EUDEL-Euskadiko Udalen Elkarteak irmoki gaitzetsi eta arbuiatzen ditu Berrizen emakume batek bikotekidearen eskutik jasandako erasoa eta Xixonen bi emakumek (bat, Bergarakoa) jasandako sexu-erasoa. EUDELek elkartasuna helarazi nahi die biktimei, haien familiei eta inguruko pertsonei.
EUDELek gogorarazten du erasoek eta heriotzek emakumeenganako indarkeriaren arazoaren alderdi bat baino ez dutela erakusten, izan ere, egoera hori emakumeen eta gizonen arteko desberdintasunean sortzen da. Emakumeenganako indarkeria era guztietan (psikologikoa, ekonomikoa, fisikoa, sexuala, bikarioa…) emakumeen duintasunaren eta segurtasun fisiko nahiz moralaren aurkako eraso larria da, eta, ondorioz, giza eskubideen urraketa larri eta onartezina.
Tragedia honek berriro dakarkigu gogora hala erakundeek nola euskal gizarte osoak daukagun erantzukizuna, gure udalerrietan Berdintasuna eraginkor egiteko. Zentzu horretan, gure sentsibilizazio eta prebentzio ekintzak indartzen jarraitu behar dugu, etorkizuna ordezkatzen dutenei zuzenduta, gure herritar gazteenei zuzenduta, alegia.
EUDELek babestu egiten ditu Berriz eta Bergarako udalek egin dituzten gaitzespen-adierazpenak, eta eraso horiek gaitzesteko antolatuko diren ekitaldi guztiekin bat egingo du, esate baterako, gaur arratsalderako Berrizko Udalak deitu duen kontzentrazioarekin. 19:00etan izango da, Urtiaga plazan.
2021eko uztailak 27.
Bileraren ondorengo prentsaurrekoan, erkidegoko erakunde guztien artean erdietsitako akordioaren garrantzia nabarmendu du EUDELen elkarteburuak, Ekarpenen Legean udalerrien finantziazioa “hobetu eta blindatzeko”. Hain zuzen, Gorka Urtaranek “mugarririk garrantzitsuentzat” jo du akordio hau, ETELen ondoren, “udalak erakunde gisa herrialdearen arkitekturan kontsolidatuko baititu, beste bi mailetako erakundeen pareko”.
EUDELen elkarteburuak balioa eman dio “aurrerapauso garrantzitsu” horri, udalerrien finantziaziorako bermea areagotzen baitu, Batzar Nagusiek ezin izango dutelako ezarri foru-arauetan ehuneko hori baino finantziazio txikiagorik. Halaber, Gorka Urtaranek esan duenez, “ezkutu gisa balioko du, gure finantziazioa babesteko eta gure herritarrek hurbilen dituzten erakundeengandik behar eta espero duten une nahiz egoera bakoitzari erantzun ahal izateko”.
Ikastaroaren amaierako blokearen izenburua “Euskadi Batasun Federalean txertatzea” izan da. Mar Zabala arduratu da sarrera egiteaz eta saioa moderatzeaz, eta bertan izan dira, besteak beste, Arola Urdangarin, Akitania Berria-Euskadi-Nafarroa Euroeskualdeko zuzendaria, eta Alberto López Basaguren, UPV/EHUko Zuzenbide Konstituzionaleko katedraduna.
Zuzendariak azaldu duenez, tokiko eremuan kezka agertu da birzentralizatzeko ahaleginak daudelako eta egungo pandemiaren krisi-garaian areagotu egin daitezkeelako ahaleginok. Zabalak azpimarratu du beharrezkoa dela “tokiko gobernu indartsuak eta erresilienteak” izatea, “udal-autonomiaren eta erantzukizunak eraginkortasunez eta efizientziaz gauzatzeko finantziazio nahikoaren bidez. Gertueneko gobernu-maila indartzea da helburua, gizarte-premiei hobeto erantzuteko eta pertsonak politika publikoen erdigunean jartzen laguntzeko“.
