dezan. Topaketa munizipalista hau urtea bukatu bitartean egingo den hausnarketa- eta partaidetza-prozesu handinahi baten barruan dago, NBE Emakumeak-en Generation Equality Beijing +25 nazioarteko proiektuaren esparruan. Euskadin, Eusko Jaurlaritzaren Berdintasun, Justizia eta Gizarte Politiketako Sailak hauspotzen eta koordinatzen du ekimena, Emakumearen Euskal Erakundearen bidez. Beste urrats bat izango da udal-politikaren eremuan 2026ari begirako zenbait konpromiso eraldatzaile ezartzeko, Beijing +25 Berdintasunaren aldeko Euskal Konpromisoaren testuinguruan.

Ildo horretan, Emakundeko zuzendariak, Izaskun Landaidak, adierazi du Generation Equality ekimenaren bidez “gure herrialdearen eta hura osatzen duten eragile sozial, politiko eta ekonomikoen konpromisoa berpiztu nahi dugula berdintasunaren alde, eta, horretarako, Emakundek zuen esku jarriko du urratsez urrats egiteko ibilbide bat, gure herriaren errealitatera egokitutako bide-orri bat”. Landaidak zorionak eman dizkio emakumezko hautetsien sareari, ekimenarekin bat egiteagatik, eta gogorarazi du “berdintasuna talde-lana dela eta inork ezin duela konpromiso horretatik kanpo gelditu”.  Haren iritziz, Generation Equalityrekin hasitako prozesu honen azken helburua “Euskadin gizartearen eta herritarren itun bat lortzea da, berdintasunaren alde eta indarkeria matxistaren aurka; itun hori eraldatzailea izatea eta berdintasunaren eta gizarte bidezkoago baten aldeko sinergia geldiezinak eratzea nahi dugu”.

Jardunaldiko une garrantzitsuenetako bat Marina Subirats Martori soziologo eta filosofo feministaren hitzaldia izan da. Gaur egungo testuingurua aztertzeko zenbait gako eman ditu Subiratsek: “Helburua ez da gizonek egin dutena ezabatzea, hura osatzea eta hobetzea baizik, partekatu ahal izateko. Soziologo eta feministak nabarmendu duenez, “bi premia daude: zer aldatu nahi dugun eta nolakoak izan behar duten eskaintzen ditugun irtenbideek. Nola antolatuko garen politikaren mundu androzentrikoan, eta nola eraikiko ditugun emakumezkoen lidergoak, ezagutzen ditugun lidergo maskulinoen bestelakoak”, adierazi du Subiratsek.

Euskal emakumezko hautetsien lidergoaren egoera

Subiratsen hitzaldiaren ondoren, toki-hautetsien arteko truke-dinamika bat egin da, Beijingetik bi hamarkada igaro diren honetan Emakumeen Lidergoa udal-politikan zein egoeratan dagoen aztertzeko. Era berean, hurrengo urteetan garatu daitezkeen ekintzen aipamen bat egin da. Hori guztia Basqueskola sarearen ekintza-planean (2021-2023) jasoko da, haren lan-batzordeen bitartez: trebakuntza eta coaching-a, laguntza, emakumezko hautetsi berrien transferentzia eta harrera hurrengo udal-hauteskundeen ondoren.

Europako Udalerri eta Eskualdeen Kontseiluak (EUEK) ordezkaritza politikoari buruz egindako azken txostenak dioenez, euskal udalak emakume eta gizonen arteko oreka handiena duten toki-gobernuen artean daude, emakume hautetsiak % 46 baitira; aurretik, Islandia baino ez dago, (% 47), eta oso atzetik datoz Europako % 29ko batez bestekoa eta Espainiako Estatuko % 36koa.

Alkateei dagokienez ere europar batez bestekoa gainditzen du Euskadik, % 30 baitira emakumeak (76 emakumezko alkate, 251 udaletan); Europan, berriz, % 15ekoa da portzentajea. Horrenbestez, Euskadi emakumezko alkateen ehuneko handiena duten herrialdeen artean dago, Islandia, Suedia, Finlandia, Norvegia eta Suitzarekin batera.

