Eudel

Author

eudel

Azken berriak

19.10.2020 Ogasuna eta Finantzak

Gipuzkoako Udalak Finantzatzeko Foru Funtsa: 2020ko eta 2021eko aurreikuspenak

Gipuzkoako udalek 450,6 milioi euro jasoko dituzte aurten Udalen Finantzaketarako Foru Funtsetik (UFFF), lurraldeko udalen diru-sarrera nagusia dena. Ondorioz, udalerriek 22 milioi euro berreskuratu dituzte (+% 5,1) aurtengo maiatzean UFFFan egin zen doikuntzarekin alderatuta. Moldaketa haren arrazoia funtsaren zuzkidura COVID-19k eragindako zerga-bilketaren beherakadara egokitzea izan zen.

  • Gipuzkoako udalerriek UFFFaren laugarren hiruhilekoko ordainketan jasoko dute aparteko zenbateko hori,
  • 2019ko datuekin alderatuta, aldiz, funtsaren zuzkidura 78 milioi eurotan murriztu da (-% 14,8).
  • Datorren 2021ko ekitaldiari dagokionez, eta betiere aurreikuspenen arabera, 47 milioi euro (+% 10,3) gehiago izango dira 2020ko aurre-likidazioarekin alderatuta; beraz, UFFFaren zuzkidura 498 milioi eurokoa izango da.

2020 ETA 2021EKO UDAL FINANTZAKETARAKO FORU FUNTSA

(TAULA-Udalei emandako kopuruak)

(2020-10-19) Gipuzkoako Finantza Kontseiluari buruzko informazioaren laburpena:

Finantza Publikoen Euskal Kontseiluak (FPEK), 2020ko urriaren 15eko bileran, zerga itunduen bilketa aurreikuspenak onartu zituen 2020rako eta 2021erako. Era berean, FPEK-k onartu zituen diputazioek Eusko Jaurlaritzari egin beharreko ekarpenen aurreikuspenak ere. Aurreikuspen horietan oinarrituta kalkulatu dira, behin behingoz, UFFF Udalak Finantzatzeko Foru Funtsarenak ere.

  • 2020ko UFFFaren itxiera aurreikuspena %15,9 txikiagoa da 2020ko aurrekontuarekin alderatuta.
  • 2021eko UFFFaren aurrekontua %10,3 handiagoa izango da 2020ko itxiera aurreikuspenarekin alderatuta.

Hala ere, gogorarazi nahi da datu horiek guztiak aurreikuspenak direla: 2020ko prelikidazioa 2021eko otsailean likidatu beharko dela, eta 2021eko aurrekontua 2022ko otsailean likidatu beharko dela, zerga-bilketaren eta ekarpenen datu errealak ezagutu eta UFFFaren behin betiko zenbatekoak finkatu eta gero.

Bestalde, Aldundiak Gipuzkoari esleitutako defizit muga udalekin partekatuko da. Zorpetzeko gaitasun hori Itun Ekonomikoaren Batzorde Mistoaren irailaren 30eko bileran lortutako akordioaren emaitza da. Itun horren arabera, hiru Aldundiek BPGren % 0,9ko defizita hartu dezake ekitaldi honetan, eta % 0,8koa 2021ean. Ehuneko horietatik, % 60 Aldundiarentzat izango da, eta gainerako % 40a udalentzat. Zorpetzeko gaitasun hori UFFFa arautzen duten ehunekoen arabera banatuko da.

Datu horien guztien berri eman zaie Gipuzkoako Finantza Kontseiluko kideei, 2020ko urriaren 19, astelehen honetan eginda egin duen bileran. Foro horrek aurten egin duen laugarren bilera da. Parte hartzaile gehienak modu telematikoan konektatu dira.

Topaketan parte hartu dute, EUDELen aldetik, bertan izan dira Ane Beitia Elgoibarko alkatea; Izaro Elorza Oñatiko alkatea; Miguel De los Toyos Eibarko alkateak; Eneko Maioz Orexako alkatea; eta Jaime Domínguez-Macaya Donostiako Udaleko Ogasun eta Finantza zinegotzi ordezkaria.

