Eudelek eta Arabako Foru Aldundiak osaturiko erakunde arteko mahaiak lehenengo bilera egin du.

Gasteiz, 2013ko urtarrilaren 13a. Arabako Gizarte Zerbitzuen Mapa egiteko Erakunde arteko Mahaiak gaur egin du bere lehenengo bilera, eta bertan foru aldundiak eta lurraldean ordezkaritza daukaten alderdi guztietako alkateek parte hartu dute. Organo horren xedea da zerbitzu eta prestazioen eskumenak nola bananduko diren zehaztea, eta banaketa hori gauzatuko da Euskal Autonomia Erkidego osoan aurtengo urtearen bukaeran indarrean sartuko den Gizarte Zerbitzuen Kartera berria aplikatuz.

Lotutako berria: Arabako udalei Gizarte Zerbitzuen eskumen banaketa berria aurkezpena

Halaxe hasi da foru erakundearen eta Arabako udal eta kuadrillen artean egingo den lan handiaren lehenengo fasea, eta lan hori amaitu behar da adostuz zein erakundek hartuko duen gizarte prestazio eta zerbitzu bakoitzaren ardura udal bakoitzean. Azken xedea da eskubide subjektibo gisa bermatzea interesdunek modu homogeneoan eskura dezatela zerbitzuak eta diru prestazioak, haien bizilekua gorabehera.

Egun Arabako Foru Aldundiak hartzen du bere gain hiritik kanpoko zerbitzu ia denak emateko ardura, bai eta Gasteizen mendekotasun egoeran dauden pertsonei arreta ematekoa ere, baina nola indarrean sartu diren Gizarte Zerbitzuen Legea eta Gizarte Zerbitzuen Kartera udalek eman behar dute lehen mailako zerbitzuen hornidura. Horregatik argitu behar da zein parametro oinarri jarraitu behar duen aldundiak zerbitzuak ematen, edo ea udal bakoitzak hartu behar dituen zerbitzu horiek bere gain.

EUDEL-Euskadiko Udalen Elkartearen izenean hauexek egon dira: Mar Zabala, bere zuzendari nagusia; Josune Irabien eta Natividad López de Munain (EAJ), Amurrioko eta Burgeluko alkateak hurrenez hurren; Unai Gutiérrez (EH Bildu), Zuiako alkatea; José Javier Martínez (PSE), Iruña Okako alkatea; Pedro León (PP) Guardiako alkatea, eta Aitor Abecia (AZI talde independentea), Zanbranako alkatea. Nerea Melgosa Gizarte Politiken zinegotzia izan da bileran, Gasteizko alkate Gorka Urtaran jeltzalearen ordezkaritzan.

Beatriz Artolazabal Gizarte Zerbitzuen Saileko foru diputatua, José Luis Alonso Gizarte Zerbitzuen zuzendaria eta (GOFE) Milagros López de Aberasturi Gizarte Ongizaterako Foru Erakundeko zuzendari-kudeatzailea izan dira gaur goizean lan bileran foru aldundiaren ordezkaritzan; baita saileko beste arduradun batzuk ere.

Gaur goizeko bileran parte hartu dutenek Arabako Gizarte Zerbitzuen Mapak oinarri izango duen zonifikazio geografikoa izan dute hizpide; baita lan metodologiaren oinarrizko alderdiak eta mapa hori lantzeko irizpide orokorrak ere. Prozesu honen bigarren fasean egingo dena da egun zer zerbitzu zentro eta zer diru prestazio dagoen aztertu eta haien inbentarioa egitea. Bukatzeko, hirugarren fasean eskumen banaketa doituko da udalen eta kuadrillen adostasunarekin. Mapa datorren ekainerako onartuta egon dadin nahi da, urte honen bukaeran martxan jarri ahal izateko.

Lan talde teknikoa

EUDELek eta Arabako Foru Aldundiak osaturiko mahaiaz gain; hau da, goi mailako erakundeek osaturiko mahaiaz gain, lan talde tekniko bat eratuko da, eta han udalek eta GOFEko arlo desberdinek izango dute ordezkaritza, aztertuko beharreko gaiak zein diren.

Donostia, abenduak 16. Gizarte zerbitzuen alorrean erakundeen arteko elkarlanaren garrantzia azpimarratu eta islatzeko, Maite Peña Gizarte politikako diputatuak lan bilera egin du Gipuzkoako alkateekin eta udal ordezkariekin, gizarte zerbitzuen bidean aurrera egiteko eman beharreko urratsak zeintzu diren azaldu eta lanerako estrategiak finkatzeko.

Gipuzkoako 40 bat herritako ordezkariak  izan dira bileran;  Donostia,  Irun, Errenteria, Andoain, Tolosa, Eibar, Elgoibar, Hernani edo Beasaingoak,  batzuk aipatzearren.  EUDELek – Euskadiko Udalen Elkarteak ere saioan  parte hartu du, Eusko Jaurlaritzako Lide Amilibia, gizarte zerbitzuetako sailburuordearekin batera.

EUDELeko ordezkariak (Gipuzkoako lurralde batzordea):

Elgoibarko alkatea, Ane Beitia (Eragileko batzordeko bocala)

Eibarko alkatea, Miguel de los Toyos

Hondarribiko alkatea, Txomin Sagarzazu

Legazpiko alkatea, Koldobike Olabide

Peña diputatuak argi utzi du erakundeen arteko elkarlana garatzea  legealdiko helburu nagusienetako bat dela:” udalei lagunduko diegu, lankidetzan eta koordinatuta arituz, baina  norbere eskumenak errespetatuz”, azaldu du diputatuak.

Koordinazioa jo du Peñak helburu nagusi: “Gipuzkoako lurralde antolaketa udalekin batera adostu behar dugu, 2015-2017 rako aurrikusitako gizarte zerbitzuen mapa zabaltzeko”, esan du diputatuak eta bide horretan udalen papera azpimarratu nahi izan du: ” udalen presentzia gehitu behar da , lankidetza sendotu eta negoziazio mekanismoak ezarri”.

Zentzu horretan, erakunde ezberdinak jasoko dituen lantaldea osatzea proposatu die diputatuak udalei: ” mahaiak anitza eta plurala behar du, Gipuzkoako herri ezberdinen beharrak ongi ordezkatuko dituena, eta aldi berean eraginkorra, gizarte zerbitzuen alorrean aurrera egitea ahalbidetuko duena”,  deskribatu du Maite Peñak.

Gizarte zerbitzuetarako, berriki,  Eusko Jaurlaritzak onartu  duen  hiru milioi eurotik gorako funtsaren inguruan, diru hori nola banatuko den azaldu dute bileran Eudeleko ordezkariek eta funts hori banatu ahal izateko, aurrez,  udalek egin behar dituzten etxeko lanetarako eta adosten dituzten ekintzak koordinatzeko orientazioa eta aholkularitza eskeini dizkiete udalei.

Eusko Jaurlaritzaren 2008ko gizarte zerbitzuen legeak helburua finkatzen du: 2016ko abenduaren 26tik aurrera, herritar orok gizarte zerbitzuak izateko eskubide subjektiboa izango duela, alegia. Eta helburu hori lortzeko bidean eratu nahi dute gaur lehen urratsa eman duen erakundeen arteko lantaldea.

Eudelek ekimena txalotu du eta prozesuaren garrantzia azpimarratu: lurraldeko zein udalerrietako herritarren berehalako eta  etorkizunerako ongizatea bermatzeko ezinbesteko urratsa dela esan du Euskadiko udalen elkarteak.