eudel

16.12.2020 Nabarmenak

Gobernantza Bikaintasunerako Europako Zigilua aitortu diete Laudio, Irun eta Ermuko euskal udalei

Arduradun politikoek ELoGE zigiluaren bereizgarria jaso dute gaur goizean, hain zuzen, EUDELek eta Europako Kontseiluak ematen duten kristalezko dodekaedroa.

Irunek eta Ermuak lortu dute 2017an eskuratutako Europako aintzatespena

Laudio da ELoGE zigilua jaso duen Arabako lehenengo udalerria; guztira zortzi udalek jaso dute kalitate eta bikaintasunaren tokiko gobernuentzako Europako bereizgarririk handiena.

Berangok, Elgoibarrek eta Erandiok diploma bana jaso dute finalista gisa ELoGEren ebaluazioan.

Ekitaldiko Bideoa

Bilbon, 2020ko abenduaren 16an. Gaur goizeko 11:00etan, Bilboko EUDELen egoitzan egindako ekitaldian, Laudio, Irun eta Ermuko udalei Gobernantzaren Bikaintasunerako Europako Zigilua (ELoGE 2020) eman zaie. ELoGE zigilua kristalezko dodekaedro batek irudikatzen du eta Gobernu Onari buruzko hamabi printzipioko zerrenda batean bikaintasunaren kalifikazioa egiaztatuta duten tokiko gobernuentzako Europako bereizketarik handiena da. Printzipio horiek kalitate gorenaren eta berrikuntza demokratikoaren estandar gisa ezarri zituen Europako Kontseiluak.

EUDEL da Euskadiko udalerrietan zigilua emateko 2017tik egiaztatutako eskualdeko plataforma. ELoGE ebaluazioa 97 adierazleko tresna batean oinarritzen da. Tresna horri esker, herritarrentzako zerbitzu publikoen eskaintzak dituen indargune eta hobekuntza-arloak identifikatzeko aukera dute tokiko agintariek. Pandemia garaian, ELoGE zigiluak

tresna baliotsua da udalentzat, haren printzipioak garapen jasangarriaren helburuekin (GIH) bat datozelako. Hala, etorkizuneko erronkei eta eraldaketa sozialei begira, toki-erakundeak sendotzeko tresna lagungarria da.

Europako zigulua bi urtean behin berritu behar da. Zigilua lortzeaz gain, EUDELen proiektuak udalei gobernantza onaren etengabeko ebaluazio-prozesuan laguntzeko balio da eta, horrela, etengabeko hobekuntzaren pizgarri izan nahi du.

Ekimen hori udalentzako garrantzi handiagoa du pandemia-garaian. EUDELeko ordezkari eta Mungiako alkate Ager Izagirreren hitzetan, “ELoGE funtsezko proiektua da udalerrientzat eta EUDELentzat berarentzat eta garrantzi handiagoa hartzen du gaur egungo garaian. Tresna horrek gure erakundeen osasuna sendotzen laguntzen du, etorkizuneko krisiei eta susperraldi jasangarri eta erresilienteak dakartzan erronkei dagokienez”.

Ager Izagirrek nabarmendu duenez, “EUDELek udal gobernantza berritzeko lan egiten du, Euskadin eta Europan lankidetzan arituz, gero eta udal trebeagoak, eraginkorragoak eta efizienteagoak izateko eta gizarte-ongizatea nahiz bizi-kalitatea bermatzen duten zerbitzu publikoak izateko”.

Gaurko ekitaldian Europako Kontseiluko Gobernantza zuzendaria den Snežana Samardžic-Markovic andreak ere parte hartu du, bideo mezu baten bidez, eta sei euskal hautagaiak zoriondu ditu. Izan ere, pandemiak markatutako testuinguru batean eta, beraz, aurreko edizioetan baino konplexuagoa den egoeran, proiektua garatu dutelako. Europako ordezkariak azaldu duenez, zigiluaren balioa “udalek gobernu ona lortzeko eman behar dituzten urratsei buruz Europa mailan ikuspegi bera lortzea da. Garrantzitsua da euskal agintariek, norvegiarrek, greziarrek, frantsesek edo italiarrek irizpide berberekin lan egitea. “

ELoGE zigiluaren hirugarren deialdia da EAEko udalerrietan. 2017an, Europako Kontseiluak EUDEL egiaztatu zuen, Euskadiko udalerrietan Bikaintasun Zigilua emateko. 2017an eta 2018an lehenengo bi edizioak egin ziren eta, hirugarrenarekin, aurten, guztira 16 udalek parte hartu dute; horietatik, dagoeneko zigilua duten 7 udalek.

