EUDELek udalei bidali die Covid-19 koronabirusaren aurrean udal esparrurako informazio eguneratuta:
OSASUN SAILAREN GOMENDIOA ADINEKO ETXE ETA KLUBEN BEHIN-BEHINEKO ITXIERAKO. (JEITSI)
“Turismo-sektorean COVID-19 kutsatzea txikiagotzeko jardun-protokoloa” (azken eguneraketa 2020/03/11)
Jardun-protokolo horrek Udalak interpelatzen ditu (2. atala ERANTZUKIZUNAK) establezimendu turistikoen erantzule edo turismoa sustatzeko erakundeen kide izan daitezkeen aldetik. Era horretan, turismo-eragileei eskatzen die “jardun-protokolo hau hedatzeko eta inplementatzeko” eta erakunde turistikoei “dokumentu hau beren langile eta bezeroen artean zabaltzeko, eta neurriak hartzen direla ziurtatzeko”
- JARDUN-PROTOKOLOA DESKARGATU
- KARTELAK ETA HORRI BURUZKO INFORMAZIOA DESKARGATU
EUDEL-Euskadiko Udalen Elkarteak bere gaitzespen irmoena azaldu du Abanto Zierbenan gertatutako bi emakumeren hilketaren aurrean, eta elkartasuna adierazten die senideei eta biktimen hurbilekoei.
EUDEL-Berdinsareak gogorarazten du heriotzek emakumeenganako indarkeriaren arazoaren alderdi bat baino ez dutela erakusten, izan ere, egoera hori emakumeen eta gizonen arteko desberdintasunean sortzen da.
Emakumeenganako indarkeria (psikologikoa, ekonomikoa, fisikoa, sexuala) emakumeen duintasunaren eta segurtasun fisiko nahiz moralaren aurkako eraso larria da, eta, ondorioz, giza eskubideen urraketa larri eta onartezina.
Tragedia honek berriro dakarkigu gogora hala erakundeek nola euskal gizarte osoak daukagun erantzukizuna, gure udalerrietan Berdintasuna eraginkor egiteko. Zentzu horretan, gure sentsibilizazio eta prebentzio ekintzak indartzen jarraitu behar dugu, etorkizuna ordezkatzen dutenei zuzenduta, gure herritar gazteenei zuzenduta, alegia.
EUDELek bat egiten du Abanto Zierbenako Udalak deitu duen gaitzesteko elkarretaratzearekin. Elkarretaratzea bihar izango dela, martxoak 12, 19:00etan, udaletxe aurrean.
Euskadiko Udalen Elkarteak bat egiten du antola litezkeen gaitzespen-ekimen guztiekin.
Bilbon, 2020ko martxoak 11.
- Giro nasaiak eta generoak eragindako bazterketarik bako gizarterako bidea alkarregaz egiteko konpromiso sendoak markau dabe aurtengo ospakizuna.
- Batzarrak martiaren 8ko mobilizazinoetan parte hartzeko deia egin dau.
(Gernikan, 2020ko martiaren 6an). Gernikan gaur egin dan Bizkaiko Emakume Hautetsien IV. Batzarrak, ehun urte baino gehiago dituan Batzarretako egoitzako jarlekuak bete ditu barriro, alderdi politiko eta sentsibilidade guztietako 200 emakume baino gehiago helburu komunaren alde alkartuta: gizonen eta emakumeen arteko benetako bardintasunean aurrera egitea. Aurton, Bizkaiko Batzar Nagusien egoitzeak bere itxurarik onena erakutsi dau, demokraziako hamaika agintaldietan Bizkaiko Batzarretan noiz edo noiz jarlekua izan daben 116 emakumeei omenaldi berezia emoteko.