Continue Reading
By

15.10.2020 Ogasuna eta Finantzak

Herri Dirubideen Euskal Kontseilua. 2020ko urriaren 15eko bilera

Vitoria-Gasteizen, 2020ko urriaren 15ean. Herri Dirubideen Euskal Kontseiluak gaur goizean Vitoria-Gasteizen egin duen bileran, Eusko Jaurlaritzak, hiru foru aldundiek eta udalek 2020ko ekitaldian tributu itunduengatiko bilketaren itxiera-aurreikuspena 13.411.590.000 euroan ezarri dute. Kopuru absolutuetan, 2019an bildutakoa baino 2.058 milioi euro gutxiago dira, hau da, % 13,3ko jaitsiera.

Aurreikusten da tributu itunduengatiko bilketa 2021erako aurreikusitako hedatze ekonomikoaren ildoan haztea, eta, hala, uste da foru aldundiek guztira 14.250 milioi euro bilduko dituztela tributu itunduetatik; beraz, 2020. urterako aurreikusitako itxierako bilketa baino % 6,3 gehiago.

Halaber, eta Kontzertu Ekonomikoaren Batzorde Mistoan irailaren 30ean lortutako akordioaren ondoren, gaur goizean adostu da nola banatuko diren hiru foru aldundien artean defizitaren baterako helburuak, 2020ko (% -0,9 595 M€) eta 2021eko (% -0,8 588 M€) ekitaldietarako onetsitako ekarpen koefiziente horizontalen arabera.

Bileraren ondoren, EUDELen elkarteburu Gorka Urtaranek gogora ekarri du Udal Finantzaketarako Foru Funtsetako datu zehatzak eta udal bakoitzaren kontura emango diren kopuruak Araba, Bizkai eta Gipuzkoako Finantzen Lurralde Kontseiluen bileretan emango direla argitara, laster. Urtaranek adierazi duenez, “premiazkoa eta beharrezkoa” da, lurralde bakoitzaren defizitaren banaketan, udalek zer parte-hartze izango duten jakiteko formula zehaztea. “Zer baliabide izango dugun jakin behar dugu, datorren urteko aurrekontuak egiteko”, esan du.

Era berean, EUDELen elkarteburuak nabarmendu du leheneratze soziala udalerrien “funtsezko zeregina” dela. “Udalak gastu publikoaren % 20 gara eta funtsezko agentea gara krisi sozial eta ekonomikotik irteteko.“ esan du Gorka Urtaranek.  Zentzu horretan, elkarteburuak gogoratu du EUDEL euskal udalen elkartea dela eta “batasuna mantentzea“ oso inportantea dela: ”iritzi bakarra behar dugu udalen mezua helarazteko. Hortaz, Eudelen organoetan adostasun eta kontsentsurako deia egiten dut. Laguntza eskasa emango genieke ordezkatzen ditugun udalerriei Eudel barnean zatituko bagina.“ esan du Elkarteburuak.

Gorka Urtaranek nabarmendu du Euskadiko udalek duten borondatea eta prestutasuna herrialdearen baterako erronketan ekarpenak egiteko, Eusko Jaurlaritzak eta foru aldundiek sustatuko dituzten berraktibazio-planetan parte hartuz nahiz Euskadira Europatik eta Estatutik irits daitezkeen ezohiko funtsetan parte hartuz.

Udalen ordezkariak

Herri Dirubideen Euskal Kontseiluan parte hartzen dute EUDELek, Euskadiko udalen ordezkari gisa, Eusko Jaurlaritzak eta Araba, Bizkai eta Gipuzkoako Foru Aldundiek.

Udalerrien ordezkariak hauek dira:

  • Gorka Urtaran, Vitoria-Gasteizko alkatea (EUDELen elkarteburua)
  • Nagore Alkorta, Azpeitiko alkatea (elkarteburuordea)
  • Ángela Eguia, Gordexolako alkatea (Batzorde Eragileko kidea)

 

Ikusi PRENTSA-OHARRA: Herri Dirubideen Euskal Kontseiluaren 2020ko urriaren 15eko akordioak

Continue Reading
By

13.10.2020 Berriak

Uhinak, Klima aldaketa eta Itsasertzari buruzko mugazgaindiko Kongresuaren IV. edizioa

Uhinak, Klima aldaketa eta Itsasertzari buruzko mugazgaindiko Kongresuaren IV. edizioa 2020ko azaroaren 4 eta 5ean ospatuko da.Kongresu hau Ficoba Fundazioak eta Aztik antolatzen dute.