Orain arte, Europa osoko 100 udalerrik baino ez dute Europako Kontseiluaren zigilua. Euskadiko udalerriez gain, Kataluniako udalerri bat ere badago, Parets del Vallés.

ELoGE zigilua duten euskal udalerriak

ELoGE zigilua duten EAEko udalak biztanle-tamaina guztietako udalerriak dira:

10.000 biztanle baino gutxiago: Legazpi eta Urnieta
10.000-20.000 bizt.: Laudio, Ermua eta Bermeo
30.000-50.000 bizt.: Basauri eta Leioa.
60.000 bizt baino gehiago.: Irun.

ELoGE zigilua duten EAEko udalen aniztasunak erakusten duenez, Europako tresna horrek funtzionatzen du, baliozkoa da eta Euskadiko udaletara zabal daiteke.

Udal jardunbide egokien bankua

Ager Izagirrek aurreratu duenez, EUDELen hurrengo helburua proiektu honetan Europako Kontseiluarekin lankidetzan jarraitzea da, EUDELen zerbitzu-gutunaren barruan eskaintzeko, oro har, EAEko udalei. Aldi berean, Gobernu onaren arloko udaletako praktika egokiak eta esperientzia aurreratuenak bilduko dira, ELOGEren EAEko webgunean argitaratzeko: https://eloge.eudel.eus/buenas-practicas.php

Metodologia: autoebaluazioa, herritarrei eta tokiko hautetsiei egindako inkestak

Euskal ELoGE zigiluaren 2017ko eta 2018ko bi proiektu pilotuetarako, EUDELek egokitu egin zuen Europako metodologia estandarra EAEko udalerrien egoera espezifikora, 5.000 biztanletik beherakoak barne, eta gobernantzaren arloan izandako ibilbide desberdina kontuan hartuta (gardentasun-atariak, jokabide-kodeak, parte hartzeko organo eta sistemak).

Lehenengo pilotaje horren emaitza autoebaluaziorako tresna bat izan zen, 97 adierazlerekin, Europako Kontseiluak zehaztutako Gobernu onaren hamabi printzipioei dagokienez.

Autoebaluazioarekin batera, udalerri bakoitzak inkestak egin behar izan dizkie bere herritarrei, bai eta udal ordezkari politikoei ere. Horietan, agindu horiek betetzen diren eta aurrerapenak norainokoak diren baloratu behar dute.

ELoGE 2020 balantze-txostenak etorkizuneko ELoGE edizioetarako zenbait hobekuntza dakartza, besteak beste: udal webguneetan informazio publikoa eguneratuta edukitzea (gardentasun-atariak), kargu politiko eta zuzendarientzako Jokabide Kodeak garatzea, herritarren eskubideak eta prestazioaren kalitate-konpromisoak jasotzen dituzten Zerbitzu Gutunak argitaratzea, hainbat arlotan ikuskaritza independenteak egitea (kalitatea, berdintasuna, DBLO, sustapena eta abar), edo Prestakuntza Planak bultzatzea, udal langileak haien errendimendua etengabe hobetzera motibatzeko eta orientatzeko.

Gobernantza Onaren 12 printzipioak:

Gobernantza Onaren Europako 12 printzipioek honako gai hauek biltzen dituzte: ordezkaritza eta parte-hartzea, giza eskubideen errespetua, aniztasuna eta gizarte-kohesioa, hautetsien jokabide etikoa, gardentasuna eta berrikuntzaren aldeko apustua.

Hauteskundeak eta bidezko ordezkaritza nahiz parte-hartzea
Erantzuteko gaitasuna
Efizientzia eta efikazia
Irekia izatea eta gardentasuna
Zuzenbide-estatua
Jokabide etikoa
Eskumenak eta gaitasunak
Berrikuntza eta aldaketen aurrean irekita egoteko joera
Jasangarritasuna eta epe luzerako orientazioa
Finantza-kudeaketa osasuntsua
11. Giza eskubideak, kultura-aniztasuna eta gizarte-kohesioa
Kontuak emateko betebeharra

15.12.2020 Euskara

BIKAIN 2020 ziurtagiria lortu du EUDELek

Bilbo, abenduaren 15a. Arratsalde honetan bertan, Bilboko Euskalduna Jauregian egindako ekitaldian, Batzorde Eragilearen ordezkariak, Hondarribiko alkate Txomin Sagarzazuk, antolakuntza-buru Joseba Intxaustirekin batera, Hizkuntza Politika sailburu Bingen Zupiriaren eskutik jaso du BIKAIN ziurtagiria, hizkuntza-kudeaketaren kalitateagatik aurten aintzatetsitako erakundeei emandako ziurtagiria.