Informazio gehiago: www.virginiawoolfbasqueskola.eus https://www.emakunde.euskadi.eus/sensibilizacion/-/beijing-igualdad/

• “Virginia Woolf BASQUESKOLA” Euskal Udaletako Hautetsien Sareak Generation equality izeneko nazioarteko proiektuari buruzko lan-jardunaldia antolatu du larunbat honetan, irailaren 25ean, Donostian. Nazio Batuen Erakundeak diseinatu du proiektu hori, Beijingeko Emakumeen Asanbladaren hogeita bost urteen barruan.

• EUDELek eta Emakundek udaletako emakumezko hautetsiekin sustatutako prozesuaren barruan dago topaketa. Helburua haien gaur egungo egoeraren diagnostikoa egitea eta Basqueskolaren Ekintza Planean 2023ra bitarteko erronka berriak ezartzea da.

• Elgoibarko (EUDEL) alkate Ane Beitia eta Emakundeko zuzendari Izaskun Landaida izango dira jardunaldiaren buruak. Bestalde, hitzaldi inspiratzaile bat emango du Marina Subirats Martorik. Ekitaldia 10:30ean hasiko da, eta modu irekian emango da YouTuberen bitartez:

2021eko irailaren 23an. Euskal Udaletako emakume hautetsiak buru dituen BASQUESKOLA sareak, EUDELen eta Emakunderen bultzadarekin, “Emakumeak eta lidergoak” jardunaldia antolatu du larunbat honetan, irailaren 25ean, Donostiako udaletxean. Saioan emakumezko alkate eta zinegotziek bakarrik hartuko dute parte, beren gaur egungo egoera aztertzeko helburuarekin, ahalduntzeari, parte-hartze politikoari eta gizartean duten eraginari dagokienez, berdintasunaren alorrean aurrerapausoak lortze aldera. Hori izango da abiapuntua, Basqueskolak euskal tokiko politikan diharduten emakumeen lidergo eta aliantza berrien bide-orria diseina dezan.

Topaketa munizipalista hau urtea bukatu bitartean egingo den hausnarketa- eta partaidetza-prozesu handinahi baten barruan dago, NBE Emakumeak-en Generation Equality Beijing +25 nazioarteko proiektuaren esparruan. Euskadin, Eusko Jaurlaritzaren Berdintasun, Justizia eta Gizarte Politiketako Sailak hauspotzen eta koordinatzen du ekimena, Emakumearen Euskal Erakundearen bidez; helburua gizartearen eta herritarren itun handi bat sustatzea da, berdintasunaren alde eta indarkeria matxistaren aurka. Beste urrats bat izango da udal-politikaren eremuan 2026ari begirako zenbait konpromiso eraldatzaile ezartzeko prozesuan, Beijing +25 Berdintasunaren aldeko Euskal Konpromisoaren testuinguruan.

Hala, datorren larunbatean, Basqueskolak antolatutako jardunaldian parte hartzen duten hautetsiek aukera izango dute hausnarketa egiteko, azken 25 urteetan emakumeen parte-hartze politikoaren alorrean egindako aurrerapausoez eta etorkizuneko erronkez.

Euskadin, duela bi legegintzalditik hona, batez besteko parekotasuna dago, hauteskunde-legeei esker, neurri batean. Hala ere, aztertu beharra dago zer-nolako presentzia duten emakumeek tokiko erakundeetan, zein baldintzatan gauzatzen duten lidergoa eta zein berdintasun faltarekin egiten duten topo politikara iristeko bidean.

Jardunaldiaren egitaraua

Ekitaldia 10:30ean hasiko da, Udaletxeko bilkura-aretoan. Han, Ane Beitia Elgoibarko alkateak erakunde-ongietorria egingo die bertaratutakoei, EUDELen izenean. Jarraian, Emakundeko zuzendariak, Izaskun Landaidak, Generation Equality proiektua eta hark Euskadirentzat duen proposamena aurkeztuko die hautetsiei.