Kongresuaren helburua da Itsasertza defendatzeko eta babesteko beharrezko diren neurriak hartzeko jardunbideak eta irtenbideak ezagutzea, klima-aldaketaren ondorioei aurre egiteko.

Aurtengo Uhinak kongresua online izango da, baldintzarik onenetan egingo dela bermatzeko. Bi eguneko programa izango du, streaming bidez transmititua eta gonbidatutako hitzaldiak, ahozko komunikazioak, solasaldiak eta posterrak izango ditu.

Hemen consulta dezakezu egitarau osoa: http://www.uhinak.com/programa.asp?lng=eu

Izen-ematea zabalik dago : http://www.uhinak.com/inscripcion.asp?lng=eu

Informazio gehiago: www.uhinak.org

Continue Reading
By

05.10.2020 COVID19

EUDELek migratzaileentzako pandemiari buruzko informazioa zabaldu die udalei

EUDELek EAEko udal guztiei bidali dizkie Osakidetzak eta Biltzen erakundeak egindako dokumentuak, herritar migratzaileei Covid19 pandemiari buruzko informazioa emateko, laburbilduta eta hainbat hizkuntzatara itzulita (ingelesa, frantsesa, arabiera, errumaniera, errusiera eta portugesa).

Horrekin, Euskadin bizi diren atzerritar jatorriko auzokok ere informazio publikoa eskuratzeko aukera izatea lortu nahi dugu, aukerak berdinduz.

Dokumentu horiek Eusko Jaurlaritzaren ADICovid19 ekimenaren barruan daude.

Facebook bidez zabaldutako informazio-kanala da, etorkinen elkarteekin, hainbat udalerritako immigrazio-teknikariekin eta Harresiak Apurtuz bezalako sare esanguratsuekin elkarlanean egindakoa.

Eusko Jaurlaritzak Osakidetzan bateratutako komunikazio-kanalaren eta Biltzen erakundearen webgunearen bidez ere eskuratu daiteke.

Gehiago jakiteko: https://biltzen.org/nuevo-canal-informativo-adi-covid

Agiriak:

Continue Reading
By

30.09.2020 COVID19

Euskal erakunde guztiak elkarlanean ari dira tokiko merkataritza eta turismoa sustatzeko programan

  • EUDELek eta gainerako herri-erakundeek sinatutako esparru-protokoloaren bidez, hala nahi duten euskal udal guztiek parte hartzeko aukera izango dute ekimen honetan, udalerri guztietara zabaldu ahal izateko.
  • EUDELek bonuen mekanika eta kudeaketari buruzko informazioa bidaliko die udalei, programari atxikitzeko inprimaki batez lagunduta.
  • Bonuen izenak “Euskadi Turismo Bonua” eta “Euskadi Bonodenda” dira, eta 5, 10 edo 20 euroko deskontuak eskainiko dituzte turismoaren, ostalaritzaren eta merkataritzaren modalitateetan.

EUDELen elkarteburua Gorka Urtaranek, Euskal  Udalen izenean, parte hartu du gaur Eusko Jaurlaritzako merkataritza eta turismo bonuen aurkezpenean, zeini horiei esker 8,7 milioi sartuko baitute merkatuan. Plana euskal erakundeen baterako lanaren emaitza izan da, eta 5, 10 eta 20 euroko deskontuak eskainiko dituzte modalitate ezberdinen arabera; bonuak urriaren 28tik aurrera erosi ahal izango dira.

Gorka Urtaranek ekimenaren balioa azpimarratu du, “Herri gisa batasunaren eta lankidetzaren argazki bat delako, gure merkataritza, ostalaritza eta turismoari laguntzeko”. “Sektore horiek gaizki pasatzen ari dira, eta erakunde gisa erantzun bateratua eta koordinatua eskatzen digute ” azaldu du elkarteburuak.