Gorka Urtaran EUDELen elkarteburua oso pozik dago euskal udalei EUDELek egunero ematen dien zerbitzurako hain garrantzitsua eta beharrezkoa den ziurtagiri hori lortzeagatik.

“Euskal udalerrien lana ziurtagiri honetarako akuilu izan da; udal konpromisoarekin bat eginez, horri esker eta horri erantzunez. EUDELek udalekin batera euskara sendotu ahal izan du, lan-hizkuntzaren erronkaren bidean, gainerakoetan bezala udalei zerbitzu onena eman ahal izateko, eta areago euskaran, gure izateko arrazoian” Gorka Urtaran, elkarteburua.

Bikain ziurtagiria

BIKAIN Eusko Jaurlaritzak ematen duen ziurtagiri ofiziala, publikoa eta doakoa da. Esparru sozioekonomikoan euskararen presentziaren, erabileraren eta hizkuntza-kudeaketaren normalizazio-maila egiaztatu eta aitortzen du.

Azaroan zehar, EUDELeko antolakuntzak eta talde teknikoak BIKAIN ebaluazio-prozesuan parte hartu dute, eta horren bidez oinarrizko maila lortu da.

Ebaluazio horretan, ezarritako neurri-unitatea Erreferentzia Marko Estandarra (EME) izan da, ebaluaziorako 2 ardatzek eta 6 elementuk osatuta:

Zerbitzu-hizkuntza

1.-Komunikazioa eta erakundearen irudia (informazioa, web eta sare sozialak, errotuluak eta kartelak, ekitaldiak eta jardunaldiak, …).

2.-Udalekiko harremanak, politikariak eta teknikariak.

Lan-hizkuntza

3.-Barne-komunikazioa eta lan-tresnak (baliabide informatikoak, kudeaketa-sistemak…).

4.-Pertsonen kudeaketa (giza baliabideak, prestakuntza…)

5.-Kanpo-harremanak (erakundeak, eragileak eta erakunde laguntzaileak, enpresak, herritarrak…).

6.-Kudeaketa-sistema (hizkuntza-politika, pertsonak eta baliabideak).

14.12.2020 COVID19

Documento actualizado “RESPUESTAS A PREGUNTAS FRECUENTES” (14 diciembre)

Erantsian bidaltzen da abenduaren 14ean eguneratutako dokumentua: “Ohiko galderen erantzunak. Koronabirusari aurre egiteko neurri zehatzak”

DOKUMENTUA JAITSI

Dokumentu honen helburua da, ohiko galdera-erantzunen zerrenda baten bidez, honako Dekretuen edukia hobeto ulertzea eta interpretatzea:

926/2020 Errege Dekretua, urriaren 25ekoa, SARS-CoV-2 sistemak eragindako infekzioen hedapena geldiarazteko alarma-egoera deklaratzen duena (2020ko urriaren 25eko BOE, 282. zk.).
44/2020 Dekretua, abenduaren 10ekoa, lehendakariarena, zeinaren bidez prebentzio-neurri espezifikoak testu bakar batean bildu eta eguneratuko diren, alarma-egoeraren adierazpenaren eremuan, egoera epidemiologikoaren bilakaeraren ondorioz eta SARS-CoV-2k eragindako infekzioen hedapena geldiarazteko. (248. zk., ostirala, 2020ko abenduaren 11).

Dokumentua egitura honen arabera ordenatuta dago:

Oinarrizkoa galderak 3. orr.
Mugikortasuna 4. orr.
Ostalaritza 8. orr.
Kirola 10. orr.
Besteak 13. orr.

11.12.2020 Nazioartea

Datorren asteazkenean, abenduaren 16an, jakingo dugu zein diren Gobernantzako Bikaintasunaren Europako Zigilua lortzen duten Euskal Udalak –ELoGE 2020–

Hona hemen hautagaiak: LAUDIO, Araban; BERANGO, ERANDIO eta ERMUA, Bizkaian; eta ELGOIBAR eta IRUN, Hiru hilabetez, sei udalek autoebaluazio-prozesu zorrotza egin dute, Gobernu Onaren hamabi printzipiotan eta 97 adierazletan oinarrituta.

ELoGE zigilua Europako Kontseiluaren ekimena da, eta tokiko gobernantzaren kalitatearen, eraginkortasunaren eta berrikuntzaren etengabeko hobekuntza bultzatzea du xede.

