Sailetako Albisteak

27.02.2018 Nabarmenak

Mirarik eta Unaik, EZ beti da EZ! kanpainak jasotako Sabino Arana saria utzi dute EUDELen

Saria gordetzeko aukeratu dute EUDEL; izan ere, Euskadiko udalerri guztiak biltzen ditu, eta hori da, hain zuzen, eguneroko bizitza gauzatzen den espaziorik hurbilena, non elkarte, erakunde, herritarren kolektibo eta instituzioek borrokan diharduten egunez egun, indarkeria sexistak eta genero indarkeriak eragiten duten gaitz sozialari aurre egiteko.
Mirari eta Unairekin batera, EUDEL-Euskadiko Udalen Elkarteko elkarteburu Imanol Landa eta Sabino Arana Fundazioko lehendakari Juan Mª Atutxa ere izan dira ekitaldian.

Bilbo, 2018ko otsailaren 27a. Mirarik eta Unaik Sabino Arana 2017 saria jaso zuten Bilboko Arriaga Antzokian, joan den urtarrilaren 28an, EZ beti da EZ! / ¡NO es NO! ekimenaren izenean. Saria jaso ondoren, EUDELek Bilbon duen egoitzan utzi dute, aurretik iragarri bezala. Saria euskal gizarte osoari dagokionez, EUDEL hautatu da sari hau gordetzeko leku gisa; izan ere, udal erakunde honek Euskadiko udalerri guztiak ordezkatzen ditu, eta, udalerri horietan guztietan, bertako elkarte, erakunde, herritarren kolektibo eta instituzioek egunero dihardute borrokan, genero indarkeriaren aurka.

Saria jasotzean, Mirari eta Unai Euskadiko gizarte osoaren ordezkari bihurtu ziren. Gure gizartea arazo honen aurrean kezkatuta, konprometituta eta jardunean dago, eta EZ beti da EZ! gure herrialdeko txoko guztietara eraman nahi du.

EUDELeko elkarteburu Imanol Landa eta Sabino Arana Fundazioko lehendakari Juan Mª Atutxa bertan zeudela, Mirarik eta Unaik sariaren domina EUDELen Batzorde Eragilea biltzen den aretoan utzi dute. Aipatutako organoa EUDELen zuzendaritzako organo gorena da, eta Euskadiko udalak ordezkatzen dituzten 15 alkatek osatzen dute.

Ekitaldian, Imanol Landak esker ona agertu dio Sabino Arana Fundazioari: “ohore handia da EUDELentzat, udalerri guztien topagunea den aldetik, euskal gizarte osoak berdintasunaren alde eta indarkeria sexistaren kontra egindako lanagatik jasotako aintzatespenaren gordailu izatea”. Landa elkarteburuak nabarmendu du EUDELek ondo baino hobeto ulertzen dituela “Ez beti da Ez!” ekimenak saria jasotzeko arrazoiak; izan ere, “berdintasuna eraginkorra izan dadin, beharrezkoa da gizarte osoaren konpromiso eta lan bateratua. Lan kolektibo honen oinarria balioen eta jokaeren transmisioa da, egunerokoan kontzientzia hartu eta berdintasuna sendotu dezagun, gure ekintza eta jokabideen bitartez, hala espazio pribatuan nola publikoan. Mirarik eta Unaik, besteak beste, etorkizuna irudikatzen dute; belaunaldi berrientzat, hain zuzen, berdintasunean oinarritutako udalerriak eraiki behar ditugu guztion artean, non gizon eta emakumeek eskubide eta aukera berberak izango dituzten.

Domina bat, aintzatespen gisa

Saria domina bat da, 26x26x5 cm-ko eskultura txiki batean txertatuta, aintzatespenaren testua grabaturik duela.