Ana Otadui, Bizkaiko Batzar Nagusietako Lehendakariak haserako berbaldian adierazo dauenez, aintzatespen hori, Bizkaiko batzarretan “gizon baino emakume gehiago garan” unean heldu da (26 emakume eta 25 gizon). “Batzar honetatik igarota, emakumeek geure lidergoaren alde dagon eretxi publikoa sortzea bultzatu dogu, holan emakumeen gaitasun politikoaren inguruan egozan mitoak lurrera botaz eta lidergoko postuetan egotea ohikoa izatea be lortuz”, esan dau. Eta, horren ostean adierazo dau bardintasun horrek “ez dauela esan gura gizonak baino gehiago izan behar garanik, baldintza berberakaz lan egin behar dogula baino, alkarren ondoan, ezelango desbardintasun barik”. Bukatzeko, konbidauen harmailetan ikusten ziran gizonei eskerrak emon deutsee euren laguntzarengaitik eta “holango batzar berezian gugaz egoteagaitik”. Emakumearen Nazinoarteko Eguneko beste ekitaldi erreibindikatzailea da, eta ekitaldia “instituzionalizetea” gurako leukela esan dau.
Horren ostean, udalerrietako sentsibilitate politiko guztiak ordezten dituen sei emakumek (Ane Legarretaetxebarria, EAJ/PNV alderdiko Fruizko alkateak; Ima Garrastatxu, EH Bilduko Durangoko alkateak; Mª José Blanco, PSEko Portugaleteko alkateordeak; Laura Casado, Etxebarriko zinegotzi eta Herriaren Ahotsa taldeko kideak; Paula Amieva, Elkarrekin Podemoseko Getxoko zinegotziak; eta PPko Natalia Aranduyk, Martiaren 8ko, Emakumeen Nazinoarteko Eguneko, Erakundeen Arteko Adierazpena irakurri dabe. Adierazpena EUDELek (Euskal Udalerrien Alkartea) prestau dau, Emakundegaz lankidetzan (Izaskun Landaida zuzendaria ekitaldian egon da), eta Bizkaiko Batzar Nagusiek sinatu dabe. EUDELeko Batzorde Betearazleko Bardintasun ordezkari moduan Josune Irabien Amurrioko alkatea etorri da.
“EMAKUMEEN MOBILIZAZIOAK. Emakumeen botereak mundua aldatzen du” izenburuagaz, udal guztiakaz adostutako Adierazpenak adierazoten dau bardintasuna “ez dala soilik oinarrizko giza eskubidea, baita mundu baketsua, oparoa eta iraunkorra lortzeko beharrezko oinarria”, eta “konpromiso irmoa” adierazo dau “bardintasunezko gizarte inklusiboa eregiten laguntzeko, persona guztien eskubideak eta parte-hartzea bermatuko dituana tokiko bizitzan”. Adierazpenak, domeka honetarako, martiaren 8rako, “antolatuta dagozan mobilizazinoetan modu aktiboan parte hartzeko dei egiten deutse herritarrei”.
Lurraldeko udal gobernuetako ordezkaritza zabala be egon da, horreen artean alkate honeek: Amaia del Campo (Barakaldo), Amaia Aguirre (Getxo), Aintzane Urkijo (Santurtzi), Aitziber Oliban (Erandio), Elixabete Uribarri (Plentzia), Jone Antsotegi (Aulesti), Esther Apraiz (Derio), Mª Teresa Artetxe (Morga), Angela Eguía (Gordexola), Saioa Elejabarrieta (Lemoa), Begoña Enbeita (Muxika), Miren Karmele Enbeita (Kortezubi), Maite Etxebarria (Abanto-Zierbena), Irantzu Ibarrondo (Sopuerta), Ainara Otxotorena (Mañaria), Elixabete Uribarri (Plentzia) edo Garbiñe Saenz de Buruaga (Ispaster).
Gernikako ekitaldian ez dau hutsik egin Foru Gobernuko ordezkaritza zabalak, Elena Unzueta, Teresa Laespada, Lorea Bilbao eta Ainara Basurko diputatuek, hain zuzen be. Eurakaz batera, konbidauak eta omenduak egon dira jarrita, goraino beteta egon dan aretoan, kolore politiko guztietako legebiltzarkideak, kongresuko kideak edo batzarkideak, hain zuzen be.
OMENALDIA ETA AINTZATESPENA
Idazkia danen artean irakurri ostean, 1979tik, Demokrazia barriro ezarri zanetik Bizkaiko Batzar Nagusiak barriro beharrean hasi ziranetik, bertan jarlekua bete daben 116 emakumeei egin jaken omenaldia eta aintzatespenen banaketa hasi da. Datorren apirilean 41 urte beteko dira.