2017an, EUDEL izan zen ELoGE metodologia aplikatzeko Europako Kontseiluak egiaztatu zuen lehen eskualde-plataforma.

Gaur egun, zigilua aintzatetsita duten 7 euskal udal daude. Guztira, EAEko 16 udalerrik parte hartu dute Euskadin egin diren ELoGEren hiru edizioetan.

Ekitaldia goizeko 10:00etan hasiko da, hautagai diren sei udaletako alkateen parte-hartzearekin: Elgoibar, Ermua, Irun, Berango, Erandio eta Laudio.

Zeremonia osoa streaming bidez zuzenean jarraitu ahal izango da, EUDELen YouTubeko kanalean:

https://www.youtube.com/watch?v=omr07LoPnQM&feature=youtu.be

UDAL HAUTAGAIEN ZERRENDA IKUSI

PROGRAMA JAITSI

Bilbon, 2020ko abenduaren 14an. Datorren asteazkenean, abenduaren 16an, Europako Kontseiluak ematen duen Gobernantzako Bikaintasunaren Europako Zigiluaren (ELoGE) hirugarren ekitaldia egingo da EUDELen Bilboko egoitzan. Gobernu onaren eta berrikuntza demokratikoaren arloan Europako estandarrak (bikaintasun-maila) maila altuan betetzen dituztela egiaztatzen duten tokiko gobernuek Europan duten onarpenik handiena da.

Banaketa-ekitaldia goizeko 10:00etan hasiko da. Bertan izango dira Ager Izagirre, Mungiako alkatea eta EUDELen ELoGE Batzorde Instituzionaleko presidentea, eta Europako Kontseiluko Gobernantzako zuzendari Snežana Samardžic-Markovic, bideokonferentzia bidez mezu bat bidaliko duena.

Ondoren, hautagai diren udaletako sei alkateek labur-labur baloratuko dituzte EUDELen eta Europako Kontseiluaren proiektuko parte-hartzaile gisa izandako esperientzia eta helburuak.

ELoGE 2020 zigilurako hautagaiak

BERANGO, ERANDIO eta LAUDIO Europako bereizgarria eskuratzeko hautagai dira lehen aldiz.
ERMUAK eta IRUNEK 2017an lortu zuten zigilua, eta berritu egin nahi dute.
ELGOIBAR hautagai izan zen 2017an, eta bigarren aldiz aurkeztu da.

ELoGE Europako Zigiluaren ebaluazioa

ELoGE bereizgarria kristalezko dodekaedroa da, hamabi aurpegi dituena, bat gobernu onaren hamabi printzipioetako bakoitzarentzat.

ELoGE jasotzeko hautagai diren udalek beren gobernantza-politiken eta -praktiken ebaluazio zehatza egin behar dute, Europako Kontseiluak gobernantza egokirako zehaztutako hamabi printzipioetan oinarrituta. Besteak beste, hautetsien jokabide etikoa, gardentasuna, kontu-ematea, bidezko parte-hartzea, finantza-kudeaketa ona, berrikuntza eta eraldaketa, eraginkortasuna eta efizientzia.

Ebaluazioari esker, tokiko agintariak beren indargunez eta ahuleziez jabetzen dira, komunitateari zerbitzu publikoak eskaintzean. Pandemia garaian, ELoGE tresna baliotsua da udalentzat, haien printzipioak bat datozelako garapen jasangarriaren helburuekin (GJH), eta tokiko erakundeak indartzen laguntzen du etorkizuneko erronken eta eraldaketa sozialen aurrean.

Tokiko gobernuentzako kalitatearen “label”-a bi urtean behin berritu behar da, hala, etengabeko hobekuntzan eta beste udalerri batzuetan aplika daitezkeen jardunbide egokiak sustatzen laguntzeko.

ELoGE zigilua duten Euskal udalerriak

EUDEL Europako Kontseiluak Euskadiko udalerrietan Europako Zigilua emateko akreditatutako eskualde-plataforma da. Bi edizio egin dira lehenago, 2017an eta 2018an, eta 7 udalek jaso dute ELoGE zigilua: Basauri, Ermua, Irun, Leioa, Urnieta, Bermeo eta Legazpi. Horiek dira ELoGE zerrenda esklusiboarekin bat egin duten EAEko lehen udalerriak. Zerrenda hori Europako bereizgarriarekin aintzatetsitako ehun tokiko gobernuk baino ez dute osatzen.

Hiru edizioetan (2017, 2018 eta 2020an), guztira EAEko 16 udalerrik hartu dute parte EUDELen eta Europako Kontseiluaren proiektuan.