Aintzatespenaren testua:

Euskadiko bazter guztietan entzuten den EZ beti da EZ! oihu kolektiboaren zentzua aitzatetsi eta saritu nahi du Sabino Arana Fundazioak. Oihu horrek bere baitan biltzen du indarkeria sexistaren eta genero indarkeriaren biktima diren emakumeen ahots nahigabetu eta ia beti isilarazia; gaitz sozial horren kontra borrokan aritu diren eta oraindik aritzen diren elkarte, erakunde herritarren kolektibo eta instituzioen ahots konprometitu eta aktibista, eta indarkeria mota oro desagerrarazteko asmoz gero eta kontzientzia eta konpromiso handiagoa agertzen duen euskal gizarte osoaren ahots irmo eta erabakigarria. EZ beti da EZ! ekimenak BAIEZKO oihu zaratsua izan nahi du, gizon eta emakumeen arteko diskriminazioaren kontra, ekintza positiboaren alde eta berdintasun eraginkorraren alde, bai mundu osoan bai Euskadin.

Ez beti da EZ! ¡NO es NO! “oihu kolektiboaz” gain, joan den urtarrilaren 28an izandako Sabino Arana 2017 sarien ekitaldian, Koopera, Ramón Barea, Gerediaga Elkartea eta Abel Barriola saritu zituzten.

27.02.2018 Función Pública

EUDELen komunikatua, Euskadiko Udaletan otsailaren 28rako deitutako lanuzteak direla-eta

EUDELek gehiengoa duten ELA eta LAB sindikatuekin negoziatzeko eta akordioa lortzearen aldeko jarrera izaten jarraitzen du, horiek 2016ko abenduaren 1eko Negoziazio Mahai Orokorrean aurkeztutako konpromisoen proposamena ukatu bazuten ere.

Hurrengo egunetan bi aldetako bilerak izango ditugu ordezkari sindikalekin.

EUDEL UDALHITZ Hitzarmenaren Mahai Orokorraren barruan batutako negoziazio kolektiboa mantentzearen aldekoa da, langile publiko guztien aldeko akordioak lortzeko eta udalen funtzionamendu onerako –herritarrei zerbitzu hobea emanez islatuko dena– bide gisa.

Horretarako, EUDELentzat ezinbestekoa da udaletan banakako Negoziazio Mahaiak ez irekitzea.

Bilbon, 2018ko otsailaren 27an. Sindikatuek otsailaren 28an Euskadiko udaletan lanuzteak egiteko egindako deialdiaren aurrean, EUDEL-Euskadiko Udalen Elkarteak, Euskadiko tokiko erakundeetako langileen lan-baldintzak arautzen dituen UDALHITZ Akordioaren Negoziazio Mahai Orokorreko parte-hartzaile gisa, ondorengo gogoetak egin nahi ditu:

1.- EUDELek negoziazio kolektiboarekin duen konpromiso irmoa adierazten du, gure udal eta tokiko erakundeetan aurreratutako lan-harremanen marko bat egituratzeko bide bakar gisa, udalerrietatik eskaintzen dugun herritarrentzako zerbitzuaren eraginkortasun, kalitate eta espiritu maila altuan islatuko dena.

2.- EUDELek negoziatzeko duen borondatea eta eremu propioaren aldeko apustua ukaezina da eta izango da.

EUDELek, azken 30 urteetan, erabateko konpromisoa erakutsi du gure negoziazio eremuarekin lan-harremanen markoan. Antzinako ARCEPAFESetatik egun indarrean dagoen UDALHITZera arte, EUDEL lortutako sektore-akordio ezberdinetan egon da beti, eta gure udaletako lan-baldintzen egungo garapen maila lortzeko oinarrizko pieza izan da.

EUDELen eta sindikatuen arteko negoziazio leial eta zintzo horri esker, gure udaletan berezko marko bat lortu da, aitortzekoa, eta langile publiko guztientzako lan-baldintza aurreratu eta homogeneoekin, eguneratu beharrari kalterik egin gabe, banakako negoziazio kolektiboen dispertsio eta atomizazioak sortuko zituen desberdintasunik gabe.

Duela gutxiko iraganean ere, oinarrizko araudiak ezarritako arrazionalizazio neurri ezberdinak hartu diren testuinguru zail eta konplexuan, EUDELek gure negoziazio eremua eta ELKARKIDETZA prestazio pasiboen babes sistema osagarria defendatzearen aldeko borondatea agertu du, legea errespetatuz UDALHITZ akordioaren legezkotasunari, indarraldiari eta ezarpenaren printzipioari dagokienez, termino guztietan.