EUDELen elkarteburuak azpimarratu duenez, “Udalok funtsezko zeregina dugu susperraldi sozial eta ekonomikoan, gu baikara pertsonengandik, enpresetatik, saltokietatik eta tokiko negozioetatik hurbilen daudenak”.

Azkenean, Gorka Urtaranek gogorarazi du tokiko kontsumoaren aldeko herritarren konpromisoa oso garrantzitsua dela “Banako ekintza bakoitzak balio du eta inportantea da gure hiri eta herrietako ekonomia suspertzeko.” adierazi du.

 

EUDELek programa honen esparru-protokoloa sinatu du, interesa duten Euskadiko udalen balizko atxikipenak ahalbidetu xedez. Horretarako, laster atxikitzeko oinarriak eta formularioa bidaliko zaizkie, Merkataritza Ganberen on line plataformaren bidez kudeatuko diren bonuen operatibari buruzko xehetasunekin batera.

Bonu horien aginduak urriaren 5ean argitaratuko dira, eta hilaren 6tik aurrera egongo dira indarrean. Haien arabera, establezimenduek 3 asteko epea izango dute atxikitzeko. Epe horren ondoren, urriaren 28an, bonuak eskuragarri egongo dira herritarrentzat.

Bonuen modalitateak

Bonu horiek Euskadin bizi diren edota, turismoko bonuen kasuan, beste leku batzuetatik etorri diren 18 urtetik gorako pertsona fisikoek erosi ahal izango dituzte urriaren 28tik aurrera. Ez da bono fisikorik egongo; aitzitik, gastatu nahi diren establezimenduan bertan kudeatuko dira online plataformaren bitartez (plataforma hilaren 6tik aurrera egongo da abian).

Bonuak deskontu-balearen ereduan oinarrituta daude. Merkataritzaren kasuan, modalitate bakarra egongo da: 10 euroko deskontuak 30 eurotik gorako erosketetan. 4 bonu eskuratu ahal izango dira gehienez, eta, beraz, gehieneko deskontua 40 eurokoa izango da guztira. Merkataritzaren esparruko mikroenpresei eta enpresa txikiei zuzenduta daude.

Turismoan eta ostalaritzan, 3 modalitate daude. 1. eta 2. modalitateak ostalaritzari, jatetxe-arloari eta turismo-intereseko jarduerei lotutako establezimendu eta enpresei zuzenduta daude, eta 5 edo 10 euroko deskontuak izango dira, 20 edo 40 euroko gutxieneko erosketetarako, hurrenez hurren. Hirugarren modalitatean, deskontua 20 eurokoa izango da 60 eurotik gorako erosketetan, turismoko ostatu-arloko establezimenduetan. 2 bonu eskuratu ahal izango dira establezimendu bakoitzeko, eta, beraz, pertsona bakoitzak gehienez ere 40 euroko deskontua baliatu ahal izango du guztira.

 “Euskadi Turismo Bonua” turismoari eta ostalaritzari lotutako Euskadiko mikroenpresei, enpresa txikiei eta ertainei zuzenduta dago. Haien artean, honako hauek aipa daitezke: ostatu-establezimenduak; turismo-gidariak; turismo-zerbitzuen bitartekaritza eta antolaketako turismo-enpresak; jatetxe-arloko eta ostalaritzako establezimenduak, naturako kirol-jarduerei lotutako enpresak (hala nola turismo aktiboari eta abenturakoari lotutakoak); turismo-garraioko enpresak; kultura-ondarea, gastronomia-ondarea eta ondare naturala zabaltzen duten enpresak; eta jolas-zentroak.

Informazio gehiago:

www.euskadibonodenda.eus

www.euskaditurismobono.eus

Continue Reading
By

28.09.2020 COVID19

Gorka Urtaranek parte hartuko du bihar susperraldian itunak sortzeko Europar Udalerrien Zuzendaritza Batzordean

  • Alkateak eta Europa osoko ordezkari hautetsiak telematikoki elkartuko dira irailaren 29tik urriaren 1era, Zuzendaritza Batzordearen bilerarako eta Europako Udalerrien eta Eskualdeen Kontseiluko (EUEK) urteko erretirorako.
  • EUDELen elkarteburuak bihar, asteartea goi-bileran hartuko du parte goizeko 09:30etik aurrera, eta ondorengo eztabaida politikoan ere bai, tokiko buruzagiek udalerri eta eskualde guztientzako lehenengoratze jasangarria eta osasungarria nola gidatu eztabaidatuko baitute.
  • Lehentasunezko gaiez arituko dira Batzordean, esaterako, zerbitzu publikoak mantendu eta behar sozialak artatzeko tokiko finantzaketa indartzeaz. EUEKek bere tokiko ekintza-plana aurkeztuko du GJHen eta Green Deal edo Europako Itun Berdearen ildoan, datozen urteetarako ibilbide-orri politiko eta ekonomiko gisa.