Europako Kontseiluaren Zigilua emateko irizpideak 2010ean jarri ziren lehen aldiz, Europako berrogei bat lurralde-erakundetan (Bulgaria, Norvegia, Ukraina, Belgika, Espainia eta Frantzia).

Informazio gehiago, EUDELen ELoGE webgunean: https://eloge.eudel.eus

EUROPAKO KONTSEILUA: www.coe.int/good-governance

10.12.2020 Berriak

Laudioko alkatea, Ander Añibarro, EUDELen Batzorde Eragilearen kide berria

EUDELeko gobernu-organoan, Añibarro Euskadiko udalerrien ordezkari izango da 2023ra arte.

Bilbon, 2020ko abenduaren 10ean. Laudioko alkate Ander Añibarro Maestre gaur bihurtu da EUDELen Batzorde Eragilearen kide. EUDELeko gobernu-organoa hiru lurralde historikoetako hamabost alkatek osatzen dute, eta Amurrioko alkate izandako Josune Irabienek utzitako hutsunea beteko du Añibarrok. Hain zuzen, Irabien joan den azaroan Eusko Jaurlaritzako Toki Administrazioekiko Harremanetarako eta Administrazio Erregistroetako zuzendari izendatu zuten.

Lanbidez erizaina, Ander Añibarro Maestre Laudioko alkate izendatu zuten, hots, Arabako populatuena den udalerrikoa, 2019ko maiatzeko azken udal-hauteskundeetan. 31 urte dituelarik, Añibarro EUDELeko zuzendaritzako alkaterik gazteena da, eta udal-politikagintzan ibilbide zabala du: Laudio bere herriko zinegotzi gisa hasia (2015), inguruko herrien zerbitzuko lana zabaldu du Aiarako Eskualdeko presidente gisa (2015-2019). Era berean, Eusko Jaurlaritzako Gazteriako zuzendari izan da, 2017. eta 2019. urteen artean; Enplegu eta Gizarte Politiketako Sailaren aholkularia 2017an, eta, ondoren, Kultura eta Hizkuntza politika sailako aholkulari 2019an izan da.

Gaur goizean, Batzorde Eragileko kide gisa, urteko azken bilkura telematikoan hartu du parte, elkarteburuarekin, bi elkarteburuordeekin eta gainerako alkateekin batera. Gaurtik aurrera, Laudioko alkateak funtzio berriak hartuko ditu udal-autonomiaren eta tokiko interesen defentsan; Euskadiko udalerrien ordezkari izango da erakunde-arteko hainbat foro eta taldetan.

EUDELeko Batzorde Eragilea

EUDELen 2019-2023 epealdirako gobernu-organoa Elgoibarren eratu zen joan den irailaren 19an, maiatzeko udal-hauteskundeen ostean, Euskadiko udalerrien ezohiko batzar orokorrean. 2019ko Batzarrean, legealdi honetan Euskadiko udalerrietan alkatetza duten taldeen artean adostutako hautagaitza bateratu bat bozkatu zen.

Batzorde Eragilea elkarteburu batek, bi elkarteburuordek eta hamabi batzordekidek osatzen dute.

Gaur egungo osaera

Elkarteburua: Gorka Urtaran Agirre, Vitoria-Gasteizko alkatea
Elkarteburuordea: Nagore Alkorta Elorza, Azpeitiko alkatea
Elkarteburuordea: Jose Antonio Santano Clavero, Irungo alkatea

Batzordekideak (12):

Angela Eguia Liñero, Gordexolako alkatea
Txomin Sagarzazu Ancisar, Hondarribiko alkatea
Ager Izagirre Loroño, Mungiako alkatea
Aitziber Oliban Gutierrez, Erandioko alkatea
Txelo Auzmendi Jimenez, Asparrengo alkatea
Ane Beitia Arriola, Elgoibarko alkatea
Mikel Torres Lorenzo, Portugaleteko alkatea
Saioa Elejabarrieta Amorrortu, Lemoako alkatea
Iñigo Gaztelu Bilba, Larrabetzuko alkatea
Miren Koldobike Olabide Huelga, Legazpiko alkatea
Xabier Lertxundi Asteasuinzarra, Hernaniko alkatea
Ander Añibarro Maestre, Laudioko alkatea

Batzorde Eragilearen eginkizunak (EUDELen Estatutuen 20. art.)