Legegintzaldi honetan esfortzu handia egin da negoziazio kolektiboaren eremuan. Negoziazio Mahai Orokorra askotan bildu da, baita gizarte-eragileekin bi aldetako txanda eta bilera ugari egin ere, negoziazio ireki, parte-hartzaile eta zintzo batean ordu eta esfortzu ugari emanez. Negoziazio hori proposamen trukean, estatistika lanetan, egoera diagnostikoetan, datu bilketan, zirkular bidalketan, gomendioetan, eta abarretan oinarrituz garatu da, gehienetan sindikatuekin adostutako iradokizunei eta metodologiari jarraituz.

3.- Hori dela eta, EUDELek ozen ukatzen ditu gehiengoa duten bi sindikatuek ondorengo lanuzteen arrazoien gainean adierazitako baieztapenak, non gure negoziatzeko borondatea zalantzan jarri den. Zentzu horretan, azpimarratu beharra dago Negoziazio Mahai Orokorrean EUDELen proposamen zehatza dagoela, besteak beste, ondorengo konpromisoak berariaz jasotzen zituena:

– Galdutako erosteko ahalmena errekuperatu.

– UDALHITZ egungo akordioa hobetu, lizentzia eta baimen berriekin, eta lana eta eremu pertsonala bateratzeko hobekuntza zehatzak.

– Asistentziaren arloko hobekuntzak.

– Lan egonkortasuna hobetu eta enplegu publikoa sortzeko konpromisoa.

– UDALHITZ egungo akordioa osorik berrikusi eta egokitzen hasi, horretarako egutegi zehatzarekin.

– UDALHITZ akordioaren betetze-mailaren egoeraren diagnostikoa egin.

Gehiengo sindikala izan da Negoziazio Mahai Orokorraren barruan EUDELen proposamen hau ukatu duena.

Dena dela, ukapen honetaz gain, EUDELek negoziazioaren eta akordioaren alde egoten jarraitzen du, eremu sektorial orokorraren garrantzia langile publiko guztien aldeko akordioak lortzeko eta udalen funtzionamendu onerako –herritarrei zerbitzu hobea emanez islatuko dena-– bide bakar gisa azpimarratuz. Zentzu horretan, hurrengo egunetan bi aldetako bilerak izango ditugu ordezkari sindikalekin.

4.- Negoziazio Mahai Orokorrean bateratutako negoziazio kolektiboa mantentzearen garrantzia gogorarazi da. Horretarako, ezinbestekoa da udaletan banakako Negoziazio Mahaiak ez irekitzea. Udal bakoitzean egungo UDALHITZ 2008-2010 akordioaren gabezia posibleak jorratzeko osatu diren edo osatu daitezkeen “Jarraipen Mahaiei” kalterik egin gabe.

Greba 02/28 nahitaezko zerbitzuak

21.02.2018 Euskara

Euskaraldia: Herriek parte hartzeko izen-ematea zabalik

Euskaraldia: 11 egun euskaraz ekimenean parte hartzeko herrien izen-ematea zabalik dago. Euskal Herri osoan aldi berean abiatuko den euskararen aktibaziorako egitasmoaren lehen izen-emate fasea aurkezteko, Donostiako Koldo Mitxelena Kulturunean bildu dira Aitor Aldasoro, Beasaingo alkatea eta EUDELeko ordezkaria, Arrate Illaro, Euskaltzaleen Topaguneko kidea eta Euskaraldiaren koordinatzailea, Miren Dobaran, Eusko Jaurlaritzako Hizkuntza Politikarako Sailburuordea, eta baita dagoeneko izena eman eta martxan diren bi herritako ordezkariak ere: Sonia Rodriguez, Arrigorriagako Udaleko euskara zinegotzia eta Karmelo Ayesta, Arrigorriagako Euskarak 365 Egun batzordeko kidea, eta Nekane Iribar, Zarauzko udaleko euskara zinegotzia eta Maite Egiguren euskaltzalea. Bertan izan dira baita ere Mikel Arregi, Euskararen Nafar Institutuko zuzendaria eta Josu Labaka, UEMA-ko lehendakaria.
Euskaraldia: 11 egun euskaraz 2017ko azaroaren 23an aurkeztu zenetik, egitasmoa herrietan aurkeztu eta lanari ekin ahal izateko batzordeak sortzen ari dira. Batzordeak elkarlanetik loratutakoak dira, izan ere Euskaraldia: 11 egun euskaraz aurrera atera dadin, herrietako erakunde publikoak, euskalgintzako eragileak, zein bestelako erakunde eta entitateek elkarrekin lanean ari dira. Komenigarria da apirilaren 8a baino lehen herrien izen-ematea egitea, baina ez da beharrezkoa batzordea sortua egotea izena eman ahal izateko.