Bizkaiko Batzar Nagusietako Lehendakariak, bost batzarkide historikoren berbaldiei emon deutse bidea. Omenaldia jaso daben emakume guztien izenean, berba batzuk egin ditue. Ordena honetan, honeek igo dira Batzarretxeko atrilera: Gloria Ucar (PP), Ana Tellería (Elkarrekin Podemos), Janire Galarraga (PSE), Irune Soto (EH Bildu) eta Ana Madariaga (EAJ-PNV), Bizkaiko Batzar Nagusietako lehenengo emakume Lehendakaria izan zana.
Horren ostean, 116 batzarkideen izenak eukazan bideoa emon da, eta gero, Ana Otaduik eta gaur alderdi politiko guztietako emakumeek osotu daben Mahaiko kideek –Arantza Urkaregik (EH Bildu), Begoña Gilek (PSE-EE), Eneritz de Madariagak (Elkarrekin Podemos) eta Carmen Carrónek (PP)–, Otaduiren berbetan “gure historiaren, gure askatasunaren eta gura dogun bakearen ikurra dan haretx orria eukan orratz bat” emon deutse omendutakoei. Ohorezko aurreskuak, Miren de Miguel Bilboko sopranoak abestu dauen Iparragirreren, XIX. mendeko bardoaren, “Gernikako Arbola” ereserkiak, eta Gernikako Arbolaren azpian ateratako familiako argazkiak emon deutsie amaierea Bizkaiko Emakume Hautetsien IV. Batzarrari.
Alderdi politiko nagusien ordezkari gorenen artean, batzar berezian honeek hartu dabe parte: Itxaso Atutxa Bizkai Buru Batzarreko presidenteak (EAJ/PNV); Maddalen Iriarte EH Bilduren lehendakarigaia; Sonia Pérez Eusko Jaurlaritzako Turismo, Merktaritza eta Kontsumo Sailburu eta PSE-EEko zuzendaritzako kideak; Eukene Arana Elkarrekin Podemoseko Legebiltzarkideak; eta Amaya Fernández Euskadiko PPko jarduneko presidente eta alderdi horrek Bizkaiko Batzar Nagusietan dauen bozeroaleak.
Gernikako ekitaldian ez dau hutsik egin Foru Gobernuko ordezkaritza zabalak, Elena Unzueta, Teresa Laespada, Lorea Bilbao eta Ainara Basurko diputatuek, hain zuzen be. Eurakaz batera, konbidauak eta omenduak egon dira jarrita, goraino beteta egon dan aretoan, kolore politiko guztietako legebiltzarkideak, kongresuko kideak edo batzarkideak, hain zuzen be. Lurraldeko udal gobernuetako ordezkaritza zabala be egon da, horreen artean alkate honeek: Amaia del Campo (Barakaldo), Amaia Aguirre (Getxo), Aintzane Urkijo (Santurtzi), Aitziber Oliban (Erandio), Jone Antsotegi (Aulesti), Esther Apraiz (Derio), Mª Teresa Artetxe (Morga), Angela Eguía (Gordexola), Saioa Elejabarrieta (Lemoa), Begoña Enbeita (Muxika), Miren Karmele Enbeita (Kortezubi), Maite Etxebarria (Abanto-Zierbena), Irantzu Ibarrondo (Sopuerta), Ainara Otxotorena (Mañaria), Elixabete Uribarri (Plentzia) edo Garbiñe Saenz de Buruaga (Ispaster).
Bigarren mailan, eta konbidauen tribunatik, hainbat gizonek jarraitu dabe Bizkaiko Emakume Hautetsien IV. Batzarra, Aitor Esteban Kongresuko diputatu eta Bizkaiko Batzar Nagusietako Lehendakari izandakoak, edo Jon Andoni Atutxa, Emilio Lobato, Oscar Arana, Zigor Isuskiza, Mikel Bagan edo Unai Lerma batzarkideek.