11:00etan jardunaldiko une garrantzitsuenetako bat izango da: Marina Subirats Martori soziologo eta filosofo feministaren hitzaldi inspiratzailea.  Marina Subiratsek Beijingo Konferentzian izan zuen bizipenaren berri emango du, eta gaur egungo testuingurua aztertzeko zenbait gako azalduko ditu. Subirats Europako Batzordearen bozeramailea izan zen Emakumeei buruzko IV. Mundu Konferentzian, eta Espainiako Gobernuaren ordezkaria izan zen Emakumearen Institutuko zuzendari gisa (1993-1996); Europako ordezkaritzaren koordinatzailea izan zen, halaber. Gainera, Subiratsek ondo ezagutzen ditu Basqueskolako toki-hautetsien esperientzia eta ikuspegia, Bartzelonako Udaleko zinegotzia izan baitzen 1999 eta 2006 bitartean.

Euskal emakumezko hautetsien lidergoaren egoera

Subiratsen hitzaldiaren ondoren, toki-hautetsien arteko truke- eta eztabaida-dinamika bat egingo da, Beijingetik bi hamarkada igaro diren honetan Emakumeen Lidergoa udal-politikan zein egoeratan dagoen aztertzeko.  Era berean, datozen urteei begira egin daitezkeen ekintzak edo konpromisoak jasotzen hasiko dira. Hori guztia Basqueskola sarearen ekintza-planean islatuko da (2021-2023), bere lan-batzordeen bidez: prestakuntza eta coaching-a, datozen udal-hauteskundeen ondoren hautetsi berriei laguntza, transferentzia eta harrera ematea.

Europako Udalerri eta Eskualdeen Kontseiluak (EUEK) ordezkaritza politikoari buruz egindako azken txostenak dioenez, euskal udalak emakume eta gizonen arteko oreka handiena duten toki-gobernuen artean daude, emakume hautetsiak % 46 baitira; aurretik, Islandia baino ez dago, (% 47), eta oso atzetik datoz Europako % 29ko batez bestekoa eta Espainiako Estatuko % 36koa.

Alkateei dagokienez ere europar batez bestekoa gainditzen du Euskadik, % 30 baitira emakumeak (76 emakumezko alkate, 251 udaletan); Europan, berriz, % 15ekoa da portzentajea. Horrenbestez, Euskadi emakumezko alkateen ehuneko handiena duten herrialdeen artean dago, Islandia, Suedia, Finlandia, Norvegia eta Suitzarekin batera.

Generation Equality

Beijingen egindako Emakumeen Nazioarteko IV. Konferentziatik 25 urte bete diren honetan, NBE Emakumeak-ek proiektu berri bat jarri du martxan, gizon eta emakumeen arteko benetako berdintasuneranzko eraldaketei bultzada emateko ostera ere. Nazio Batuen Erakundearen lekukoa hartuz, Emakundek euskal eragile sozial, ekonomiko eta politiko guztiei zuzendutako prozesu bat abiarazi du, gizartearen eta herritarren itun bat lortzeko berdintasunaren alde eta indarkeria matxistaren aurka.

Ekimen horren helburua da mundu konferentzian parte hartu zuten emakume haien ondarea belaunaldi berriek jasotzea, etorkizunean berdintasunak aurrera egingo duela bermatzeko.

Informazio gehiago: http://www.virginiawoolfbasqueskola.eus/eu/

BEIJING +25 – Sentsibilizazio soziala | Emakunde (euskadi.eus)

• Emakundek bultzatuta eta euskal erakunde guztien laguntzarekin, gazteen artean errespetua, berdintasuna eta indarkeria sexista eta matxistaren prebentziorako jarrerak sustatzen ditu
• Kai Nakai artista gasteiztarrak programarako sortutako “Nahikoa dela” kantuaren estreinaldiarekin aurkeztu da gaur