Herriz herri batzordeak sortzen eta antolatzen hasiak direla nabarmendu du Miren Dobaran, Eusko Jaurlaritzako Hizkuntza Politikarako Sailburuordeak. Bi ezaugarri azpimarratu ditu sortzen ari diren batzorde horietan: aktibazio sozialerako proposamena garatzen ari direla, batetik, eta tokian tokiko eragile publiko eta gizarte eragileen arteko elkarlanerako eremu izaten ari direla. Batzorde hauen egiteko garrantzitsuetako bat Euskaraldia tokiko egoera soziolinguistikora egokitzea da. Tokian tokiko egoerara egokitzeko proposamenen artean, UEMAk herri euskaldunetarako egindakoa aipatu da eredu modura.

Orain arte Araba, Bizkaia, Gipuzkoa eta Nafarroako herriak daude izena emandakoen artean, baina Ipar Euskal Herrian ere Euskaraldiarekin bat egingo duen dinamika abiatuta dago jadanik. Gaurko prentsaurrekoan, bi herritako batzordeetan ari diren ordezkariek parte hartu dute, herri horietako dinamiken berri emateko. Beste herri askotan gertatzen ari diren prozesuen adibide direla azpimarratu dute Euskaraldiko koordinatzaileek.

Zarautzen udalak eta hainbat euskaltzalek elkarlanean abiatutako prozesu parte hartzaile baten ondoriotako bat izan da Euskaraldiaren antolaketarako eratu den gunea. Euskaltzaleak antolatuz batera aritzeko beharretik eta euskararen erabileran eragiteko kezkatik sortu da herriko dinamika. Euskaraldia prestatzeko dinamizatzailea hasi da jadanik lanean Zarautzen.

Arrigorriagan azken bi urteetan egindako aktibazio ekimenari jarraipena emango dio aurtengo Euskaraldiak. Horrela azaldu dute eratu berri den Euskarak 365 egun batzordeko kideek eta herriko euskara zinegotziak.

Herrien izen-ematea

Herrien izen-ematea amaitu ondoren, udaberrian, euskaltzale eragile bila egingo du Euskaraldiak eta ahobizi zein belarriprestak ezagutzeko aukera izango dugu, hurrengo pausoa izango baita, irailaren 20an, alegia, udazkenean, herritarren izen-ematea abiatzea.

Hurrengo urratsen berri emanez amaitu du prentsaurrekoa Arrate Illaro Euskaraldiko koordinatzaileak.

- Urtarrilaren 24a eta apirilaren 8a artean zabalik dago herrien izen-ematea.
- Martxoaren 14an egingo da Nafarroan Euskaraldiaren aurkezpena.
- Martxoaren 17an Ipar Euskal Herrian aurkeztuko da Euskaraldia.
- Martxoaren 17an, era berean, herrietako batzordeen mintegia egingo da Bilbon.
- Irailaren 20tik aurrera abiatuko da herritarren izen-ematea.

Euskaraldia: 11 egun euskaraz2018ko azaroaren 23tik abenduaren 3a bitartean abiatuko da. Egitasmoaren helburua hizkuntza ohiturak aldatzeko eta inertziak astintzeko ariketa soziala da. Egitasmoaren protagonistak herritarrak izango da eta hizkuntzaren jakintza mailari lotutako bi rolen arabera parte hartu ahal izango dute: belarriprest eta ahobizi.