EUDELek eta Emakundek 2006an sortutako BERDINSAREA sareak helburu hauek ditu: berdintasunaren alde eta emakumeenganako indarkeriaren aurka tokiko gobernuek kudeatzen dituzten programak eta zerbitzuak bultzatzea, indartzea, koordinatzea eta ebaluatzea.
Bilbo, 2020ko martxoaren 5a. Atzo arratsaldean, EUDELek Bilbon duen egoitzan, legegintzaldiko lehen batzarra egin zen, BERDINDAREA sarera atxikitako udalerrien ordezkaritza politikoarekin, EUDELek koordinatuta eta Emakunderen laguntzarekin. Arabako, Bizkaiko eta Gipuzkoako hogeita hamar bat alkate eta zinegotzi izan ziren bileran. Gaur egun, hiru lurraldeetako 69 udalerrik osatzen dute sarea, eta EAEko biztanleriaren % 80ri baino gehiagori ematen dio estaldura.
Erakunde bultzatzaileen izenean, Emakunderen zuzendari Izaskun Landaidak eta EUDELeko berdintasun-ordezkari eta Amurrioko alkate Josune Irabienek eman zioten hasiera Batzarrari; biek hartu zuten parte, eta ongietorria egin zieten sarea osatzen duten udal-arduradunei.
EUDELen izenean, Josune Irabienek “balio-sare” gisa aipatu zuen Berdinsarea, “berdintasunerako tokiko politiken abangoardian egon nahi duten udalen partaidetzarako sare gisa”. Irabienek azaldu duenez, beste abantaila batzuen artean, “sareak aukera ematen digu irizpide komunak eta ekintza bateratuak adosteko, tamaina desberdina eta berdintasunaren arloan ibilbide desberdina duten udalerrien artean. Berdinsarean, gure praktika onak eta baliabideak partekatzen ditugu; eta hori oso lagungarria da tamaina txikiagoko udalerrientzat, mankomunitatetan eta/edo koadriletan bildutako horientzat”.
Bestalde, Emakunderen zuzendari Izaskun Landaidak nabarmendu zuenez, “Berdinsarea Berdintasunaren Aldeko Euskadiko Udalerrien Sarea adibide argia da erakusteko zer garrantzi duen erakundeen arteko elkarlanak, helburu baten alde lan egiten denean”. Landaidaren hitzetan, “Emakunderen eta udalen arteko elkarlana Berdinsarea baino urte batzuk lehenagokoa da; izan ere, Emakundek beti defendatu du denboran iraungo duten sareak ehuntzearen garrantzia“.
Hamar urte baino gehiagoko ibilbidea egin, eta Europan praktika ontzat hartu ondoren (Berdintasunaren Europako Gutunaren Behatokia), BERDINSAREA tamaina eta sentsibilitate desberdinetako udalen arteko lankidetza-lanaren erreferente gisa finkatu da. Haren balio erantsi nagusia da udalek eurek diseinatutako eta zuzendutako sarea dela. Batzordeen eta lantaldeen bidez egiten du lan, eta, horri esker, politikarien eta teknikarien koordinazioa indartu daiteke, tokiko berdintasun-politikak eta zeharkakotasuna udaletan sustatzeko.
2020ko lehen batzarraren helburua hurrengo urteetarako lan-plana adostea izan zen. Berehalako ekintzen artean, bereziki nabarmentzen da barne-gogoetarako eta partaidetzarako prozesu baten hasiera, udalek elkarrekin definitzeko sarearen helburu berriak eta haren jarduera-eremu estrategikoak. Hori guztia, udalen beharrei hobeto erantzuteko, erronka global berrien aurrean sarea indartzeko eta berdintasun-arloko tokiko politiken etorkizuna bideratzeko. Zehazki, gai hauek landu behar dira, besteak beste: genero-ikuspegia duten jaiak, biktimen erreparazioa eta indarkeria matxistaren prebentzioa, genero-ikuspegia tokiko politiketan eta udaletako politikarien eta teknikarien prestakuntza.