Batzar Orokorraren erabakiak betearaztea.
Elkartea zuzentzea eta administratzea, bere helburuak bete ditzan.
Instantzia politiko eta administratiboekin harremanetan egotea.
Lurralde Batzordeetako lanak koordinatzea.
Euskalduntzeko Plana egitea eta bete egiten dela bermatzea.
Genero Berdintasunerako Planak egitea eta bete egiten direla bermatzea.
Azterketak eta argitalpenak orientatzea.
Ondarearen administrazioa zuzentzea.
Elkartearen zerbitzura dauden langileen politika zuzentzea. Batzarrari Elkarteko lanpostuen zerrendaren proposamena aurkeztea, eta aurreikusita ez dauden egoerei aurre egiteko aldi baterako kontratazioei buruzko erabakiak hartzea. Urteko lehenengo batzar orokorrean horren berri ematea.
Bazkide berriak atxikitzeko eskabideari egoera formala ematea.
9.b eta c artikuluetan adierazitakoaren arabera, bazkide-izaera galtzeko espedientea bideratzea.
Elkarteak berak izendatu behar dituenean, erakunde horietako udal-ordezkariak izendatzea, 22. artikuluan xedatutakoari inolako kalterik egin gabe.

03.12.2020 Modernización, Digitalización e Innovación

EUDELek udalen foro birtual bat egingo du, udalerrien garapen iraunkorrerako proiektu “adimendunak” identifikatzeko

Laster, katalogo bat egingo da: proiektu inspiratzaileei eta finantzaketa iturriei buruzkoa. Abenduaren 10ean (osteguna), bigarren foro bat egingo da, esparru teknologikoko eragile publiko-pribatuekin.

Bilbon, 2020ko abenduaren 3an. Bihar, ostirala, hiru lurralde historikoetako udaletako hogeita hamar arduradun tekniko nahiz politikok foro birtual batean parte hartuko dute; EUDELek eta Eusko Jaurlaritzaren Ekonomia Garapen, Jasangarritasun eta Ingurumen Sailak antolatu dute, Deusto Cities Lab Katedrarekin elkarlanean. Foroaren aurkezpena hauek egingo dute: Aitziber Oliban Erandioko alkate eta EUDELen Batzorde Eragileko ordezkariak eta Leyre Madariaga Eusko Jaurlaritzaren Ekintzailetzaren, Berrikuntzaren eta Informazio Gizartearen zuzendariak.

PRENTSA OHARRA JAITSI

“Udalerri adimendunen” topaketa hau “Herrismartik” Gobernantza eta Udal Garapen Adimenduneko Estrategiaren testuinguruan kokatuta dago. Ekimen hori, 2017az geroztik, Eusko Jaurlaritzaren eta udalen elkarlanak sustatzen du, tokiko esparruan Euskadiko 2020ko Agenda Digitala (AD@2020) ezartzeko xedez.

AD@2020ren bidez, Eusko Jaurlaritzak bere egin nahi du teknologia digitalek eskaintzen dituzten aukerak Euskadin errealitate bihurtzeko erronka, 2020ko Europan, Euskadi erreferentziazko lurraldea izan dadin lehiakortasunean, ongizatean, integrazio sozialean eta enpleguaren kalitatean.

Teknologia tokiko udalerrien eta haien eraldaketaren zerbitzura

Foroak lanerako hainbat espazio izango ditu online, eta horietan parte hartzen duten udaletako kideek elkarrizketa eta ideiak trukatzeko dinamikak egingo dituzte, IKTak tokiko bizitzako askotariko eremuetan txertatzeari dagozkien beren esperientziei buruz hitz egiteko.

Topaketaren helburua da Euskadin eta inguruan aitzindariak izan daitezkeen tokiko proiektu berritzaileak identifikatzea, udalerrien garapen iraunkorrari eta “adimendunari” dagokionez dauden erronkei aurre egiteko teknologia erabiltzeko. Saioaren dinamikak tokiko ekintzaren esparru guztietan sakonduko du erronka global handien aurrean (soziala, ekonomikoa, ingurumenari dagokiona, kulturala…).

Foro horretan identifikatutako proiektuak “esperientzia inspiratzaileak” eta tokiko proiektuetarako finantzaketa iturriak bilduko dituen katalogoan sartuko dira, eta EUDELek Euskadiko udalei bidaliko die; halaber, www.eudel.eus atarian eta www.herrismartik.eus programaren atarian argitaratuko da.