Elkarlanetik abiatutako egitasmoa da Euskaraldia, Euskal Herri osoko erakunde publikoak, euskalgintzako eragileak, hau da, herritarrak, zein bestelako erakunde eta entitateen lan eta gogoarekin ari da aurrera egiten eta dinamika berdina da Euskaraldiak herrietarako proposatzen duena.

20.02.2018 Ogasuna eta Finantzak

Bizkaiko Finantzen Lurralde Kontseiluaren bilera (18-02-20)

Finantzen Lurralde Kontseiluak, gaur eguerdian Bilbon egin duen bileran, berretsi egin ditu Kontseiluak urrian egindako aurreko bilerako aurreikuspenak. Orduan aurreratu zen 2017ko ekitaldiko likidazioa ez zela negatiboa izango. Lehenengo aldiz 8 urtean udalek ez dute dirurik itzuli beharko eta, diru-bilketaren gehikuntzari esker, 2017ko ekitaldian kontura emandako diru kopurua baino 12.147.328 euro gehiago ordainduko dizkie Bizkaiko Foru Aldundiak udalei. 2017an konturako emateak 795 milioi euro pasatxo izan ziren, eta orain, ekitaldiko likidazioaren ostean, behin betiko zenbatekoa 807 milioi izan da, % 1,5 handiagoa.

Bizkaiko udalek ez diote Udalkutxari dirurik itzuli beharko lehenengo aldiz 8 urtean, eta 12 milioi gehiago jasoko dituzte
2017ko ekitaldiko likidazioaren ondoren, diru-bilketaren gehikuntzari esker, 2017ko ekitaldiko konturako emateetan baino 12,1 milioi euro gehiago ordainduko dizkie Bizkaiko Foru Aldundiak udalei, hau da, udalek jaso beharreko guztizko zenbatekoa % 1,5 hazi da.

2017ko Udalkutxaren likidazioa: Udal bakoitzeko banakako datuak

Gaurko Kontseiluko bileran udal ordezkariei emandako informazioa erantsi da dokumentuan dago jasota, eta, horietan, lurraldeko udalerri bakoitzeko banakako datuak eskaintzen dira: IKUSI DOKUMENTUA

SAAD funtsak eta udalerri txikietan azpiegituretako laguntzak

Horretaz gainera, Bizkaiko udalek autonomiarako eta mendekotasuneko laguntzarako SAAD funtsetatik 10.725.125 milioi euro gehiago jasoko dituzte. Estatuko Administrazio Orokorrak transferituko ditu, kupoari buruzko akordioa sinatu eta gero. Diru kopuru hori ordainketa bakarrean jasoko da, eta 2012-2017 bitarteko SAAD funtsen atzerapenen erregularizazioaren ondorio da, Estatuarekiko Kupoaren Batzorde Mistoan adostutako mailarekin bat etorriz.

Bizkaiko Foru Aldundiak Kontseiluan jakinarazi du, halaber, joan zen urtarrilaren amaieran dekretu bat argitaratu zela lurraldeko udalerri txikietan azpiegiturak finantzatzea helburu duten 2 milioi euroko laguntzak emateko. Deialdi hori datorren martxoaren 16ra arte egongo da indarrean. Gehienez 7.500 biztanle dituzten udalerriek parte hartu ahal izango dute, eraikinetan zaharberritze obrak egiteko, oinezkoentzako eremuak atontzeko, bide publikoak eta hiri aparkalekuak egiteko eta ekipamendu publikoak estaltzeko, beste helburu batzuen artean.

*Finantzen Lurralde Kontseilua Bizkaiko udalen eta Foru Aldundiaren arteko koordinaziorako eta parte hartzeko organoa da, udal finantzaketaren banaketa helburu duena, bai eta Bizkaiko Lurralde Historikoko sektore publikoko jarduera ekonomiko-finantzarioaren eta aurrekontu-jardueraren koordinazioa ere.