Bilbon, 2020ko irailaren 28an.

EUDELen elkarteburu eta Gasteizko alkate Gorka Urtaranek bihar, asteartea, Europako Udalerrien eta Eskualdeen Kontseiluko Zuzendaritza Batzordearen urteko bigarren bileran hartuko du parte.

“Udalerri eta eskualde erresilienteetarako bidea” izeneko EUEKen goi-bilera birtual hau pandemia hasi zenetik egingo den lehenengoa da. Helburu nagusia da udalerrien eta Europako gainerako erakundeen arteko elkarlanerako gobernantza indartzea, errekuperazio sozioekonomikoa, energetikoa, klimatikoa, inklusiboa eta bidezkoa sustatzeko.

Batzorde Gidatzailearen bilera goizeko 09:30ean hasiko da eta arratsaldeko lehen orduetan amaituko da, maila anitzeko eztabaida politikoarekin. Truke saio horretan, ordezkari hautetsiez gain, Europako Batzordeko eta EBko Parlamentuko arduradun politikoek eta teknikoek hartuko dute parte.

Biharko goi-bilerari dagokionez, Gorka Urtaranek aurreratu duenez, “EUDELek bat egingo du Europako udalerrien itunarekin, udalerrietako ekintza kokatzeko susperraldian eta pandemiak eragindako krisiaren irtenbidearen erdian”.

COVID-19ak herri eta hirietan eragindako ondorio ugari eta sakonei aurre egiteko dituzten estrategiak eta erantzunak partekatuko dituzte tokiko buruzagiek.

Europako udalerrien goi-bilera honetan tokiko eta eskualdeko agintari garrantzitsuak elkartuko dira, besteak beste, Stefano Bonaccini, Emilia-Romagna eskualdeko (Italia) eta EUEKeko presidentea; Bart Tommelein, Ostendeko (Belgika) alkatea; Phedon Phedonos, Pafoseko (Zipre) alkatea; André Sobczak, Nantesko (Frantzia) metropoliko presidenteordea edo Rui Jorge Cordeiro Gonçalves dos Santos, Vila Realeko (Portugal) alkatea.

Green Deal eta tokiko ekintzarako ezohiko funtsak

EUEKeko Batzordean mezuak eta baterako proposamenak aurkeztu ahal izango dizkiete udalerriek EBko erakundeetako ordezkariei. Zuzendaritza Batzordearen xedea da pandemiak eragindako krisiaren ondorioz lehengoratze sozial eta ekonomikorako tokiko gobernuen lehentasunei buruzko ekarpenak biltzea. EUEKek adostutako adierazpenak eta proposamenak baliagarriak izango dira Europako erakundeetan diseinatzen ari diren ekimen eta planetan “tokiko ikuspegia” izateko, esaterako, Next Generation EU finantza-tresnan edo ekonomia jasangarria, berdea eta zirkularra sustatzeko Energia eta Klima arloko planetan.

Tokiko finantzak, erakundeen arteko maila anitzeko lankidetzak eta GJHen kokapenak indartzeko mekanismoak aztertuko ditu Batzordeak. Arreta berezia eskainiko zaio Gren Deal edo Itun Berdeari, udalerriak ekonomia berdeagora, emankorragora, osasungarriagora eta jasangarriagora joateko ibilbide-orria izan dadin.

EUEKek dio “arrakasta izateko, tokiko gobernuak ahaldunduta egon behar direla. Azken urteetan udalerrien eta eskualdeen erantzukizuna handitu egin da, baina finantzaketarako bideak murriztu egin zaizkie. Hori dela eta, Europako Batzordeak EBko finantzaketarako sarbide zuzena eta soilagoa bermatu behar luke, eta tokiko enpresentzako laguntzen malgutasuna areagotu.”