>Informazio gehiago hemen: www.eudel.eus (Berdintasuna-BERDINSAREA)
Bizkaiko Gizarte Zerbitzuen Erakunde arteko Lantaldea ostegun honetan bildu da Bizkaiko gizarte zerbitzuen alorrean datozen hilabeteetarako lan ildo bateratuak adosteko.
Bilbo, 2020ko martxoak 5. Bizkaiko Gizarte Zerbitzuen Erakunde arteko Lantaldeak bere jarduerari ekin dio berriro ostegun honetan, Lurraldeko Gizarte Zerbitzuetako koordinazio- eta lankidetza-mekanismoetan era bateratuan aurrera egiten jarraitzearen ondoreetarako. 2008ko Gizarte Zerbitzuen Legeak finkatzen duen eskubide subjektiboa lurraldean era eragingarrian hedatzeko tresna da; Lantaldean elkarrekin egiten dute lan Foru Aldundiak eta Lurralde Historikoko udalek.
Erakunde arteko lankidetza-organo honen, EUDELen aldetik udal ordezkaritza eratu dute Juan Ibarretxek, Bilboko zinegotziak; Amaia Agirrek, Getxoko alkateak; Imanol Zuloagak, Gueñesko alkateak; Elixabete Uribarrik, Plentziako alkateak; Aitor Lopezek, Zaldibarko zinegotziak; Mª Jose Blancok, Portugaleteko zinegotziak, eta Loren Olivak, Etxebarriko alkateak. Udaletako ordezkariekin batera, Bizkaiko Foru Aldundiko Gizarte Ekintza eta Enplegua, Gizarte Inklusioa eta Berdintasuna Sustatzeko sailetako ordezkariek parte hartzen dute.
Bizkaiko Gizarte Zerbitzuen Erakunde arteko Lantaldeak erakundeen arteko adostasunetik eta Gizarte Zerbitzuen Euskal Sistemaren oinarri diren administrazio-maila bakoitzarekiko errespetutik lan egiten du. Horiek horrela, aurretik egindako lana eta lortutako akordioak oinarri hartuta, gaurko bileran datozen hilabeteetarako lan ildoak zirriborratu dituzte.
Hala aldeek konpromisoa hartu dute lankidetza-mekanismoetan lan egiteko adinekoentzako ostatuen etengabeko arreta hobetzeko, EUDELen eta Foru Aldundiaren arteko esparru-akordio bat lortzea espero baitute. Ildo beretik, izaera orokorragoarekin, akordio bat lortu da foru eta toki administrazioen arteko informazio-trukeari bultzada emateko, gizarte zerbitzuen arloko elkarreragingarritasunari dagokionez. Azkenik, “Emakumeen aurkako indarkeria matxistaren biktima diren emakumeentzako eta haien seme-alabentzako harrera-baliabideen sarea” proiektu pilotuan lan egitea adostu da.
Koronabirusari –COVID19– dagokionez, Osasun Sailaren eta Osakidetzaren UDAL ESPARRURAKO GOMENDIOAK EUDELek udalei bidali die.
* EELZri dagokioenez (II Eranskina): Koordinazio eta horniduraren atalari dagokionez, Osasun Sailak komunikatu du laster jakinaraziko duela Osakidetzako erreferentziazko profesionala.
Dokumentuak:
eranskina: Udal titulartasuneko egoitzetako eta eguneko zerbitzuetako artapen-langileentzako gomendioak.
eranskina: Inoren laguntza behar duten pertsonentzako etxez etxeko arreta zerbitzuko (EEAZ) artapen-langileentzako gomendioak.
Eskuak egoki garbitzeko prestakuntza (online eskuragarri, Osakidetzaren webgunean).