Hamar kide ditu, eta horietatik bost EUDEL-Euskadiko Udalen Elkartearen izenean parte hartzen dutenak, hau da, Balmasedako alkatea, Álvaro Parro, Bilboko Ekonomia eta Ogasun Saileko zinegotzia, Marta Ajuria, Ermuko alkatea, Carlos Totorika, Larrabetzuko alkatea, Iñigo Gaztelu eta Muskizko alkatea, Borja Liaño. Beste bost kideak Bizkaiko Foru Aldunditik datoz: Herri Administraziorako eta Erakunde Harremanetarako diputatua eta Kontseiluko burua; Ogasun eta Finantzen foru diputatua; Gizarte Ekintzako diputatua; bozeramailea eta Iraunkortasuna eta Ingurune Naturala Zaintzeko diputatua; eta Ogasun eta Finantza Saileko idazkari nagusi teknikoa

14.02.2018 Ogasuna eta Finantzak

Gipuzkoako Finantzen Lurralde Kontseilua 2018/02/14

Donostian. Gipuzkoako Finantzen Lurralde Kontseiluan udal ordezkariei emandako informazioa. Kontseilua gaur (2018ko otsailaren 14a, asteartea) arratsaldean bertan bildu da, Herri Dirubideen Euskal Kontseilua atzo egindako bileraren ondoren.

Informazio hori erantsitako dokumentuan dago jasota, eta, horietan, lurraldeko udalerri bakoitzeko banakako datuak eskaintzen dira, 2017 ekitaldiko Udalak Finantzatzeko Foru Fondoaren likidazioari dagokienez.

*IKUSI TAULA: UDALERRI BAKOITZEKO DATUAK

Udalen Finantzaketarako Foru Funtsa

· 2017an, udalen finantzaketa (UFFF + konpentsazioa) 468 milioi eurokoa izan da
· Udalen finantzaketa (UFFF + konpentsazioa) %4,22 hazi da 2016tik 2017ra

Bestalde, Udalen Finantzaketarako Foru Funtsaren (UFFF) 2017ko likidazioaren berri ere eman diete foru arduradunek batzarkideei eta, arratsaldean, zuzenean partekatu dute informazioa udaletako ordezkariekin Gipuzkoako Finantza Kontseiluan. Horrela, funtsaren 2017ko zuzkidura 468 milio eurokoa da, lurraldeko udalen artean banatzeko. Honenbestez, 2016an baino 19 milioi euro gehiago izango dituzte, %4,23ko hazkundea. Aurrelikidazioarekin alderatuz gero ez da aldaketarik egon eta, beraz, eragina neutroa da; beraz, Gipuzkoako udalek ez dute aurten itzulketarik egin beharko.

>Laster EUDELetik landutako informazio gehiago eskainiko da UDALA aldizkaria ale monografiko berriaren bidez: ‘Udal finantzaketa-2018ko otsailak ’

13.02.2018 Nabarmenak

Udalen ordezkariek Herri Dirubideen Euskal Kontseiluaren urteko lehenengo bileran hartu dute parte

Eusko Jaurlaritzak, aldundiek eta udalek aurten Ekarpenen Lege berria adosteko konpromisoa hartu dute. Erakunde bakoitzaren finantziazio beharrizanei buruzko txosten bat egingo dute maiatzaren 31 baino lehen.

Vitoria-Gasteizen, 2018ko otsailaren 13an. Gaur arratsaldean, Herri Dirubideen Euskal Kontseiluaren urteko lehenengo bilera egin da; izan ere, aipatutako Kontseilua bilketa kopuruak aztertu eta herrialde osoko baliabideen banaketa erabakitzeko Euskadiko erakunde organo gorena da.

HDEK-k gaur, 2018ko otsailaren 13an, euskal ogasunen 2017ko bilketa berretsi du, aurretik jakinarazi izan zen bezala, 14.473,9 milioi eurokoa, iazkoa baino %11,8 gehiago. Hori, termino absolutuetan, 1.523 milioi euro dira.