Tokiko erantzunak erronka globalei

Euskadiko proiektuen “erradiografia” egiteko, berreskuratze iraunkor, inklusibo eta erresilientearekin lotutako arloetan jarriko da ardatza, eta, besteak beste, hauek izan daitezke:

Ingurumena: efizientzia energetikoa, hondakinen kudeaketa, uraren kudeaketa, mugikortasuna, zarata, klima-aldaketa…
Gizartea: zahartze aktiboa, inklusioa, arreta soziosanitarioa, segurtasun urbanoa, pobrezia energetikoaren aurkako borroka…
Ekonomia: finantzaketa iturriak, udal zerbitzu adimendunak…
Kultura: hezkuntza digitala, gaitasun teknologikoak, herritar konprometituak eta ahaldunduak…

Ekimen berritzaileen trukeaz gainera, beste gai batzuk ere landuko dira: udalen eta gainerako erakundeen arteko kolaborazioa, aliantza publiko-pribatuak, eta halako proiektuak Euskadiko udalerrietan gauzatzeko behar diren gaitasun eta baliabideak.

Abenduak 10, osteguna. Marketplace foroa, udalen, teknologia-enpresen eta teknologia-eragileen artean

Ostiraleko saioa osatzeko, abenduaren 10ean (osteguna), bigarren foroa egingo da. Saio hori toki-erakundeen eta sektore pribatuaren artean harremanak sortzen laguntzeko izango da.

Azoka eta kongresuetako “Marketplace” erakusketa-formatua baliatuta, teknologia-sektoreko erreferentziazko enpresak eta Zientzia, Teknologia eta Berrikuntzaren Euskal Sareko eragileak gonbidatuko dira, merkatuan dauden soluzioak aurkez ditzaten. Udal-garapen iraunkorraren erronkei erantzuten lagundu dezaketen ekimenak bilatuko dira, eta udalekin eurekin kontrastatuko dira.

01.12.2020 Euskara

Abenduak 3: 2020ko Euskararen Nazioarteko Eguneko Adierazpena

Euskara, aurrerabide

Gizartea euskaraz biziberritzea helburu

Inoiz inork pentsatuko ez zukeen eran jo gaitu gaitzak. Beste horrenbeste, gaitzaren ondorioek. Mundu osoa, gizarte guztiak, egitura guztiak, pertsona guztiok jarri gaitu geure benetako neurriaren aurrean, buruz buru. Kupidarik gabe utzi du agerian ahaztu nahi genukeen zerbait: zaurgarriak gara; zaurituta gaude.

ADIERAZPENA JAITSI

Erantzukizunaren bidetik heldu diogu erronkari, denon indarrak batuz. Bai baitakigu ez dagoela beste irtenbiderik. Euskararen hiztun elkarteak ere sufritu du pandemiaren eragina, bereziki erabilera mailan. Zentzu horretan, erakunde publikoen konpromisoa sendoa eta egindako lana handia izanagatik ere, ezin izan diogu nahi bezala erantzun.

Euskaldunok, baina, ezin dugu ahaztu badela funtsezko ekarpen bat, gizarte-ahalegin itzel eta miresgarri horren osagai ezinbestekoa eta geure esku soilik dagoena: euskaraz egin behar diogu aurre mundu mailako krisiari; euskaraz egin behar dugu ilunpetik argira eramango gaituen bidea; euskaraz sendatuko gara, euskaraz sendatuko dugu geure gizartea; euskaraz besarkatuko ditugu mundu osoko gizakiak. Bat garelako. Euskaraz bat mundu osoarekin.

Horixe da euskaldunok –neurri batean edo bestean euskaraz bizi garen munduko herritarrok, alegia– euskara gero eta gehiago, gehiagorekin eta gehiagotan erabiliz giza garapenari egiten diogun ekarria. Gizarte kudeaketa aurreratuari gaineratzen diogun balio erantsia.

Banaka heltzen diogu, jakina, euskaraz gero eta gehiago bizitzeko konpromisoari. Nahitaezko zutabea baita norberaren eginahal hori edozein aurrerabidetan, oso bereziki gizarte prozesu konplexuetan, eta horixe da euskara biziberritzea helburu duena ere: gizarte prozesu konplexu bat, ertz eta osagai ugari duena.

Ongi asko dakigu hori mundu osoko euskaldunok.

Badakigu, besteak beste, euskaldunok euskararen hiztun elkartea osatzen dugula, eta Euskaraldian norberaren erabakimenetik abiatzen dela euskara gehiago, gehiagorekin eta gehiagotan erabiltzerakoan inguruan hainbatetan sortzen zaizkigun oztopoak gainditzeko bulkada.