Balorazio horrekin bat dator EUDELen elkarteburua eta Gasteizko alkatea. Gorka Urtaranek azpimarratu duenez, “tokiko gobernuok lagundu diezaiokegu eta lagundu egin behar diogu gure herri eta hirietako eraldaketa sozialari, ekologikoari, energetikoari eta digitalari”. Elkarteburuak, halaber, adierazi du “Europaren etorkizuna tokiko gizarte eta ekonomietan eraikiko dela, eta udalerri bat bera ere ezin dela atzean geratu”.

Hori dela eta, Euskadiko udalerrien ordezkariak beste kideekin partekatuko du EUDELen eskakizuna, hilabete honetako Batzorde Eragilearen akordioan oinarritua, hau da, “beste erakunde batzuek sustatuta Euskadira irits daitezkeen ezohiko funts guztiak, Europako funtsak barne, udalerrietara ere hel daitezela”.

EUEK 1951n sortu zen eta Europa osoko udalerrien eta federazioen elkarterik garrantzitsuena da, ezarpenari, kide kopuruari eta nazioarteko aintzatespenari dagokionez. Europako 41 herrialdetako udalerrien 60 elkarte daude; tokiko 150.000 gobernuren ordezkariak dira elkarte horiek.

Continue Reading
By

25.09.2020 Euskara

Euskaraldian izena emateko epea ireki da ariketa hasteko bi hilabete falta direla

  • Ariketa sozialaren bigarren edizioa azaroaren 20tik abenduaren 4ra egingo da, 15 egunetan ahobizi edo belarriprest roletan parte hartzeko deia egin dute antolatzaileek
  • Izen-ematea euskaraldia.eus webgunean egin daiteke
  • Rol bakoitzak ariketa egiteko modua adieraziko du, ez hizkuntza-gaitasuna, eta 16 urtetik gorako herritarrek har dezakete parte
  • Bigarren edizio honetan ere EUDEL sustatzaileetako bat da

Gasteiz, 2020/09/24. Euskaraldiaren bigarren edizioan izena emateko epea zabaldu da gaur. Aurreko edizioan moduan, ahobizi eta belarriprest rolekin parte hartuko dute azaroaren 20tik abenduaren 4ra egingo den ariketa sozialeko parte hartzaileek. Koordinazio lanetan ari diren eragileek aurkeztu dute gaur Gasteizen Euskaraldiaren bigarren edizio hau eta parte hartzeko dei zabala egin diote gizarteari.

EUDELeko elkarteburu eta Vitoria-Gasteizko alkate Gorka Urtaranek aurkezpen honetan parte hartu du, Euskadiko Udalen Elkartea sustatzaile baita, eta gainera, erakundea “arigune” izango baita bigarren edizio honetan. Gorka Urtaranek Euskadiko udalek euskararekin duten konpromisoa balioetsi du eta Euskaraldiaren edizio berri honetan parte hartzera animatu ditu:

“Euskara da gure nortasunaren ikur nagusia. Euskal udalerriok arigune bilakatu nahi dugu datorren Euskaraldia ospatzeko. Udalok prest gaude, gainontzeko erakunde eta elkartekin, gure laguntza emateko”

Euskaraldiari “arigune” gisa atxikitzearekin batera, EUDELek bere euskararen aldeko konpromiso eta lana indartzen du, bai udal guztiei, bere helburuen barruan, informazioa eskatutako hizkuntzan igortzean, bai administrazioetan hizkuntzen erabilera normalizatzeko inplikazioan, aspalditik bultzatu baititu berariazko sustapen-ekimenak eta -planak, jardunaldiak, argitalpenak eta matrikulazio-kanpainak, besteak beste.