Eudeleko Elkarteburuak datu hauek aldekoak direla esan du, “agertoki positibo” bat irudikatzen dutelako 2018ko egoera ekonomiko-finantzariorako, aurreko urteekin alderatuz, non udalek lurralde bakoitzaren foru funtsei dagozkien itzulketak direla-eta zailtasunei aurre egin behar izan dieten. Dena dela, Imanol Landak adierazi du “udaletako bilketaren inpaktua zein den benetan ezagutzeko, Finantzen Lurralde Kontseiluak beharrezkoak direla“. Hurrengo egunetan Gipuzkoa, Araba eta Bizkaian deituta daude, eta udal bakoitzaren banakako datuak xehetasun handiagoz aztertuko dituzte udal eta foru arduradunek, Foru Funtsei (FOFEL, Udalkutxa eta FFFM) 2017ko ekitaldirako dagokienean, eta tokiko mailan egoera zehatzago baloratzeko aukera emango dute.

18/02/13 Finantza Kontseiluak hartutako erabakiak (Iturria: EJ-Ekonomia eta Ogasuna)

Ekarpenen Lege berria, maiatzaren 31 baino lehen

Euskadiko erakunde guztiek hurrengo hilabeteetan Ekarpenen Lege berriari buruzko akordioa hartzeko konpromisoa hartu dute (2012tik atzeratzen ari da), urtea amaitu baino lehen testua Eusko Legebiltzarrera bidali ahal izateko.

Ogasun sailburu Pedro Azpiazuk astearte honetan eman du erabakiaren berri, Herri Dirubideen Euskal Kontseiluaren (HDEK) bileraren ostean. Bertan, Eusko Jaurlaritza, Bizkaiko, Gipuzkoako eta Arabako Foru Aldundiak eta EUDEL-Euskadiko Udalen Elkarteko ordezkariak daude.

HDEK-ko bileran, maiatzaren 31rako Euskadiko hiru erakunde mailetako (autonomikoa, forala eta udalekoa) finantziazio beharrizanei buruzko txosten bat onartzea erabaki da.

Testua, zeina Ekarpenen Legea aldatzearen aurreko pauso gisa egitea Euskadiko Toki Erakundeen Legeak erregulatzen baitu, egungo Ekarpenen Legea aldatuko duen araua egiteko oinarri izango da (2012tik atzeratzen ari da).

EUDELeko elkarteburu Imanol Landaren ustez, “oso lege garrantzitsua” da, Euskadiko erakundeen arteko diru-sarreren banaketa erregulatzen duelako, eta gogorarazi du arau horren gaineko erabakia hartzeak “udalen akordioa behar duela”, LTHren 28.10 artikuluak ezartzen duenaren arabera, akordio hori hiru foru ordezkariek eta hiru udal ordezkariek hartu behar dutelako, eta gehiengo osoa behar du (4 boto gutxienez).

Erlazionatutako albistea:“Udalen botoa ezinbestekoa da Ekarpenen Lege berrian”

Hiru lurraldeetako eta tamaina ezberdinetako udalak

HDEKn, udalek erakunde maila ezberdinekin batera parte hartzen dute, Eusko Jaurlaritzarekin eta hiru Foru Aldundiekin, alegia. Euskadiko Toki Erakundeen Legearen ostean, udalek aukeratutako hiru ordezkari dituzte Lurralde Historiko bakoitzeko, eta askotariko populazio-tamainako udalerrietakoak. Zehazki, hiru dira EUDELeko ordezkariak:

–Imanol Landa Jauregi, #Getxoko alkatea (Bizkaia) eta Eudeleko elkarteburua

– Josune Irabien, #Amurrioko alkatea (Araba)

– Eneko Maioz, #Orexako alkatea (Gipuzkoa)

09.02.2018 Berriak

EUDELek eta Euskadiko erakundeek Arreta Soziosanitarioaren aldeko apustua berresten dute

Eudelen elkarteburuak eta Osasun Arretako Euskal Kontseiluko ordezkariak, Bilboko zinegotzi Iñigo Pombok, 2017-2010 aldirako arreta soziosanitarioko lehentasun estrategiko berrien aurkezpenean hartu dute parte gaur goizean, Eusko Jaurlaritzaren, foru aldundien, udalen, Arartekoaren eta esparru soziosanitarioko eragileen ordezkari-talde handi batekin batera.