Baina badakigu, era berean, ezinbestekoa dugula elkarrengana biltzen gaituen bulkada ere. Norabide biko bektorea baita euskara eta euskaldunok lotzen gaituena: euskarak herri egiten gaitu; euskal hiztunon komunitateak egiten du euskara orainaren eta etorkizunaren hizkuntza.

Bide horretatik heldu zaizkio beti euskarari aurrerapauso behinenak: norberaren eta gizartearen konpromisoak sendo uztartzetik; unean uneko beharrizanei euskaraz erantzuteko erabaki sendotik; etorkizunerako bidea euskaraz zolatzeko euskal instituzioek, gizarteak eta gutariko bakoitzak egindakotik.

Euskaraldiak eskaintzen digu aurten berriz ere zailtasunak aukera bilakatzeko abagunea, krisia aukera bihurtzeko lanabesa. Ingurumari aldrebesean dator, ezbairik gabe, aurtengoa, eta horrek areagotu egingo du guztion eta bakoitzaren konpromisoaren balioa, administrazio eta erakunde publikoena barne.

Aurtengoan, balio berezi batez apainduko da ahoa bizi, belarria prest eta bihotza kartsu dugun guztion ekimena. Aurtengoan, inoiz baino erabakigarriagoa izango da euskararekiko gertutasunezko keinu praktiko oro, euskal hiztunongandik zein euskararen zabalkundean erdaretatik lagundu nahi dutenengandik datorrela ere.

Esanahi berezi batez jantziko da aurten, ezinbestez, euskara gehiago, gehiagorekin eta gehiagotan erabiltzeko ahalegina: egokitu zaigun ataka larritik ateratzeko erabakiari, euskaraz ateratzearen ezinbestekotasuna erantsiko diogu euskal hiztun nahiz euskararen lagun orok.

Izan ere, bagenekien euskaraz zetorrela geroa, euskaraz ere mintzo dela etorkizuna, eta aurten beste zerbait ikasi dugu: egoera zailetatik ateratzeko eginahalean lagungarri dugu euskara, bidelagun ezinbestekoa. Krisialditik sendoago ateratzea helburu dugun honetan, erabil dezagun euskara ere aurrera egiteko lanabes gisa.

Euskaraz biziberritu behar dugulako geure gizartea.

Euskararen ahotsa zor diogulako munduari.

Euskaraz garelako munduko herritar.

Euskara aurrerabidea delako.

01.12.2020 Berriak

Berrituz Topaketa 2020 (abenduak 11, on line): Tokiko Gizarte Zerbitzuen jardunbide egokiak

Lehenengo arretako gizarte-zerbitzuak pandemiaren aurrean: ikasteko eta berritzeko aukera

2020ko abenduaren 11a online (egitaraua | aldez aurreko zen-ematea)

Aurten ere, Eusko Jaurlaritzaren eta SIISen Berrituz ekimenak jardunaldi bat antolatu du udaletako politikarientzat eta teknikarientzat, esperientziak trukatzeko eta tokiko gizarte-zerbitzuen inguruko ikaskuntza kolektiboa bultzatzeko.

Lehen edizioa iaz izan zen Vitoria-Gasteizen, eta aurten era birtualean egingo da abenduaren 11n, ostiralarekin, 10:00etatik 13:30era.

Eusko Jaurlaritzako Gizarte Zerbitzuetako zuzendaria den Marian Olabarrietaren hitzaldi bat izango da jardualdian, ‘Inor Atzean Utzi Gabe’ funtsari buruzkoa.

Hiru jarduera egokiak ere aurkeztuko dira:

Lagunkate programa, nagusiengana telefono deien bidez hurbiltzen datzana (Donostiako Udala).
Covid-19ren aurka Lan Egiten Duten Profesionalentzako Laguntza Psikologiko Taldea (Gasteizko Udala).
Etxerik gabeko pertsonentzako arreta pandemia garaian (Bilboko Udala).

Gainera, mahai-inguru bat antolatu da, ondoko adituekin: Lucía Martínez Virto (Nafarroako Unibertsitate Publikoko irakaslea), Loreto Osa (Pasaiako Udaleko Gizarte Ekintzaren zinegotzia), Maite Peña (Gipuzkoako Foru Aldundiko Gizarte Politiketako diputatua) eta Patricia Bezunartea (Espainiako Gobernuko Familia Aniztasunerako zuzendari orokorra). Joseba Zalakainek, SIIS Dokumentazio eta Ikerketa Zentroko zuzendaria denak, mahaia moderatuko du.

Ekitaldia doan da eta plazak, mugatuak. Parte hartzeko, nahikoa da izen-emateko formularioaren bidez erregistratzea.

Author

Azken berriak