Gasteizen egindako agerraldian Euskaraldiaren koordinazioan ari diren eragileekin batera agertu dira zenbait erakundetako ordezkariak. Ekitaldian parte hartu dute, Bingen Zupiria Kultura eta Hizkuntza Politikako sailburu eta Eusko Jaurlaritzaren bozeramailearekin batera, Arrate Illaro Euskaraldiko koordinatzaileak, Kike Amonarriz Euskaltzaleen Topaguneko presidenteak, Ana Ollo Nafarroako Gobernuko Herritarrekiko Harremanetarako Kontseilariak, Ramiro González Arabako Ahaldun Nagusiak, Paul Bilbao Euskararen Gizarte Erakundeen Kontseiluko idazkari nagusiak, Andres Urrutia euskaltzainburuak, Zuriñe Gil Gasteizko GEU elkarteko kideak eta Maialen Sobrino Zaramaga auzo elkarteko kideak. Agerraldian egon ezin izan ez diren arren, Euskaraldiaren koordinazio eta antolaketan parte hartzen dute Euskararen Erakunde Publikoak, Euskal Hirigune Elkargoak eta Euskal Konfederazioak.

Euskaraldia hizkuntza ohiturak astintzeko ariketa soziala dela gogora ekarri dute antolatzaileek, euskararen erabilera bultzatzeko ariketa. Euskaraldiko partaideak beraien hizkuntza ohiturak aztertu eta aukeratzen duten rolaren arabera arituko dira 15 egunetan. Aurreko edizioan bezala, bi rol izango dituzte aukeran izena ematen dutenek:

Belarriprest: Beraiei euskaraz hitz egiteko eskatzen dutenak dira belarriprest, euskara ulertzen dute eta beraiekin euskaraz aritzea nahi dute. Ulertzen duten guztiekin ez dute uneoro euskaraz hitz egingo agian, baina ahal eta nahi duten guztietan egingo dute. Gakoa jokaeran dago eta ez gaitasunean.

Ahobizi: Euskaraz ulertzen duten guztiekin euskaraz egingo dute ahobiziek. Euskaraz ulertzen ote duten ez dakienean lehen hitza, beti, euskaraz izango da; mintzakideak euskaraz ulertzen badu, euskaraz jarraituko dute beti. Gakoa ahal den guztietan euskaraz egitea da, jokaerak definitzen du rola, alegia.

Euskaraldian 16 urtetik gorakoek izena eman dezakete, helduen hizkuntza ohitura eta portaeretan eragitea baitu helburu ekimenak. Euskara ulertzeko gaitasuna gutxienez izan behar dute partaideek, baina hortik aurrera, bakoitzak erabakiko du zein rol den berarentzat egokiena. Modu kontziente eta borondatezkoan, hizkuntza ohiturak astindu edo euskararen erabileran aurrerapausoak eman nahi dituzten lagunek 15 egunetan bete nahi duten rola erabaki eta izena eman ahal izango dute, azaroaren 20tik abenduaren 4ra dagokien rolaren txapa jantzita ariketa egin ahal izateko.

Lehen edizioko parte hartzaileen profila oso anitza izan zen. 16 urtez gorako adin guztietako emakume eta gizonek parte hartu zuten ahobizi eta belarriprest modura. Aurten ere aniztasun horri eustea izango da helburua, iaz gutxiago parte hartu zuten adin tarte eta profiletan sakonduz: 16-30 urte arteko gazteak, gizonezkoak eta belarriprest jokabidea hartuko dutenak.

Parte hartzeko dei zabala egin dute Gasteizen egindako agerraldian egondako eragile eta ordezkari guztiek. Euskaraldiaren lehen edizioan ahobizi eta belarriprest rolak hartu zituzten herritarrak berriz ere izena ematera animatu dituzte bertaratuek, eta arrazoi ezberdinengatik 2018an parte hartu ez zutenek ere ateak zabalik dituztela adierazi dute. Orain arten ariguneetan parte hartzeko asmoa adierazi duten herritar guztiek ere izena eman beharko dute.

Izena emateko hiru bide egongo direla azaldu dute: euskaraldia.eus webgunea, batetik, herriz-herri antolatuta dauden batzordeen bidez, bestetik, eta datorren astetik aurrera eskuragarri egongo den telefono aplikazioa azkenik.