Eguneratutako kartelak:
Halaber, gogorarazten da koronabirusa prebenitzeko eta horretatik babesteko informazio eguneratua ematen duten kartel guztiak, modu orokorrean hedatu eta editatzeko sortutakoak, deskargatzeko moduan daudela Eusko Jaurlaritzaren webgunean (birusa geldirazteko indartze-neurriei buruzko informazioarekin): https://www.euskadi.eus/nuevo-coronavirus-covid-19/
| OSASUN SAILAK ETA OSAKIDETZAK UDAL ESPARRURAKO EMANDAKO GOMENDIOAK. COVID-19 |
Euskadin gertatu diren Koronabirus –COVID19– infekzio-kasuen ondorioz eta infekzio-kopuruak gora egingo duela aurreikusita, Osasun Sailak eta Osakidetzak gomendio hauek hedatu nahi ditu, udal esparruan abian jartzeko ekintzen proposamen modura.
| ZERGATIK DIRA BEHARREZKOAK GOMENDIO HAUEK? |
Udalerrien eta udal zerbitzuak artatzen dituzten pertsona eta profesionalen ekintza-espazioa hurbiltasunezko espaziotzat har daiteke, segurtasunari, gizarte-prestazioei, kulturari eta kirolari lotutako ekintzetan herritarrekiko duten hurbiltasunagatik. Ikuspuntu horretatik, alor horietan zerbitzua ematen duten profesionalek kutsadura-bektore izateko arriskua dute amankomunean, baita kutsatuak izateko arriskua ere bereziki. Ohar horietaz gain, kontuan izan behar ditugu udalerrien tamaina, aukerak eta baliabideak, horien kokapenaren –landa-eremua edo hiri-eremua– arabera eta dimentsio demografikoaren arabera.
Erantzunak ematen dituen ikuspegi baten beharra justifikatzen dute kontu horiek, udal esparruko kolektibo profesionalak eta, oro har, herritarrak babesteko xedez.
| ZELAN ERAGITEN DU KORONABIRUSAK? |
Koronabirusak gripearen birusen oso antzeko profila dauka alderdi askotan (transmisioa, gaixotze-heriotza). Erikortasuna duten adinekoak udaleko etxeko arreta-zerbitzuen edo kultur- eta gizarte-zerbitzuen erabiltzaileak dira askotan, eta haiek dute arriskurik handiena infektatzen badira. Hori dela eta, oso garrantzitsua da adinekoei babesa ematen dieten oinarrizko kolektiboak ere babestea.
| UDALEKO ZEIN KOLEKTIBO PROFESIONAL HAR DAITEZKE ARRETA BEREZIKOTZAT? |
- Udaltzainak eta suhiltzaileak.
- Udal titulartasuneko egoitzetako eta eguneko zerbitzuetako artapen-langileak.
(I. ERANSKINA)
- Inoren laguntza behar duten pertsonentzako etxez etxeko arreta zerbitzuko (EEAZ) artapen-langileak. ( ERANSKINA)
- Udaleko kirol instalazioetako langileak (begiraleak, etab.).
- Udaleko kultur instalazioetako langileak (liburutegikoak, kultur taldeetakoak, erretiratuen elkarteetakoak…).
| ARRETA BEREZIA BEHAR DUTEN KOLEKTIBOENTZAKO PRESTAKUNTZA-EKINTZA ESPEZIFIKOAK |
Herritarrei azaldutako prebentzio-neurriak abian jarriko dira, baina arreta berezia jarriko da udalerrietan adierazitako kolektiboentzako prestakuntza-ekintza espezifikoetan, bereziki nabarmenduta derrigorrezko alderdi hauek:
- Eskuak maiz garbitu.
- Ahoa eta sudurra estali ukondoaz edo zapi batez, eztul edo doministiku egitean. Zapia berehala bota eta eskuak alkoholezko oinarria duen desinfektatzaile batekin edo uraz eta xaboiaz garbitu.
- Adinekoengandik edo gaixotzeko arriskua duen jendearengandik metro bateko distantzia mantendu, artapenak gehiago hurbiltzea eskatzen duen kasuetan izan ezik.
- Ez kontaktatu adinekoekin, profesionalek sukarra edo arnas-sintoma arinak (sukarra, eztula) baldin badituzte.
- Begiak, sudurra eta ahoa ukitzea saihestu.
Era berean, jokabide horien barruan, eskuak egoki garbitzen irakasteko aukera baloratu (online eskuragarri Osakidetzaren bitartez) eta lantokietan gel hidroalkoholikoko ontziak eskura jarri, eskuak uraz eta xaboiaz garbitzea egokiagoa bada ere.
| AHOLKU OROKORRAK |
- Sukarra edo arnas-sintoma arinak dituzten profesionalak ez dira lantokira joango, eta lan-osasuneko medikuarekin harremanetan jarriko dira. Laneko baja telefono bidez eskatu behar zaio Osakidetzari.