Bere hitzaldian, Iñigo Pombo, Eudeleko ordezkariak azpimarratu du estrategia hori giltzarria da gure sistema soziosanitarioa garatzeko. “Batetik, oinarrizko gizarte-zerbitzuak definitzerakoan, esaten da gizarte-zerbitzuen sisteman sartzeko ateak direla; bestetik, osasun zentroek eta lehen mailako arreta sanitarioak irekitzen dituzte osasun sistemarako ateak. “

Iñigo Pomboren ustez “behar-beharrezkoa da bi sistemen arteko elkarlana; bat-egite hori lehen mailako arreta soziosanitarioko taldeen bitartez egituratzen da. Hasieratik oso argi egon bada ere, zenbait zirkunstantzia tarteko, ezin izan da egoera hori ondo gauzatu, eta, beraz, estrategia soziosanitario gisa definitu behar izan da. Bi sistemek badaramate jada denboratxo bat elkarlanean; arazoei elkarrekin egiten diete aurre, baina, aurrera egiteko, harremanak errazteko tresnak behar dira, era horretan, behar dutenek aukera izan dezaten bi sistemek lan egiten dutenean “koordinatuta, aldi berean eta era egonkorrean” egin dezaten. “

Aurkezteko jardunaldia

Iñigo Urkullu Lehendakaria, gaur goizean, 2017-2020 Arreta Soziosanitarioko Lehentasun Estrategikoak aurkezteko Donostian egin den jardunaldiko buru izan da. Bertan, Jon Darpón Eusko Jaurlaritzako Osasun sailburua eta Beatriz Artolazabal Enpleguko eta Gizarte Politiketako sailburua ere izan dira, bai eta Ramiro González, Unai Rementería eta Markel Olano Arabako, Bizkaiko eta Gipuzkoako diputatu nagusiak, hurrenez hurren, Imanol Landa EUDEL Euskadiko Udalen Elkarteko presidentea ere, euskal administrazioetako ehunka ordezkarirekin, hirugarren sektoreko profesional eta kideekin batera, eremu guztiek pertsonen gizarte- eta osasun-beharrei erantzuteko plangintza berri horri laguntzeko.

Gaur aurkeztu den dokumentuak sei lehentasun zehazten ditu, eta horiek, aldi berean, 17 proiektu estrategiko garatzen dituzte, guztira.Honako hauek dira lehentasunak:

1.- Koordinazioaren egituraketa soziosanitarioa

2.- Baliabideen egituraketa soziosanitarioa

3.- Arretaren egituraketa soziosanitarioa

4.- Prebentzio soziosanitarioa eta herritarren parte-hartzea

5.- Ebaluazio soziosanitarioa

6.- Berrikuntza soziosanitarioa.

Informazio gehiago: http://www.irekia.euskadi.eus/eu/news/43792-lehendakari-reafirma-apuesta-las-instituciones-vascas-por-mantener-una-atencion-sociosanitaria-calidad-euskadi-haciendo-frente-los-retos-demograficos

02.02.2018 Berdintasuna

EUDELen azalpen-oharra eraso sexisten aurkako APPri buruz

Eraso sexisten aurkako APPa dela-eta, EUDELek argitu nahi du ez dela inolako erabakirik hartu berau Euskadiko udaletara zabaltzeko.

EUDELen iritziz, berdintasunaren alde eta emakumeekiko indarkeriaren kontra duen konpromiso sendotik, ezinbestekoa da tresna hori arretaz aztertzea, sektore-inplikazio ugari baititu, baita Eusko Jaurlaritzako Segurtasun Sailarekin batera hausnarketa egitea ere, bai halaber, hala badagokio, beste eragile instituzioal batzuekin. Hala bada, EUDEL dagoeneko Sailarekin jarri da harremanetan.

Bilbon, 2018ko urtarrilak 2.

Berriak

Azken berriak