Informazio gehiago: https://www.irekia.euskadi.eus/eu/news/63355-falta-dos-meses-para-inicio-euskaraldia-hoy-abierto-plazo-inscripcion

Continue Reading
By

21.09.2020 COVID19

Gorka Urtaranek COVID biktimen oroimenezko ekitaldian parte hartu du euskal udalerri guztien izenean

Alkate eta EUDELeko elkarteburu Gorka Urtaranek gaur Vitoria-Gasteizen COVID biktimei egindako omenaldian parte hartu du euskal udalerri guztien izenean. Iñigo Urkullu lehendakariak Covid-19ko biktima guztiak gogoratzeko eta aitortzeko egin den ekitaldiaren buru izan da. Ekintza honen bidez, biktimak gogoratuko dira, familia guztiei eta maitatzen zituzten pertsonei agur esateko aukera izan ez zuten guztiei elkartasuna adieraziz.

Biktima guztien oroimenez landatu den sekuoia baten eta oroitzapenezko plaka baten inguruan egin da ekitaldia; eta musika pieza labur batek eta Lehendakariaren hitzaldiak osatu dute.  Ekitaldi hau udalek zuhaitzak landatzeko eta plakak jartzeko udal-ekitaldiak egin ditzaten egindako gonbidapenaren parte izan da, beren herrietako biktimekiko elkartasun-sentimenduaren oroimenez.

Lehendakaria hildakoen familiei zuzendu zaie, euskal gizartearen izenean, doluminak adierazteko eta haien familiartekoak oroitzeko borondatea helarazteko. “Gure dolumina adierazten dizuet. Zuen galera-sentimenduan lagundu nahi dizuegu. Ez zaudete bakarrik “, esan du. Halaber, esker oneko hitzak izan ditu oinarrizko zerbitzuetako profesionalentzat. “Bihotz bihotzez, eskerrik asko!”.

Lehendakariak Sempervirens Parkea inauguratzeko aprobetxatu du aukera. Gune hori, Covid 19aren biktimak omendu eta oroitzera, eta pandemia honetan arlo guztietako profesionalek egindako ahalegina gogoratu eta aitortzera bideratuko da. “Sempervirens Parke hau oroitzapenari eta elkartasun-espirituari bizirik eusteko dugun borondatearen adierazgarri da. Zentzu komunitario sakona duen gizartea gara eta izan nahi dugu “, adierazi du.

Hitzaldian, Urkullu lehendakariak aitortu du datozen urteetan ekonomiaren eta enpleguaren susperraldi gogor eta premiazkoari aurre egin beharko zaiola, bai eta bizikidetza sozialararen berreraikuntzari. “Berreraikitze zibikoa, eskua luzatuta, arlo guztietan elkarrizketa soziala bultzatuz”, azpimarratu du. Hala, berreraikitze horren abiapuntua biktimen eta sufrimenduaren oroimenean oinarritzen dela azpimarratu du, ahalegin kolektiboaren, konpromisoaren eta elkartasunaren balioekin batera.

Gasteizko Sempervirens Parkean egin den ekitaldian Eusko Jaurlaritzako sailburuez gain, Diputatu Nagusiak, hiru hiriburuetako alkateak eta euskal erakundeetako, Eudeleko, Arartekoko, alderdi politikoetako eta epailetzako ordezkari nagusiak izango dira bertan.

Pandemiak eragindako egoera epidemiologikoaren ondorioz, oso formatu txikiko ekitaldia izango da. Hala ere, Eusko Jaurlaritzak biktimak omentzeko ekitaldi sozial zabalagoa sustatuko du, osasun-egoerak horretarako aukera ematen duenean eta aforo murrizketarik ez denean.

Sempervirens Parkea

Sequioa Parkea berriztu egin  da Gasteizko Udalaren eta Eusko Jaurlaritzaren artean. Zehazki, berdegunea, hiri-altzariak eta seinaleak birmoldatu dira. Gaur, Sempervirens Parkea izenarekin inauguratu da, oroitzapenaren, elkartasunaren eta itxaropenaren parkea.

EDuela gutxi, Sempervirens barietatearen Sequoia bat landatu da biktima guztien oroimenez. Zuhaitz gaztea da,  Lehendakariaren hitzetan, bizitza eta elkartasuna irudikatzen du. “Lankidetza eta guztion ongiaren espiritua sustatu duena. Itxaropena sinbolizatzen du”, adierazi du.

Continue Reading
By