Ahal den neurrian eta Udal bakoitzaren irizpideen arabera, ekintza hauek baloratuko dira:
- Parte-hartzaile kopuru handia duten ekitaldiak mugatu edo debekatu.
- Laneko eta artapeneko jarduerak dimentsionatu, pertsonen arteko kontakturako espazioa handitzeko aukeraren arabera, eta, beharrezkoa bada, jarduerak bertan behera utzi.
- Kontaktutzat jo daitekeen distantzia (bi metro baino gutxiagoko distantzia eta 15 minutuz gutxienez) kontuan hartuta, lantokiko jardunean baldintza hori betetzen saiatu.
- Txandakako lanak berrantolatu eta sektorizatu, plantilla osoaren artean kontaktua egon ez dadin. Alderdi hori garrantzitsua da ordezkatzea zaila den sektoreetako langileen kasuan, adibidez, udaltzainen eta suhiltzaileen kasuan.
Urtero bezala, martxoaren 8aren eta Emakumeen Nazioarteko Egunaren ospakizunaren aurrean, EUDELek adierazpen instituzionalaren eredu bat prestatu du EAEko udalentzat.
Aurtengo Adierazpenaren titulua da “EMAKUMEEN MOBILIZAZIOAK. Emakumeen botereak mundua aldatzen du”
Bilbon, 2020ko martxoak 4. EUDELek, Batzorde Eragileak otsailaren 13an hartutako erabakiaren bidez, martxoaren 8a ospatzeko egingo den adierazpen instituzionalaren eredua bidali zien Euskadiko udal guztiei. Testua otsailaren 13an bidali zitzaien toki-entitateei, behar adinako aurrerapenaz, Gobernu Batzordeak eta udaleko osoko bilkurak egin baino lehen. EUDELen ohikoa den bezala, udal autonomia errespetatuta, adierazpen hori erreferentziako eredu edo testu gisa proposatzen zaie udalei, tokiko errealitatera egokitu dezaten.
Azken urteotako mobilizazio feministak direla eta, aurtengo M8-ko Adierazpenaren titulua da “EMAKUMEEN MOBILIZAZIOAK. Emakumeen botereak mundua aldatzen du”. Beijingeko Ekintza Plataformaren 25. urteurrenaren esparruan, adierazpenak ekintza zehatzen proposamena jasotzen du, tokiko gobernuek abian jar ditzaten, tokiko bizitzan emakumeen eta gizonen arteko berdintasuna eta indarkeria matxistaren prebentzioa sustatzen jarraitzeko. EAEko udalek ibilbide luzea dute egina berdintasunaren alde, eta, alde horretatik, EUDELen baterako lana erreferentzia-esparru komuna eta ibilbide-orria da, tokiko konpromiso horien jarraipena egiteko.
BERDINSAREA-Berdintasunaren aldeko EAEko udalerrien batzarra
Bihar, osteguna, martxoak 5, EAEko udaletako ordezkari politikoak EUDELen egoitzan elkartuko dira, Berdinsarearen urteko lehen batzarrean. Gaur egun, hiru lurraldeetako 69 udalerrik osatzen dute Berdinsarea, eta EAEko biztanleen % 80 inguru ordezkatzen dute.
BERDINSAREA udal-sarea 2006ean sortu zen, eta EUDELek eta Emakundek koordinatzen dute, tokiko gobernuek berdintasunaren alde eta emakumeenganako indarkeriaren aurka kudeatzen dituzten programak eta zerbitzuak bultzatzeko, indartzeko, koordinatzeko eta ebaluatzeko.
Beste abantaila batzuen artean, sareak aukera ematen du irizpide komunak adosteko eta tamaina desberdinetako udalen artean baliabideak partekatzeko; era berean, laguntza berezia da udalerri txikienek mankomunitateetan eta kuadrilletan taldekatuta lan egiteko.