Beldur Bariken bideo promozionala

Vitoria-Gasteiz, 2021/09/09

Beldur Barik Lehiaketaren 12. edizioari hasiera eman zaio gaur Gasteizen Kai Nakai artista gasteiztarrak Beldur Barik programarako sortutako “Nahikoa dela” kantuaren zuzeneko estreinaldiarekin. Beldur Barik lehiaketak gazteen artean indarkeria sexista eta matxista prebenitzeko helburua du. Emakundek gidatzen du Arabako, Bizkaiko eta Gipuzkoako Foru Aldundien zein EUDELen babesa eta laguntzarekin. Proiektua 2009an sortu zen Berdinsarearen baitan, Emakundek eta EUDELek bultzatzen duten berdintasunaren aldeko euskal udalen sarean.

Beldur Barik lehiaketa programaren ekintza nagusietako bat da. Aurten Kai Nakai artista gasteiztarrak kantu bat sortu du Beldur Barik Jarrera sustatzeko, ‘Nahikoa dela’ izenburupean. Berak iazko lehiaketan ‘Gure Misioa’ hirugarren kategoriako aipamen berezia jaso zuen. Horrez gain, Uxue Bereziartua ilustratzaile feministak sortu du aurtengo irudia, berak ‘Errebelazioa’ lanarekin ikus-entzunezko saria irabazi zuen. Biak izan dira gaurko aurkezpenean, eta beraiek azaldu dituzte lehiaketaren nondik norakoak.

Lehiaketa 12 eta 26 urte bitarteko gazteei zuzendua dago, eta adierazpen artistikoak saritzen ditu. Lan horiek neska-mutilek ezberdintasun egoerei Beldur Barik jarrerarekin nola egiten dieten aurre erakutsi behar dute; alegia, errespetua, parekidetasuna, askatasuna eta autonomia, elkarkidetza eta indarkeria sexista eta matxistaren bazterketa irmoa adierazten dituzten jarrerekin. Kultura matxista eta indarkeria sexistaren formak eraldatzeko konpromiso pertsonal eta kolektiboa islatu behar dute lanek.

Edizio honetan, gehienez 3 minutuko iraupena dituzten ikus-entzunezko lanak aurkeztu ahal izango dira. Horrez gain, bideoetan hitz egiten bada gaztelerazko edo euskarazko azpitituluak jartzea derrigorrezkoa izango da. Bideoak aurkezteko epea irailaren 10etik azaroaren 5era bitartean zabalik egongo da. Parte-hartzeko hiru kategoria daude: lehen kategorian, 12-13 urte bitarteko partehartzaileak izango dira; bigarren kategorian, 14-18 urte bitartekoak; eta hirugarrenean, 19-26 urte bitarteko gazteak. Urtero bezala, lehiaketan bakarka edo taldeka (ikastetxe bat, gela bat, elkarte bat…) parte hartu daiteke.

Guztira zortzi sari banatuko dira. Hauek izango dira: Kategoria bakoitzeko 400 euroko saria eta 200 euroko aipamen berezi bana banatuko dira. Horrez gain, 300 euroko herri-bozkaketaren bitartez parte-hartze saria emango da. Baita ikusentzunezko ekoizpen onenari 300 euroko saria emango zaizkio. Kalitate artistikoari lan onenaren saria eta herri bozketan boto gehien lortu duen lanari ere saria emango zaio. Herri-bozketa azaroaren 11tik 12ra bitartean gauzatuko da, beldurbarik.eus web-gunearen bidez

Agurain, Beldur Barik herria

Aurten, lan sarituak 2021ko azaroaren 26an ezagutzera emango dira Agurainen, Arabako herri hau izango baita aurten Beldur Barik programaren hiriburu, bertan ospatuko baita Beldur Barik Topaketa. Topaketa www.beldurbarik.eus webgunearen bidez ere jarraitu ahal izango da zuzenean streaming bidez.

Gainera, euskal artista ezberdinek sari-banaketa girotuko dute.

Informazio guztia www.beldurbarik.eus webgunean eta sare sozialetan

Kontaktua: komunikazioa@beldurbarik.eus eta emakunde.prentsa@euskadi.eus